USathane lamadimoni balolunya njalo bayingozi. Esikhathini esadlulayo, uSathane wabulala imfuyo lezisebenzi zikaJobe owayethembekile. Wasebulala labantwana bakaJobe abalitshumi ngokwenza ukuthi kube ‘lesivunguzane’ ukuze sibhidlize indlu ababekiyo. Ngemva kwalokho, uSathane wathela uJobe “izilonda ezibuhlungu kusukela ngaphansi kufika esicholo sekhanda lakhe.”​—Jobe 1:7-19; 2:7.

Ngesikhathi uJesu esemhlabeni, amadimoni enza abanye abantu baba yizimungulu njalo abanye abenza iziphofu. (Mathewu 9:32, 33; 12:22) Ahlukuluza enye indoda, ayenza yazisika ngamatshe. (Makho 5:5) Enza futhi umfana othize waklabalala, ‘ambhuqa phansi ebhinqika.’​—Lukha 9:42.

 Lamuhla, uSathane lamadimoni babulala kakhulu ukudlula kudala. Iqiniso liyikuthi imisebenzi yabo emibi isiyengezelelekile kusukela baxotshwa ezulwini. Okwenzakala emhlabeni wonke kutshengisa isihluku sabo. Bagulisa abanye abantu. Abanye babahlukuluza ebusuku, bebenza baswele ubuthongo loba babenze babe lamaphupho ayesabisayo. Abanye babahlukuluza ngezemacansini. Abanye babenza bagule ingqondo, babenze babulale abanye kumbe babenze bazibulale.

ULintina ohlala e-Suriname, uthi idimoni kumbe umoya omubi wabulala abemuli yakhe abangu-16 njalo lamhlukuluza emzimbeni lasengqondweni okweminyaka engu-18. Ngenxa yalokho adlula kikho, uthi amadimoni “ayakuthanda ukuhlukuluza abantu abangafuniyo baze bafe.”

Kodwa uJehova uyenelisa ukuvikela izinceku zakhe ekuhlaselweni nguSathane.​—Zaga 18:10.