Malayika gosope gaŵagapanganyisye Mlungu, galiji gambone. Nambo kaneko lilayika line lyachenjile nikuŵa lyakusakala. Lilayika lyeleyi lili Satana. Jwalakwe ŵasakaga kuti ŵandu amtindiŵalileje m’malo mwakumtindiŵalila Yehofa. Kwende tulole yaŵatesile:

Mumgunda ŵa Edeni mwaliji yitela yejinji yayasogolaga yisogosi yambone. Yehofa ŵamsalile Adamu soni Hawa kuti alyeje yisogosi ya m’yitela yosope ya mumgundamo. Nambo ŵalekasisye kulya yisogosi ya m’chitela chimo. Mlungu ŵasalile jemanjaji kuti naga akulya yisogosi ya m’chitela chelecho, chachiwa.—Genesesi 2:9, 16, 17.

Lisiku line Hawa ali jika, lijoka lyaŵechetene ni jwalakwejo. Nambotu ngaŵa kuti lijokalyo ni lyalyaŵechetaga, jwaliji Satana juŵatendekasyaga kuti lijokalyo liwonecheje mpela kuti likuŵecheta. Satana ŵamsalile Hawa kuti, naga akulya yisogosi ya m’chitela chaŵalekasisyecho, chachiŵa jwalunda mpela Mlungu, soni kuti ngasawa. Nambotu yaŵaŵechete Satanayi yaliji yaunami. Atamose kuti yaliji myoyo, Hawa ŵamkulupilile Satana mwamti ŵalile yisogosiyo. Kaneko ŵampele Adamu, mwamti nombenajo ŵalile.—Genesesi 3:1-6.

Kutyochela ku ngani jisyesyene jeleji, tukuyiwona kuti Satana ali jwakwimuchila soni jwaunami. Jwalakwe ŵamsalile Hawa kuti naga ngakumpikanila Mlungu, ngasawa. Welewutu waliji unami wekulungwa. Hawa ŵawile. Nombenajo Adamu, ŵaŵaliji ŵamkwakwe, ŵawilesoni. Nambo Satana nganawa ndaŵi jijojo, nambope chachiwa ligongo lyakuti jwalemwisye. Apanopano ali chiŵela umi soni akupitilisyape kwasokonasya ŵandu. Jwalakwe ali jwaunami, soni akusalingalinga kwatendekasya ŵandu kuti akapikanilaga malamusi ga Mlungu.—Yohane 8:44.

Pali papite ndaŵi, malayika ganesoni gaŵele gakusakala. Malayika gelega gatandite kwakumbila achakongwe ŵakusalala pachilambo chapasi, mwamti gasakaga kuti gagoneje nawo achakongwewo. Myoyo gayiche pachilambo chapasi ni gachenjile yilu yawo nikuŵa achalume. Kaneko gajigalaga achakongwe gaŵasachile ni kwalombaga. Nambotu yeleyi yaliji yakulekangana ni yaŵasakaga Mlungu.—Genesesi 6:1, 2; Yuda 6.

Yagatesile malayikaga yayikasisyesoni yakusawusya yejinji pa ŵandu. Malayikago gaŵelechele achakongwewo ŵanache, nambo ŵanache ŵakwe ŵaliji ŵakusimonjesya. Ŵaliji ŵamachili mnope soni ŵachalewulewu, mwamti ŵatendaga yachiwawa. Kaneko pachilambo chosope pagumbele yachiwawa mwamti Yehofa ŵaganisisye yakonanga ŵandu wosope ŵakusakala ni chigumula. Ŵandu ŵaŵakulupwiche chigumula chelechi ŵaliji mundu jwakulungama, Noŵa, pampepe ni liŵasa lyakwe.—Genesesi 6:4, 11; 7:23.

Nambope malayika gakusakala gala nganigawa, nambo gawujile kwinani. Atamose kuti gawujile kwinani, nambo Mlungu ŵagapele chilango. Mlungu nganagakunda malayikago kuti gatameje yimpepe ni malayika gambone. Nambosoni, Yehofa nganagakundasoni malayikago kuti gachenjeje yilu yawo nikuŵa ŵandu. Pambesi pakwe, Mlungu chachigawulaga malayika gelega palisiku lyakulamula.—2 Petulo 2:4; Yuda 6.

Kundanda kwa yaka ya m’ma 1900, jawuliche ngondo kwinani. Baibulo, mnopemnope buku ja Chiwunukuko jikusasala yayatendekwe. Jikusati, “Sambano jatandite ngondo kwinani. Mikaele [lina line lya Yesu Klistu ali ajimwiche ku chiwa] ni malayika gakwe [gambone] ŵaliji mkumenyana ni chingwena chila [Satana]. Chingwenacho pampepe ni malayika gakwe [gakusakala] ŵajigalene wosope kukuputa ngondo, nambo nganapunda, mwakuti jwalakwejo pamo ni malayika gawo nganakundidwasoni kutama kwinani. Chingwena chekulungwa chakalakala chila chagwisidwe pachilambo chapasi pano. Chelechi ni chele chachikusaŵilanjidwa kuti Jwakusakala kapena Satana, chele chilambwisye ŵandu ŵa pachilambo chosope chapasi. Chaponyedwe pachilambo pampepe ni malayika gakwe gosope [gakusakala].”

Ana kaneko chatendekwe chichi? Baibulo jikusapitilisya kutusalila kuti, “Myoyo sengwani [msangalale], chilambo cha kwinani pampepe ni ŵakutama kweleko.” Malayika gambone gasangalele ligongo lyakuti Satana ni malayika gakwe gakusakala, kapena misimu, kwangalisoni kwinani. Nambi wuli ŵandu ŵakutama pachilambo chapasi? Baibulo jikusati, “Mkwete likungu, chilambo chapasi ni nyasa, pakuti Satana atuluchile kwa jemanja. Ali jwaukali mnope ligongo akumanyilila kuti jigambile kumsigalila ndaŵi panandipe.”—Chiwunukuko 12:7-9, 12.

Kusala yisyene, Satana ni achimjakwe ŵakusakala akwasokonasya ŵandu pachilambopa soni jemanjaji ni ŵakutendekasya kuti tusimaneje ni yakusawusya yejinji. Malayikaga gakusakolanjidwa kuti yiŵanda. Malayika gosope gelega gali gakusakala soni ali adani ŵa Mlungu.