Satan le khuachia cu an puarhrang i ṭih an nung peng rih. Hlanlio zumhfekmi Job i a saṭil le a salle kha Satan nih a rak thah hna. Cun Job fale pahra an umnak inn kha “thli fakpi” in a hranter i a tlukternak thawngin a thah dih hna. Mah hnuah Satan nih “fih a nungmi hma in Job cu a kechik in a luthlung tiang a hrem.”​—Job 1:​7-19; 2:7.

Jesuh chan ah khuachia nih mi cheukhat kha holh kho lo le khua hmu kho loin an tuah hna. (Matthai 9:​32, 33; 12:22) Mipa pakhat kha an hrem i amahle amah lung in i cumh ding le i den dingin an tuah. (Marka 5:5) Cun ngakchiapa pakhat kha an auter chih i vawlei ah an thluk, cun ‘i let cukmak in an tuah.’​—Luka 9:42.

Tuchan zongah Satan le khuachia cu a hlan bantukin mi thattu an si rih. A tak ti ahcun van in thlak an si hnu thawkin an ṭhatlonak cu a karh. Vawleicung pumpi report nih an puarhrannak kha a langhter. Mi cheukhat kha an zawtter hna. Cheukhat kha i hngilh kho loin an tuah hna asiloah mangchia an manhter hna. Cheukhat cu nupa sualnaklei in hna an hnawh hna. Cheukhat cu an hruhter hna, mi an thahter hna asiloah mahle mah i thah dingin an tuah hna.

Khuachia asiloah thlarau ṭhalo nih a chungkharmi 16 kha an thah hna i amah zong kum 18 chung pumsalei he, lungthinlei he an ka hrem tiah Suriname ram ah a ummi Lintina nih a chim. Khuachia pawl cu “mi kha thih tiangin an hrem hna tikah an i nuam” tiah a hmuhtonnak in a chim.

Asinain Jehovah nih a salle kha Satan dohnak in a huhphenh khawh hna.​—Phungthlukbia 18:10.