Fakafeagai ʼi Te Mālama Fakalaumālie
ʼI te fakaʼaogaʼi ʼaē e Satana te gata moʼo palalau kia Eva, neʼe muli ai ia ʼi tana fakafeagai ki te ʼAtua.
Ko te ʼu laumālie ʼaē neʼe fakatupu e Sehova neʼe agalelei fuli. ʼOsi ʼaia pea liliu leva he ʼaselo ʼo agakovi. Ko te ʼaselo ʼaia ko Satana te Tevolo. Neʼe loto ia Satana ke atolasio age te hahaʼi ʼo te kele kia te ia, kae ʼaua naʼa atolasio kia Sehova. Koʼeni te meʼa neʼe hoko:
ʼI te ʼōloto ʼo Eteni, neʼe lahi te ʼu fuʼu ʼakau neʼe ʼi ai hona ʼu fua neʼe lelei ki te kai. Neʼe fakamahino age e Sehova kia Atama pea mo tona ʼohoana, ia Eva, ʼe feala tanā kakai faʼitaliha ki te ʼu fua ʼaia, gata pe ki te ʼu fua ʼo te fuʼu ʼakau e tahi: kapau ʼe nā kakai kiai, pea ʼe nā mamate moʼoni anai.— Senesi 2:9, 16, 17.
ʼI te tahi ʼaho neʼe tokotahi ai Eva, neʼe palalau age he gata kia ia. ʼE moʼoni, ʼe mole ko te gata totonu ʼaē neʼe palalau age; ko Satana te Tevolo ʼaē neʼe ina faigaʼi te faʼahi ʼaia. Neʼe ʼui age e Satana kia Eva kapau ʼe ina kai ki te fuaʼi ʼakau ʼaē neʼe tapuʼi, ʼe liliu anai ia ʼo poto ohage ko te ʼAtua. Neʼe ina toe ʼui age foki ʼe mole mate anai ia. Ko te ʼu fakamoʼoni ʼaia e lua neʼe ko te ʼu loi. Kae, neʼe faka tui Eva kia Satana pea ina kai te fuaʼi ʼakau. Ki muli mai, neʼe ina foaki age kia Atama, pea neʼe toe kai mo ia kiai. — Senesi 3:1-6.
ʼI te hisitolia moʼoni ʼaia, ʼe tou ʼiloʼi ai ko Satana ko he fakafeagai pea mo gutuloi. Neʼe ina ʼui age kia Eva ʼe mole mate anai ia mokā ʼe talagataʼa ki te ʼAtua. Neʼe ko he loi ia. Neʼe mate moʼoni ia, pea feiā foki mo Atama. Neʼe mole mate Satana ʼi te temi pe ʼaia; kae ko tona ikuʼaga ʼaia koteʼuhi he neʼe agahala. Kae, ʼi te temi nei, ʼe kei maʼuli ia pea kei hoko atu aipe tana fakahēʼi te hahaʼi. Kei gutuloi tuʼumaʼu pe ia, pea ʼe ina faigaʼi te hahaʼi ke nātou maumauʼi te ʼu lao ʼa te ʼAtua. — Soane 8:44.
Ko ʼihi ʼu ʼaselo neʼe fakafeagai
Ki muli mai, neʼe liliu ʼihi ʼu ʼaselo ʼo agakovi. Neʼe fakatokagaʼi e te ʼu ʼaselo ʼaia, te ʼu fafine matalelei ʼi te kele, pea neʼe nātou fia felāveʼi fakasino mo te ʼu fafine ʼaia. ʼO nātou hifo mai ki te kele ʼonatou kofuʼi he ʼu sinoʼi tagata. ʼOnatou toʼo ai te ʼu fafine maʼa nātou. Neʼe ko he fakafeagai ia ki te fakatuʼutuʼu ʼa Sehova. — Senesi 6:1, 2; Suta 6.
Ko te ʼu ʼaselo agakovi neʼe hifo mai ki te kele ko tanatou fia felāveʼi fakasino mo te ʼu fafine.
Ko tanatou aga neʼe lahi tona to kovi ki te hahaʼi katoa. Ko te ʼu ʼohoana ʼo te ʼu ʼaselo ʼaia neʼe maʼu tanatou fānau, kae neʼe mole tatau mo te ʼu fānau fuli. Neʼe nātou liliu ko te ʼu tagata lalahi fekai pea mo fakamataku. Ko te kele neʼe fonu ai leva te agakovi, koia neʼe fakatotonu ai e Sehova ke ina fakaʼauha te kau agakovi ʼaki he tulivio. Ko te hahaʼi pe ʼaē neʼe maʼuʼuli ʼi te tulivio ʼaia, ko te tagata agatonu ko Noe pea mo tona famili. — Senesi 6:4, 11; 7:23.
Kae ko te ʼu ʼaselo agakovi neʼe toe liliu ki te mālama fakalaumālie; neʼe mole mamate nātou. Pea neʼe fakatūʼa nātou. Neʼe mole nātou toe kau ki te famili ʼo te ʼAtua, ʼaē ʼe faʼufaʼu e te kau ʼaselo faitotonu. Pea, neʼe mole toe fakagafua age e Sehova ke nātou toe kofuʼi he ʼu sinoʼi tagata. Pea ʼe nātou mamate anai ʼi te temi ʼo te fakamāu lahi. — 2 Petelo 2:4; Suta 6.
Neʼe kapu Satana mai te lagi
Ko Satana pea mo tana ʼu ʼaselo agakovi neʼe kapu nātou mai te lagi.
ʼI te kamataʼaga ʼo te sēkulō, neʼe fai te tau ʼi te lagi. ʼI te Tohi-Tapu, ko te tohi Fakahā neʼe ina fakahāhā fēnei mai te faʼahi ʼaia: “Pea neʼe hoko te tau ʼi te lagi: Ko Mikaele [Sesu ʼaē neʼe toe fakatuʼuake] pea mo tana kau ʼaselo [agalelei] neʼe nātou tauʼi te talakone [ia Satana], pea neʼe tau te talakone mo tana kau ʼaselo [agakovi], ka neʼe mole mālo ia, pea neʼe mole kei ʼi ai he nofoʼaga kia nātou ʼi te lagi. ʼO lī ifo ai te talakone lahi, te gata olisinale, ia ia ʼaē ʼe ʼui ko te Tevolo pea ko te Satana, ia ia ʼaē ʼe ina kākāʼi te malamanei katoa; neʼe lī ifo ki te lalo kele, pea mo tana kau ʼaselo [agakovi] neʼe lī mo ia ki lalo.”
Koteā te meʼa neʼe hoko? Koʼeni te hoko atu ʼo te fakamatala: “Koia koutou fiafia, selo, pea mo koutou ʼe nonofo ai!” Neʼe feala ai te fakafiafia ʼa te kau ʼaselo agalelei koteʼuhi ko Satana pea mo tana kau ʼaselo agakovi, peʼe ko te ʼu laumālie kovi, neʼe mole kei nātou nonofo ʼi te lagi. Pea, koteā tona ikuʼaga ki te hahaʼi ʼo te kele? “Malaʼia ki te kele pea mo te tai, ko te ʼui ʼaia ʼa te Tohi-Tapu, koteʼuhi ko te Tevolo kua hifo atu kia koutou, mo tona toe ʼita lahi, ʼi tana ʼiloʼi kua nounou tona temi.” — Fakahā 12:7-9, 12.
ʼE moʼoni, ko Satana pea mo tona ʼu kaugā fagona agakovi ʼe nātou fakahēʼi te hahaʼi ʼo te kele pea mo tuku kia nātou he malaʼia lahi. Ko te ʼu ʼaselo agakovi ʼaia, ʼe higoaʼi ko te kau temonio. Ko nātou ko te ʼu fili ʼo te ʼAtua. ʼE nātou agakovi fuli.