Ko Satani mo e tau temoni kua vale kelea tumau ni mo e hagahaga kelea lahi. Ko e tau vahā fakamua ne kelipopo e Satani e tau fuifui manu mo e tau lagomatai he tagata tua ko Iopu. Ko e taha mena foki, ne kelipopo e ia e tau fanau tokohogofulu ha Iopu ha kua fakatupu e ia e “matagi lahi” ke moumou e fale ne nonofo ai a lautolu. Mole atu e mena ia ne ta e Satani a Iopu ke he “gagao fufula kelea, ne kamata mai he tau aloalohui hana, ti hoko atu ke he hana tumuaki ulu.”—Iopu 1:7-19; 2:7.

Ko e vahā ia Iesu, ne fakakuhukuhu mo e fakamatapouli he tau temoni e falu a tagata. (Mataio 9:32, 33; 12:22) Ne fakakikiveka e lautolu e taha tagata mo e taute a ia ke helehele aki ni e ia e tau maka a ia. (Mareko 5:5) Ne fakatupu foki e lautolu ke he taha tama taane ke hea fakatutū, mo e palu hifo a ia ke he kelekele, mo e “fakafitikeleu ai.”—Luka 9:42.

 Ko e vahā nei, ko Satani mo e tau temoni ko e tau kelipopo tagata agaia ni tali mai. Ka e mooli, ko e gahua agaaga kelea ha lautolu kua tupu lahi tali mai he tolo hifo a lautolu mai he lagi. Ko e tau hokotaki mai he lalolagi kua fakamooli aki ha lautolu a mahani vale. Kua fakamalaia e lautolu e falu tagata ke he tau gagao. Ko e falu ne fakataomia e lautolu ka po, kua nakai maeke a lautolu ke momohe po ke fakatupu ki a lautolu e tau miti fakamatakutaku. Ko e falu ne fakaaoga fakahēhē e lautolu ke he mahani feuaki. Ka ko e falu kua toho agaia e lautolu ke heketia, kelipopo tagata, po ke taupega.

Ko Lintina, ne nofo i Suriname, kua talahau e ia hagaao ke he temoni, po ke agaaga kelea, ne kelipopo ai toko 16 e tagata he magafaoa haana mo e fakakikiveka a ia he tino mo e haana manamanatuaga ke he 18 e tau tau. Mai he logona e mena ne tupu ki a ia ne talahau e ia ko e tau temoni ne “fiafia lahi ke fakamamahi ha lautolu a tau tagata totoko ke hoko ke he mate.”

Ka kua maeke ia Iehova ke puipui haana tau fekafekau mai he tau lagatau ha Satani.—Fakatai 18:10.