Satana novademone kwa kara nkenye apa narunye nonyanya nosiponga. Nare-nare Satana kwa dipagere yimuna novapika vaJoba gokuhuguvara. Yipo ga dipagere vana vaJoba murongo pokuninka asi “ekundungu,” li zonagure nzugo omu va kere. Konyima Satana “ta zuguma Joba masina gomadona morutu rwendi narunye.”—Joba 1:7-19; 2:7.

Momazuva gaJesus vademone ngava ninki vantu vamwe va kare yipuru-puru novatwiku. (Mateusa 9:32, 33; 12:22) Awo kwa hepekere mugara gumwe dogoro ta ligeragura mwene nomamanya. (Marukusa 5:5) Awo kwa ninkire hena mumati a kugagane, tadi mu gama, tadi mu “nyunga-nyunga” nokumugandera pevhu.—Rukasa 9:42.

Naina Satana novademone kuna kara ngororo netokomeno edipago  ngwendi pwanare. Yosili, eviyauko lyawo lyedona lina vhuka kutunda apa va va zuguma mo meguru. Nombudi dokutunda mwaza uzuni naunye kuna kugava umbangi wonyanya zawo. Awo kuna kuhepeka vantu vamwe nomauvera. Awo kusipangeda vamwe masiku pokudira kuvarangeka nompofu ndi kuvarotesa nonzodi dokutjilisa. Awo kuruganesa vamwe mepuko panonkwara. Ano vamwe awo kuvatwaredera ketanauko, edipago ndi elidipagonyamoge.

Lintina, ogu ga tunga moSuriname, ta simwitire asi mudemone ndi mpepo zondona, ga dipaga yilyo yekoro lyendi 16 nokumuhepeka parutu nomwenyo ure wonomumvho 18. Mokuyilimonena mwene ta tanta asi vademone awo “kuyihafera yokuhepeka vahepekwa vawo va hana kuhara dogoro va fe.”

Nye Jehova kuvhura kupopera vapika vendi komahomono gaSatana.—Yisewe 18:10.