¡Yo demonio o sʼonrrajma ke pøtrji ntrʼee!
E Satanas i yo sʼonrrajma me na sʼonteji. Mi jingua e Satanas o mbøtrʼpꞹ kʼo in añimale ñe kʼo o mbɇpji e Job. Nakʼua o mbotrʼpꞹ kʼo dyechʼa in chʼii e Job o tsjaapꞹ ke ro e̱je̱ “dʼa trjanrrajma” i go na juakʼꞹ kʼe ngumꞹ nu ja mi ka̱ra̱ji. E Satanas o tsjapꞹ ro zødye e Job, “o tsjapꞹ ro pjⱥntrʼⱥ na punkjꞹ xa̱xa̱ kʼo me ma xajma, kʼo xa̱xa̱ mi kisʼi nrreze kja o ñiʼi jesta kja o nguaa”.(Job 1:7-19; 2:7.)
Ma e Jesús go mimi kja ne Xoñijomꞹ mi jingua, kʼo sʼoanxe mi kjapji dya ro jñaa kʼo ntee i mi kjapji ro ngoroji. (Mateo 9:32, 33; 12:22.) Go bʼꞹbʼꞹ dʼa bʼɇzo ke mi kjapji ro dyokꞹtse ko kʼo ndojo i me mi supjre. (Marcos 5:5.) Xo dʼa trʼii ke mi kjapji ro mapjꞹ mi pana ajomꞹ, i ‘me mi mbii ma jñus‘ꞹ na zezhi.’(Lucas 9:42.)
Mi jingua yo sʼoanxe o tsjaapji ro sodyeji na punkjꞹ ntee i go bʼꞹnkø go tsjapji me go mbiiji
Nudya e Uxua me na sʼonte nzakja mi jingua i me mⱥjⱥ ga mbøtrʼꞹ ntee. Mazi ga kjaayo ma go nrreze kja ne Xoñijomꞹ. Xi nge yo ri ⱥrⱥji I ri janrraji kja television me na sʼoo kʼo na kjogꞹ. Me kjapꞹ ra pɇsʼiji na punkjꞹ ngijeme janzi ntee. Bʼꞹnkø kjapꞹ dya søø ra i̱ji̱ i kjapꞹ ra nginchʼi kʼo na sʼoo. I bʼꞹnkø me tjorꞹji. I xi bʼꞹnkø kjapji ra nrru̱u̱tsʼeji i ñe kʼo pøtrʼꞹji.
Yo padya yo sʼonrrajma kjapji ke janzi ntee me ra sʼonteji; i kjapji ma xomꞹ ra su̱ji ma na kjinchiji
Lintina, kʼꞹ bʼꞹbʼꞹ a Surinam, mama ke dʼa demonio o sʼonrrajma o mbøtrʼꞹ 16 kʼo in bʼedyi i xo go tsjapꞹ ke me ro søxi i go yabʼꞹ akjanu 18 kjɇɇ. Angeze xo mama ke yo demonio “me mⱥpⱥji ga tsjaapji ra supjreji yo ntee zø kʼe ntee dya mi neekʼo.”
Yo ⱥtⱥ e Jehová, angeze søø ra mbøsꞹ ke dya pje søø ra tsjapꞹ yo demonio(Proverbios 18:10.)