Ta̱ Ndi̱va̱ʼa xíʼin na̱ ta̱chí ndi̱va̱ʼa xa̱a̱ nani tá xi̱naʼáví ndi̱va̱ʼaní-inina ta sáxo̱ʼvi̱nína na̱ yiví. Tá kúú tiempo xi̱naʼá ta̱ Ndi̱va̱ʼa xa̱ʼníra ndiʼi kití sa̱na̱ ta̱ Job ta saátu ndiʼi na̱ xi̱kachíñu nu̱úra. Tándi̱ʼi, kininí ka̱ni ta̱chí i̱xaara ta sa̱ndúvaña veʼe nu̱ú xi̱ndoo u̱xu̱ saá na̱ se̱ʼe ta̱ Job, ta ni̱xi̱ʼi̱ ndiʼivana. Ta ta̱xitura iin kue̱ʼe̱ ndaʼa̱ ta̱ Job chi ka̱na ndi̱ʼi táʼyi iníísaá ku̱ñura nda̱a̱ xa̱ʼa̱ra iinsaá nda̱a̱ xi̱níra (Job 1:7-19; 2:7).

Tá tiempo ña̱ ni̱xi̱yo ta̱ Jesús, ni̱xi̱yo sava na̱ yiví na̱ xi̱kiʼvi na̱ ta̱chí ndi̱va̱ʼa ini ta xa̱ʼa̱ ña̱yóʼo kǒo níkivi ka̱ʼa̱nna ta ni kǒo níkivi kotona (Mateo 9:​32, 33; 12:22). Ni̱xi̱yotu iin ta̱a ta̱ xi̱saxóʼvi̱nína ta xa̱ʼa̱ ña̱ xi̱kuumiíra na̱ ta̱chí ndi̱va̱ʼa nda̱a̱ xi̱xaʼndara miíra xíʼin yu̱u̱ (Marcos 5:5). Ta ni̱xi̱yotu iin ta̱ loʼo ta̱ ni̱ki̱ʼvi ña̱ ta̱chí ndi̱va̱ʼa ini ta xi̱kana kóʼóra xi̱ ixaaña, xi̱sakánara miíra nu̱ú ñuʼú ta xi̱xiʼi̱ yi̱ʼíra xi̱ ixaaña (Lucas 9:42).

Ta̱ Ndi̱va̱ʼa xíʼin na̱ ta̱chí ndi̱va̱ʼa ndákundeéna kéʼéna nda̱a̱ táki̱ʼva xi̱keʼéna tá xi̱naʼá chi xáʼnína ku̱a̱ʼání na̱ yiví. Ta tá ta̱vánana chí ndiví ta chi̱ndaʼánana va̱xina nu̱ú ñuʼú yóʼo kininíka ki̱xáʼa kéʼéna. Nu̱ú iníísaá ñuyǐví káʼa̱nna xa̱ʼa̱ na̱ ta̱chí ndi̱va̱ʼa ña̱ ndi̱va̱ʼaní-inina. Ku̱a̱ʼání kue̱ʼe̱ kíʼin sava na̱ yiví íxaana, ta savatuna kǒo táxina ku̱su̱nna chi kininí sáxa̱nínana ta savatuna nda̱a̱ kísi̱na xíʼinna ña̱ keʼéna ña̱ kini xíʼinna. Á sásanatuna inkana, á chíka̱a̱na xi̱nína ña̱ kaʼnína inka na̱ yiví á ña̱ kaʼnína miína.

Ñá Lintina ñá íyo chí Surinam, káʼa̱nñá ña̱ iin ta̱chí ndi̱va̱ʼa xa̱ʼní 16 na̱ veʼeñá ta 18 ku̱i̱ya̱ sa̱xóʼvi̱níñañá chi ki̱ʼin kue̱ʼe̱ miíñá i̱xaaña ta saátu xi̱ndi̱ʼi̱ní-iniñá ta xi̱yiʼvíníñá. Xa̱ʼa̱ ña̱ ndo̱ʼoñá xíʼin na̱ ta̱chí ndi̱va̱ʼa, ñá Lintina káʼa̱nñá xa̱ʼa̱na “ña̱ kútóonína sáxo̱ʼvi̱na na̱ yiví nda̱a̱ kaʼnínana”.

Soo Jehová ndáavara na̱ ndásakáʼnu miíra nu̱ú ndiʼi ña̱ kúni̱ ta̱ Ndi̱va̱ʼa keʼéra xíʼinna (Proverbios 18:10).