Ka beetaʼab le angeloʼob tumen Jéeobaoʼ láaj utsoʼob. Baʼaleʼ utúul angeleʼ tu beetuba kʼasaʼanil. Le angelaʼ Satanás le Kʼaasilbaʼaloʼ. Satanaseʼ maʼ u kʼáat kaʼach ka adorartaʼak Jéeoba tumen wíinikoʼobiʼ, baʼaxeʼ u kʼáat letiʼ ka adorartaʼak. ¿Bix túun úuchik lelaʼ?

Tu jardinil Edeneʼ yaan kaʼach yaʼab cheʼob ku yichankiloʼob utiaʼal jaantbiliʼ. Jéeobaeʼ tu yaʼalaj tiʼ Adán yéetel tiʼ Eva jeʼel u páajtal u jaantkoʼob u yich le cheʼob yanoʼob teʼ jardinoʼ. Baʼaleʼ tu yaʼalajtiʼob maʼ u jaantkoʼob u yich ukúul tiʼ le cheʼoboʼ, tumen wa ku jaankoʼobeʼ yaan u kíimloʼob (Génesis 2:9, 16, 17).

Upʼéel kʼiin tiaʼan Eva tu juunaleʼ, tʼaʼan tumen utúul kaan. U jaajileʼ, maʼ letiʼe kaan tʼaanajoʼ; Satanás beet bey táan u tʼaan le kaanoʼ. Satanaseʼ tu yaʼalaj tiʼ Evaeʼ wa ka u jaant u yich le cheʼ aʼalaʼantiʼ maʼ u jaantkoʼ yaan u yantal u naʼat jeʼex Dioseʼ. Tu yaʼalaj xan tiʼeʼ maʼ kun kíimil. Le baʼax tu yaʼalajaʼ maʼ jaajiʼ. Baʼaleʼ, Evaeʼ tu creertaj le baʼax tu yaʼalaj le Kʼaasilbaʼaloʼ ka tu jaantaj u yich le cheʼoʼ. Ku tsʼoʼoleʼ tu tsʼáaj xan tiʼ Adán utiaʼal ka u jaante, letiʼ túuneʼ tu jaantaj xan (Génesis 3:1-6).

Tiʼ le baʼax úuchaʼ k-kankeʼ Satanaseʼ tu tsʼáajuba tu contra Dios yéetel tuusnaji. Tu tusaj Eva, tumen tu yaʼalajtiʼ maʼ kun kíimil kex ka xiʼik tu contra le baʼax u yaʼalmaj Diosoʼ. Baʼaleʼ Evaeʼ kíimi, yéetel bey xan úuchik tiʼ Adanoʼ. Satanaseʼ maʼ kíim tiʼ le kʼiinoʼob jeʼeloʼ, baʼaleʼ yaan u kʼuchul u kʼiinil  u kíimil úuchik u kʼebantal. Teʼ kʼiinoʼobaʼ láayliʼ kuxaʼaneʼ yéetel láayliʼ táan u tusik wíinikoʼob utiaʼal ka kʼebanchajkoʼob tu táan Dios (Juan 8:44).

Ka máan kʼiineʼ, uláakʼ angeloʼobeʼ tu beetubaʼob xan kʼasaʼaniloʼob. Le angeloʼobaʼ tu yiloʼob jach kiʼichpamtak le koʼoleloʼob yanoʼob way Luʼumoʼ ka taakchaj u yantaloʼob tu yéeteloʼob. Le oʼolaleʼ tu sutubaʼob wíiniki, ka taaloʼob way Luʼumeʼ, ka múul kajlajoʼob yéetel le koʼoleloʼoboʼ. Le baʼax tu beetoʼobaʼ jach kʼaas tu táan Dios tumen maʼ beetaʼaboʼob utiaʼal ka tsʼoʼokok u beeloʼobiʼ (Génesis 6:1, 2; Judas 6).

Le baʼax tu beetoʼobaʼ jach tu taasaj muʼyajil tiʼ wíinikoʼob. Le ka anchaj u paalal le angeloʼobaʼ jach kaʼanchaj u baakeloʼob, jach kʼasaʼanchajoʼob yéetel tu sen beetoʼob loob. Ka máan kʼiineʼ le Luʼumaʼ chuʼup yéetel le baʼaloʼob kʼaastak ku beetaʼaloʼ, le oʼolal Jéeobaeʼ tu taasaj upʼéel búulkabal utiaʼal u xuʼulsik le kʼasaʼan máakoʼoboʼ. Chéen Noé yéetel u familia maʼ kíimoʼob teʼ Búulkabaloʼ (Génesis 6:4, 11; 7:23).

Baʼaleʼ, le kʼasaʼan angeloʼoboʼ maʼ kíimoʼobiʼ, suunajoʼob teʼ kaʼanoʼ. Chéen baʼaleʼ, maʼ chaʼab u kaʼa yantaloʼob yéetel u utsul angeloʼob Diosiʼ. Yéetel Jéeobaeʼ tu luʼsaj xan tiʼob u páajtalil u kaʼa sutkubaʼob wíiniki. Tsʼoʼoleʼ yaan xan u kʼuchul u kʼiinil u xuʼulsaʼaloʼob (2 Pedro 2:4; Judas 6).

Tu jaʼabil 1914 anchaj upʼéel baʼateʼel teʼ kaʼanoʼ. U libroi Apocalipsiseʼ bey u yaʼalik baʼax úuchaʼ: «Yanchaj junpʼéel guerra teʼ kaʼanoʼ. Miguel [wa Jesucristo] yéetel u [utsul] ángeloʼobeʼ baʼatelnajoʼob tu contra le nojoch kaanoʼ [wa Satanás]. Le nojoch kaan yéetel u ángeloʼoboʼ baʼatelnajoʼob xan tu contraʼob, 8 chéen baʼaleʼ letiʼobeʼ maʼ tsaʼayoʼobiʼ, yéetel mix tuʼux chaʼab u pʼáatloʼob teʼ kaʼanoʼ. Bey túunoʼ puʼul way yóokʼol kaab le nojoch kaanoʼ, le úuchben kaanoʼ, le ku yaʼalaʼal Kʼaasilbaʼal wa Satanás tiʼoʼ, le máax táan u tusik tuláakal yóokʼol kaaboʼ. Puʼul way luʼum paʼteʼ yéetel u ángeloʼobeʼ».

¿Baʼax tu taasaj le baʼatelaʼ? Le Bibliaoʼ ku yaʼalik: «¡Kiʼimakchajak a wóoleʼex, kaʼaneʼex, bey xan teʼex, u kajnáalileʼex kaʼan!». Le utsul angeloʼoboʼ kiʼimakchaj u yóoloʼob tumen Satanás yéetel u kʼasaʼan angeloʼobeʼ jóoʼsaʼaboʼob teʼ kaʼanoʼ. Baʼaleʼ ¿baʼax úuch tiʼ u kajnáaliloʼob le Luʼumaʼ? Le Bibliaoʼ ku yaʼalik: «¡Óotsil tiʼ le luʼumoʼ bey xan tiʼ le kʼáaʼnáaboʼ!, tumen le Kʼaasilbaʼaloʼ tsʼoʼok u yéemel ta wiknaleʼex yéetel jach pʼujaʼan tumen u yojel chéen junpʼíit kʼiin pʼaataltiʼ» (Apocalipsis 12:7-9, 12).

Jach beyoʼ, Satanás yéetel u kʼasaʼan angeloʼobeʼ táan u tuskoʼob yéetel táan u beetkoʼob u muʼyaj wíinik. Teʼ Bibliaoʼ tiʼ le kʼasaʼan angeloʼobaʼ ku yaʼalaʼal xan tiʼob kʼaakʼas pixanoʼob. Le angeloʼob jach kʼasaʼanoʼobaʼ u jach tsʼaamubaʼob tu contra Dios.