Andemoni Ajahanaña!
Satana niandemoni mpinji yejima ekala nawukatu nawa afwana. Mumpinji yakunyima, Satana wajahili ayimuna niambuña aYoba wakashinshi. Kufumahu wajahili anyana kaYoba ikumi kuhitila mukwilisha “mpepela yeneni” kulonda kukisañana itala mwadiña anyana. Kuhiñahu Satana wamukatishili Yoba “namahuti akata nankashi akufumisha kumadachilu ndo nimwishina damutu.”—Yoba 1:7-19; 2:7.
Mumafuku aYesu, andemoni elishili antu amakwawu kwikala atumama niamputamesu. (Matewu 9:32, 33; 12:22) Akabishiluhu muntu nakumwila yadisupoleña namalola. (Maku 5:5) Elishili cheñi kansi weyala kubilela, nakudinatola hamaseki ‘nakumukonyesha nankashi.’—Luka 9:42.
Hanyaka, andemoni aletesheli antu amakwawu kwikala nayikatu nikwilisha amakwawu kukonya
Makonu, Satana niandemoni hiyakwakujahana neyi chadiñawu hakusambila. Kafwampi, mudimu wawu watama waswejelaku kufuma tuhu hampinji yayinatiluwu kufuma mwiwulu. Nyijimbu yamukaayi kejima yahanaña wunsahu wawukatu wawu. Akabishaña antu amakwawu nayikatu. Amakwawu ayikabishaña nawufuku, kuyiletesha chisalala hela kuyilotesha chatama. Amakwawu ayikabishaña hakukeña kwila nawu wuvumbi. Amakwawu nawa ayizalwishaña, kuyijaha hela kuyileñela kudijaha aweni.
Andemoni makonu aleñelaña antu amakwawu kwikala akamadombu, nikuyiletesha chisalala, nikuyilotesha yilota yatama
Lintina, washakamaña muSuriname washimwini nindi, ndemoni hela spiritu watama wajahili antaña jindi 16 nakumukabakesha kumujimba nimuyitoñojoka hadi yaaka 18. Kwesekeja nayuma yahitilumu wahosheli nindi andemoni “atiyaña kuwaha kukabisha ampondu jawu abulaña kukeña kuyikabisha sampu anafwi.”
Ilaña Yehova nateli kukiña ambuñindi kukulukuka kwaSatana.—Yishimu 18:10.
