Satanaspas supayninkunapas sinchi millaymi kanku. Ñaupa tiempopin Satanasqa Jobpa chunkantin wawankunata, uywankunata, kamachinkunatapas wañuchirqan. Jobtapas “sinchi millay ch’upu onqoywan tukuchirqan. Chay onqoyqa chaki puntanmanta uma patankaman jap’irqan” (Job 1:7-19; 2:7).

Jesuspa tiemponpipas supaykunaqa runakunatan mana rimariqman ñausaman ima tukuchirqan (Mateo 9:32, 33; 12:22). Supaykunaqa juj runatapas ñak’arichirqankun rumikunawan imaraqmi cuerpontapas kuchuchiqku (Marcos 5:5). Chaymantapas juj waynachatan ataquewan jap’ichiqku (Lucas 9:42).

Kay tiemponchispipas Satanasqa supaykunantinmi runa wañuchiq kanku. Janaq pachamanta wijch’uchikamusqankumantapachan astawanraq millaykunata ruwashanku. Wakin  runakunataqa onqoykunawanmi jap’ichinku, wakin runakunatataq millayta mosqochinku otaq mana puñuchinkuchu. Chaymantapas wakin runakunatan violanku, locoman tukuchinku, wañuchikunankupaq yuyaychanku otaq jujkunata wañuchinankupaq.

Surinam llaqtamanta Lintina sutiyoqmi willakun: “Supaymi chunka soqtayoq runakunata familiaymanta wañuchirqan, noqatapas chunka pusaqniyoq watakunan sinchita ñak’arichiwarqan. Chaymantapas supaykunaqa runakunatan nishuta ñak’arichinku wañuchinankukamaraq”, nispa.

Ichaqa Jehová Diosmi Satanasmanta supayninkunamantapas serviqninkunata pakaykun (Proverbios 18:10).