Kpukpru ini Satan ye mme demon ẹsitie ibak ibak ẹnyụn̄ ẹdi n̄kpọndịk. Ke mme ini edem Satan ama osobo ufene ye mme asan̄autom Job anam-akpanikọ. Ekem enye ama owot nditọ Job duop ke ndinam “akamba oyobio” ediwụri ufọk oro mmọ ẹkedọn̄ọde. Ke oro ebede Satan ama akada “idiọk oyo otịm Job, ọtọn̄ọde ke ikpatukot esie, tutu osịm ke etịn̄ibuot esie.”​—Job 1:​7-19; 2:7.

Ke eyo Jesus, mme demon ẹma ẹnam ndusụk owo ẹkabade ẹdi imụm ye nnan. (Matthew 9:​32, 33; 12:22) Mmọ ẹma ẹtụhọrede eren kiet ẹnyụn̄ ẹnam enye esida itiat asiak idemesie. (Mark 5:5) Mmọ n̄ko ẹma ẹnam eyeneren kiet ofiori n̄kpo, ẹsio enye ẹduọk ke isọn̄, ẹnyụn̄ “ẹsịn̄ede enye ọkpọsọn̄.”​—Luke 9:42.

Mfịn, Satan ye mme demon ẹwot mme owo akan nte akanam edide.  Ke akpanikọ, idiọk edinam mmọ ọmọkọri tọn̄ọ nte ẹkesion̄o mmọ ke heaven ẹduọn̄ọ. Mbụk ẹtode ofụri ererimbot ẹmetie ntiense ẹban̄a ibak ibak edinam mmọ. Mmọ ẹsida idiọk udọn̄ọ ẹnọmọ ndusụk owo. Mmọ ẹsisịn ndusụk owo ntịme ke idem ke okoneyo, iyakke mmọ ẹde idap m̀mê ẹnamde mmọ ẹdaba ndiọi ndap. Mmọ ẹsisabarede mbon eken ke n̄kan̄ ido idan̄. Mmọ n̄ko ẹsinam mbon en̄wen ẹdama idat, ẹwot owo, m̀mê ẹwot idem.

Lintina, emi odụn̄de ke Suriname, obụk ete ke demon kiet, m̀mê idiọk spirit, ama owot owo 16 ke ubon imọ onyụn̄ otụhọrede imọ ke n̄kan̄ ikpọkidem ye ke n̄kan̄ ekikere ke isua 18. Otode ke se enye osobode n̄wan emi obụk ete ke mme demon “ẹsikop inemesịt nditụhọrede mbon oro mînyịmeke inọ mmọ tutu osịm n̄kpa.”

Edi Jehovah ekeme ndikpeme mme asan̄autom esie nsio ke en̄wan Satan.​—Mme N̄ke 18:10.