Satanási hama máfianu furundegubeiñanu ani peligurutiñu. Lüha meha áfaragua lumutiñu Satanási libiñanigu Hobu aban wügüri úaraguati áfaragua laña giñe ha nadagimeinbaña lun. Ábati láfaraguniñu diisi lirahüñü Hobu adügati lun láfurun “aban garabali héreti” aba lágurunu muna to ñein habéi hawagun. Lárigiñe aba lóunahan Satanási aban lanarime sandi luagu Hobu “aba ladagarun guméi luagu sun lura, lúmagiñe lábugiñegiñe lugudi darí lábulugun”. (Hobu 1:7-19; 2:7.)

Lidan lidaani Hesúsu adügatiñu máfianu lun lásiñarun hadimurehan fiú gürigia gidá haméi harihin fiú. (Matéu 9:32, 33; 12:22.) Anihein meha aba sügǘ lani aban wügüri le hasufuriragüdübei adüga hagía lun líbaagun lungua lau dübü. (Márükosu 5:5.) Anihein giñe sügǘ lani aban irahü adügatiñu lun lagúarahan, huchú haméi múarugun, ‘aba hóunwehagüdüni’. (Lúkasi 9:42.)

Uguñe weyu Satanási hama lumáfianu gáfarahatiñu kei súnwandan. Ganwoun haali wuribani le  burí hadügübei, lúmagiñe hachagarún siélugiñe. Ariñahani lídangiñe sun ubóu adimurehati luagu hasufuriragüdüniñu gürigia. Rutiñu bandi sandi hawagu besafu gürigia. Gidá hamuti darangilaü hawéi híbiri gürigia áriebu lun lasiñarun harumugun o hagidaruni hadabagu lau uénedü hanarimeburiti. Águraguatiñu amu gürigia. Ádaha hamutiñu híbiri lidoun lilülü aaü, áfarahadi o háfaragun houngua.

Lintina, to erederuboun Surinamu, abahüdahatu áfara lan aban máfia o sífiri wuribati 16 hádangiñe tufamilia ani tuguya súfurigüda hamutu dandu túgubu kei tisaminan luagu 18 irumu. Luagu le tasügürübei erengatu “hínsiñe lan houn máfianu hasufuriragüdüniñu gürigia darí háfaruniñu hilagubei”.

Ani Heowá gayarati ladouragun hau lubueingu luéi lagayuahan Satanási. (Ariñawagúni [Proverbios] 18:10.)