Satani ni badimona kamita se ba bile ba ba situhu ni ba ba lubeta. Mwa nako ya kwa makalelo Satani n’a bulaile mitapi ni batanga ba Jobo ya n’a sepahala. Cwale a bulaya bana ba Jobo ba ba lishumi ka ku tahisa “moya wa liñungwa” ili ku wisa ndu mo ne ba inzi. Hamulaho wa fo Satani a nata Jobo ka “litombo ze maswe-maswe, ku zwa kwa mahatelo a mautu a hae, ku y’o fita ni fahal’a toho ya hae.”—Jobo 1:7-19 2:7.

Mwa lizazi la Jesu, badimona ne ba tisize kuli batu ba bañwi ba be limumu ni libofu. (Mateu 9:32, 33; 12:22) Ne ba nyandisize mutu yo muñwi ni ku tahisa kuli a ikolofaze ka macwe. (Mareka 5:5) Hape ne ba tahisize kuli mushimani a huwe, ku mu wiseza fafasi, ni ku “mu omeleza.”—Luka 9:42.

Kacenu, Satani ni badimona ba sa li ba ba lubeta hahulu. Ka buniti fela, musebezi wa bona o maswe se u ekezehile bakeñisa kuli ne ba lunduzwi kwa lihalimu. Lipiho ze zwelela mwa lifasi kamukana li fa bupaki bwa situhu sa bona. Ba nyandisa batu  ba bañwi ka matuku. Ba bañwi ba lwaniswa mwa nako ya busihu, ku ba tokwisa buloko kamba ku ba fa litolo ze maswe. Ba bañwi b’a lwaniswa kwa neku la tobali. Mi ba bañwi bona ba tiswa mwa bupulumuki, bubulai, kamba ku ipulaya.

Lintina, y’a pila mwa Suriname, u talusa kuli sidimona, kamba moya o maswe, ne si bulaile lilama za lubasi lwa hae ba 16 ni ku mu nyandisa kwa mubili ni kwa munahano ka lilimo ze 18. Ku zwelela ku seo n’a ipumani ku sona u talusa kuli badimona “ba fumana munyaka mwa ku nyandisa batu ba ba unjamwi ki bona nihaike kuli batu bao ha ba tabeli mane ku fita fa lifu.”

Kono Jehova wa kona ku sileleza batanga ba hae kwa litwaniso za Satani.—Liproverbia 18:10.