Ua sauā pea ma matautia Satani ma ana temoni. I taimi anamua, na faamamateina ai ma fasiotia e Satani lafumanu ma auauna a le tagata amiotonu o Iopu. Ona ia fasiotia lea o fanau e toasefulu a Iopu e ala i lona faapogaia o se “matagi tetele” e faaleagaina ai le fale sa latou iai i totonu. Ina ua mavae lena ona taia lea e Satani o Iopu i le “maʻi papala leaga, e gata ae i ona alofivae, e gata ifo i lona tumuai.”​—Iopu 1:7-19; 2:7.

I taimi o Iesu, sa faaguguina ai ma faatauasoina e temoni nisi tagata. (Mataio 9:32, 33; 12:22) Sa latou faataugaina le tasi tamaloa ma na faamafua ai ona ia selei ia te ia i maa. (Mareko 5:5) Sa latou faapogaia foi se tamaitiiti ina ia tuualaga atu, lafotu ia te ia i le eleele, ma “faatafiti ma le faasaua ia te ia.”​—Luka 9:42, NW.

 Ua sili le fasioti tagata o Satani ma ana temoni i aso nei na i lo se isi taimi. O le mea moni, ua faateleina a latou faiga leaga talu ona lafo mai i latou mai le lagi. O lipoti ua faamatalaina mai i le lalolagi, ua faamaonia ai lo latou matuā sauā tele. Ua latou faamalaiaina nisi i maʻi. Ua latou faasaua i isi i taimi o le po, ua faapogaia ai ona lē momoe i latou, po o lo latou tuuina i ai o ni miti matautia. Ua latou faaleagaina isi i ni faiga faaleituaiga. Ae o isi ua latou faapogaia, ina ia faaleagaina o latou mafaufau, pe avea ma ē e fasioti tagata, po o le oo lava foi ina pule i le ola.

Ua taʻua e Lintina, o lē e nofo i Suriname e faapea, o se temoni po o se agaga leaga na fasiotia tagata e toʻa 16 o lona aiga, ma faapuapuagatiaina lona tino ma lona mafaufau mo le 18 tausaga. I le faamatalaina e se tasi o lē na oo moni lava i ai nei mea, na faapea mai o ia, e fiafia tele temoni e “faapuapuagatia i tagata e lē gauai atu o loo faia i ai ana faiga seia oo lava ina feoti i latou.”

Peitai ane ua mafai e Ieova ona puipuia ona tagata mai osofaiga a Satani.​—Faataoto 18:10.