Bampeve ya imbi ke bangondi ya bantu!

Satana na bampeve ya imbi nandi ntangu yonso kele nkù mpi ya kigonsa. Ntama, Satana kufwãka bitwisi mpi bansadi ya Yobo ya vandaka kwikama. Na nima yandi fwãka bana kumi ya Yobo na kusadilaka “mupepe mosi ya ngolo” ya kubwisaka nzo yina bau vandaka muna na kati. Na nima, yandi bulaka Yobo na maladi ya “bivimbu na bivimbu nitu ya mvimba, kubanda na makulu tii na ntu.”​—⁠Yobo 1:​7-19; 2:⁠7.

Na bilumbu ya Yezu, bampeve ya imbi kitulaka bantu ba bàba mpi bafwi-meso. (Matai 9:​32, 33; 12:22) Bau vandaka kupesa muntu mosi mpasi yina vandaka kudilwadisa bamputa na matadi. (Malako 5:⁠5) Bau pesaka mpi mpasi na mwana bakala mosi yina vandaka tula byololo, kubwa na ntoto na maladi ya ntu mpi vandaka “kutuntuka mingi.”​—⁠Luka 9:⁠42.

 Satana na bampeve ya imbi ntangu yonso ke makasi, yempi dyaka kuluta makasi tuka bau kulamaka na zulu. Na ntoto ya mvimba, nkù na bau kemonana. Ikele na bantu ya bau kekumisa bambefo, bankaka bau kepesa bau mpasi na mpimpa, kukonda mpongi, to bandosi ya imbi kepesa boma, bankaka mpi dyaka bau kepesa bau bampasi na yina ketadila nitu ya kibakala mpi ya kintento mpi bankaka bau kepesa bau maladi ya kilau, kikalulu ya kufwa bantu to kudigonda.

Lintina, nkento ya nsi ya Suriname, ketuba nde matebo to mpeve ya imbi, kufwãka bantu 16 ya dibuta nandi mpi tungisaka yandi mosi, na kinsuni mpi na mabanza, na bamvula 18. Mutindu yandi kezaba mbotembote kisalu ya bampeve ya imbi yandi ketuba nde bampeve ya imbi “kezolaka kunyokula bantu ya ntu ngolo yina mebwa na maboko na bau tii na lufwa.”

Kansi Jéhovah lenda tanina bansadi nandi na mitambu ya Satana.​—⁠Bingana 18:⁠10.

[Bifwanisu ya kele na lutiti 11]

Ntama, bampeve ya imbi kumisaka bantu bambefo to belisaka bantu yankaka na maladi ya kutuntuka

[Bifwanisu ya kele na lutiti 12]

Bubu yai na bilumbu na beto, bampeve ya imbi kekumisa bantu makasi; bankaka, bau kepesa bau mpasi na mpimpa mpi kelalisa bau bandosi ya imbi