ESatana ponga ni viwa vyakwe wakalala nkaninye swinya wawipa. Pa mpindi yino Job walinji mu nsi, e Satana wizile akoma awawomvi wa kwe Job ni vitekwa vyakwe. Apano wizile akoma awana wakwe wonsinye 10 pano walesile icimuuza cino cizile aciwongolola ing’anda yino walinjimo. Mu kulecelezya wizile amulwalika “amapuute umuwili wonsinye ukufumilila pa mutwe mpaka ku matamba.”​—Job 1:7-19; 2:7.

Pano Yesu walinji mu nsi, iviwa vyalenganga awantu wamwi ukuwa waciwulu ni ntonko. (Mateyu 9:32, 33; 12:22) Vyayimvizye umuntu wumwi ica kuti wayilembanga na mawe. (Marko 5:5) Swinya vyalenganga umulumendo alila nkaninye, vya muponyanga pa nsi, nu ‘kumuzangula nkaninye.’​—Luka 9:42.

 Na pe yonye impindi e Satana ni viwa vyakwe watwalilila ukukoma awantu. Swinya apano wacizilemo. Vino vikucitika mu nsi avino vikulanjizya ukuti iviwa vikacuzya sana awantu. Wamwi vikawalwalika, ukuwacuzya uwusiku ica kuti wakavilwa nu kuponecela. Ne wamwi vikawaletela iviloto iviwipe nkaninye. Wanji nawo vikawapa inyengwa imbipe. Wamwi vikawapenya, ukuwakoma ne wanji wakayinyonga.

E Lintina, wino akakwikala ku Suriname, walanzile ukuti, iciwa nanti icimuzimu iciwipe, camucuzizye pa myaka 18 swinya cakomile na walupwa lwakwe 16. E Lintina wasinincizizye ukuti “iviwa vikatemwa sana ukucuzya awantu mpaka ni mfwa.”

Lelo e Yehova wawa na maka ya kucinjilila awawomvi wakwe kwe Satana.​—Imilumbe 18:10.