Satanaswan demoniokunaqa llumpay mana allin ruwaqllañam kanku. Satanasqa ñawpaq tiempopim Job sutiyuq runata llumpa-llumpayta ñakarichirqa. Animalninkunatawan serviqninkunatam wañurachirqa. Churinkunatapas paykunapa kasqan wasita llumpa-llumpay wayrawan tuñirachispanmi wañurachirqa. Satanasqa kikin Jobtapas chaki pampanmanta uma puyuqninkamam chupu unquywan hapirachirqa (Job 1:7-19; 2:7).

Jesuspa tiemponpipas demoniokunaqa hinallam runakunata ñakarichirqa ñawsayachispan, upayachispan (Mateo 9: 32, 33; 12:22). Huk musutapas locoyarachirqakum, chaymi payqa rumikunawan aychanta kuchukuq (Marcos 5:5). Huk musupas ñakarichiptinkum llumpayta qaparispan hinaspa katkatataspan pampaman wichiykuq (Lucas 9:42).

 Hanaq pachamanta wischurachikamusqankumantapacham satanaswan demoniokunaqa astawanraq enteron pachapi runakunata ñakarichichkanku. Wakin runakunataqa muspachispankum mana puñuchinkuchu, wakintañataqmi tukuyta ruwanku, wakinkunatañataqmi locoyachinku. Hukkunatañataqmi tanqanku runakunata wañuchinankupaq, utaq kikillanku sipikunankupaq.

Lintina sutiyuq warmim willakun 16 ayllunkunata demoniokuna wañurachisqanmanta. Willakuntaqmi 18 watapuni paytapas ñakarichisqanta. Paymi nin: “Demoniokunaqa runakunatam ñakarichinku wañuchinankukama”, nispa.

Jehova Diosqa serviqninkunatam satanasmanta amparawanchik (Proverbios 18:10).