Satanás uan amo kuali ajakamej tlauel mosisiniaj uan kichiuaj tlen amo kuali. Uejkajkia, Satanás kichijki ma mikikaj itlapialjuaj uan itekipanojkauaj Job. Uan teipa kichijki ma mikikaj matlakmej ikoneuaj Job ika “se ajakatl tlen tlauel chikauak” tlen kixolejki nopa kali kampa itstoyaj. Teipa Satanás kichijki ma mokoko Job “tlen itsonteko hasta iikxitla ika se sauakokolistli tlen tlauel fiero” (Job 1:7-19; 2:7).

Kema Jesús itstoya ipan Tlaltipaktli, amo kuali ajakamej kichiuayayaj maseualmej amo ma kamanaltikaj uan amo ma tlachiakaj (Mateo 9:​32, 33; 12:22). Itstoya se tlakatl katli amo kuali ajakamej tlauel kitlaijiyouiltiyayaj uan kichiuayayaj iselti ma mokoko ika tetl (Marcos 5:5). Nojkia, itstoya se telpokatl katli kikuatsajtsiltiyayaj, kichiuayayaj ma momajkaua tlalchi uan nojkia kichiuayayaj chikauak ma uiuipika (Lucas 9:42).

Ipan ni tonali, Satanás uan amo kuali ajakamej nojkia tlauel temiktiaj kej uejkajkia. Nojua tlauel kiampa kichijkej kema kinualkuamajkajkej ipan Tlaltipaktli. Kampa ueli kiijtouaj kichiuaj tlen amo kuali. Kichiuaj tlauel miakej maseualmej ma mokokokaj, amo kinkauiliaj ma kochikaj ika tlayoua o kichiuaj ma kitemikikaj tlen tlauel amo kuali. Sekij kinchiuiliaj tlen amo kinamiki, kichiuaj ma uiuitikaj, ma temiktikaj o ma momiktikaj.

Lintina, katli itstok Surinam, kiijtoua se amo kuali ajakatl kinmiktik 16 iuikaljuaj uan nojkia tlauel kitlaijiyouiltik ya 18 xiuitl. Ika tlen kipanok kiijtoua “amo kuali ajakamej kinpaktia kintlaijiyouiltisej maseualmej uan kiampa kichiuasej ma mikikaj”.

Maske kiampa kichiuaj, Jehová uelis kinmanauis itekipanojkauaj tlen nopa tlamantli (Proverbios 18:10).