Satani po aovi lẹ po nọ saba yin kanylantọ po owúnú po. To ojlẹ fliflimẹ tọn lẹ whenu Satanu hù lẹngbọpa po afanumẹ Job dodonọ tọn lẹ po. Enẹgodo é hù ovi Job tọn ao lẹ gbọn hinhẹn “jẹhọn daho de” nado và owhé he mẹ yé tin te sudo do yé ji. To enẹgodo Satani “Yí nutitẹ̀ fifiẹ lẹ do hò Job, sọn afọgbẹn afọ etọn tọn jẹ ahọ̀ndòmẹ etọn.”—Job 1:7-19; 2:7.

To azán Jesu tọn gbe, aovi lẹ hẹn mẹdelẹ zùn unbọpẹnnọ po nutọnnọ po. (Matiu 9:32, 33; 12:22) Yé sayana dawe de bosọ hẹn ẹn nado yi zannu do gbleawuna ede. (Malku 5:5) Yé sọ yinuwa do ovi de ji bo hẹn ẹn nado dawha daga, bo ze é liai do aigba, “bo sọ dlan ẹn”—Luku 9:42.

To egbehe, Satani po aovi lẹ po yin hlọnhùtọ hugan gbede pọ́n. Na nugbo tọn, nuwiwa ylankan yétọn ko jideji talala sọn whenue gbọ́n yé ko yin yìnyàn jẹgbonu  sọn olọn mẹ. Linlin lẹ lẹdo aihọn pé dekunnu do kanyinylan yétọn ji. Yé yi azọ̀n ylankan do hò mẹdelẹ. Yé nọ vannukundo mẹdelẹ to zanmẹ, bo gbọnmọ dali do nọ do amlọn-madọ na yé kavi odlọ obudonamẹ tọn lẹ zizepé yé dali. Yé nọ yi zanhẹmẹ ṣiṣizan do sayana mẹdevo lẹ. Mọga yé nọ hẹn mẹdevo lẹ zun alẹnọ, hlọnhùtọ, kavi mẹdetiti hùtọ.

Lintina, he nọnọ otò Suriname tọn mẹ, dọdọ aovi de, kavi gbigbọ ylankan, hù hagbẹ́ whẹndo etọn tọn 16 bosọ sayana ẹn to agbasamẹ podọ to apọnmẹ na owhe 18. Sọn numimọ tintan mẹ ewọ dọ tọ́njẹgbonu dọ aovi lẹ “Nọ duvivi sisayana mẹhe tin to omọ yétọn mẹ he yé ma tindo ojlo na lẹ kakajẹ okú donu.”

Ṣigba Jehovah penugo nado basi hihọ́ na devizọnwatọ etọn lẹ sọn mẹgbeyinyan Satani tọn mẹ.—Howhinwhẹn lẹ 18:10.