Mmusu’m be ti sran kunfuɛ!
Satan nin i mmusu’m be kle sran’m be ɲrɛnnɛn kpɛkun be ti sran kunfuɛ trilili. Laa nun’n, Satan kunnin Zɔbu i nnɛn mun nin i junman difuɛ mun. Kpɛkun ɔ yoli maan ‘aunmuan dan kun’ fitali yɛ sua nga Zɔbu i mma blu’m be o nun’n, ɔ bu guali be su kunnin be ɔ. I sin’n, Satan fali ‘tukpacɛ tɛ wie guali Zɔbu wunnɛn’n su. Tukpacɛ sɔ’n ɔ yoli i ja’n bo lele fa juli i ti’n su.’—Zɔb 1:7-19; 2:7.
Zezi blɛ su’n, mmusu’m be yoli maan sran wie’m be kacili bobofuɛ, be sili wie’m be ɲinma. (Matie 9:32, 33; 12:22) Be kleli bian kun ɲrɛnnɛn, ɔ maan ɔ fali yɔbuɛ kpɛkpɛli i wun. (Mark 5:5) Be sacili bakan kun, “be tɛli i ase, ɔ kpannin, ɔ keteli kafiaa.”—Lik 9:42.
Lalafuɛ nun’n, mmusu’m be yoli maan sran wie’m be tɔli tukpacɛ, yɛ be yoli maan wie’m be keteli kafiaa.
Andɛ Satan nin i mmusu’m be ti sran kunfuɛ kpa. Nanwlɛ, kɛ ɔ fin cɛn mɔ be fuannin be ɲanmiɛn su lɔ’n, be klunwi ayeliɛ’n, w’a yo dan kpa. Asiɛ’n su nganniɛn nga e ti be’n, be kle kɛ be sran kunlɛ’n cɛnnin. Be fa tukpacɛ be yi sran wie’m be su. Be kle wie’m be yalɛ kɔnguɛ, ɔ maan be kwlá lafiman, annzɛ kusu be cɛn laliɛ tɛtɛ mun. Be nin wie’m be la kɛ be yi annzɛ be wun sa. I sɔ’n yɛ sran wie’m be flɛ i be blɔlɔ bian’n annzɛ be blɔlɔ bla’n niɔn. Be tu wie’m be ɲin su, be wlawla be naan be kun sran, annzɛ be kun be bɔbɔ be wun.
Andɛ, mmusu’m be yo maan sran wie’m be yo sa kekleekle mun. Be kle sran wie’m be yalɛ kɔnguɛ, ɔ maan be cɛn laliɛ tɛtɛ mun.
Lintina tran Surinamu, Amlɛnkɛn be mɛn’n i ngua lika liɛ’n nun lɔ. Ɔ seli kɛ mmusu kun kunnin i osufuɛ 16, kpɛkun ɔ kleli be kplo nun ɲrɛnnɛn, kpɛkun ɔ sacili be ti nun, lele afuɛ 18. I lɛ nun’n yɛ ɔ wunnin i wlɛ kɛ kannzu mmusu’m be kwla ‘kle sran’m be ɲrɛnnɛn lele be kun be ɔ.’
