Hogihatima nöö Saatan ku dee taku jeje dë u de kaa. A fesiten Saatan bi kii dee mbeti ku dee futuboi u Jöpu, wan bumbuu womi di bi ta hoi ënseei a Gadu. Hën a mbei „wan gaan ventu” ko booko di wosu teka dee teni mii u Jöpu bi dë, kii hii de tuu fiaa. Baka di dë Saatan mbei „taku boi kisi Jöpu, kumutu nëën basufutu tee nëën mindihedi”.​—Jöpu 1:7-19; 2:7.

A di ten Jesosi bi dë a goonliba dee taku jeje bi ta mbei so sëmbë ko tapabukama nasö bookowojoma (Mateosi 9:32, 33; 12:22). De bi ta tjötjö wan womi, söseei de bi ta mbei a ta koti ënseei ku sitonu pisi hii ën sinkii (Maikusi 5:5). Söseei de bi ta mbei wan womi mii ta bai ta kai logologo wolo ta tuwëën a goon „dobëën buta kakakaa”.​—Lukasi 9:42.

A di ten aki Saatan ku dee taku jeje ta kii gaan hia sëmbë jeti. Te i luku ën bunu, de ko ta du möön hogi soni sensi di de vinde de puu a Gadu Köndë ala.  Dee njunsu dee u ta jei a hii së u goonliba ta lei tuutuu fa Saatan ku dee taku jeje a’ hogihati tjika. De ta pena so sëmbë ku siki. Wotowan de ta toobi a ndeti sö tee taa de an sa duumi, söseei de ta mbei de sunjan hogi. Dee taku jeje ta kisi mujëë tu. So juu de ta mbei sëmbë siki a hedi, nasö de ta mbei sëmbë kii wotowan. Söseei dee taku jeje ta mbei sëmbë kii deseei tu.

Lintina di bi ta libi a Saanaköndë ta konda fa wan taku jeje bi kii 16 sëmbë fëën mama bëë. A konda söseei taa di taku jeje tjötjö ën 18 jaa longi ta du ku ën tee taa a ko hebi dëën u tja. Dee soni dee taku jeje du ku di mujëë aki, mbei a taki taa dee taku jeje „lobi te de abi sëmbë a de basu ta sitaafu u te de koti de böö”.

Ma Jehovah sa tjubi dee futuboi fëën u Saatan an du hogi ku de.​—Nöngö 18:10.