Anju aat sira mak ohodór!
Diabu Satanás ho ninia anju aat sira laran-aat tebes no sempre haterus ema. Iha tempu uluk, Satanás haterus ema ida neʼebé fiar metin ba Maromak, naran Job, hodi oho ninia animál no atan sira. Tuirmai, Satanás oho Job nia oan naʼin-sanulu hodi halo anin huu makaʼas toʼo estraga uma neʼebé ninia oan sira halibur hamutuk. Depois neʼe, nia mós haterus Job hodi hamosu “fisur aat barak husi ain toʼo ulun”.—Jó (Ayub) 1:7-19; 2:7.
Iha Jesus nia tempu, anju aat sira haterus ema balu hodi halo sira sai monok no matan-delek. (Mateus 9:32, 33; 12:22) Anju aat sira mós haterus mane ida hodi halo nia hakanek ninia an rasik ho fatuk. (Marcos 5:5) No mós sira domina labarik-mane ida hodi halo nia hakilar, soe nia an ba rai, no “doko nia makaʼas”.—Lucas 9:42.
Iha tempu uluk, anju aat sira halo ema balu sai moras no domina ema hodi doko makaʼas sira
Toʼo ohin loron, Diabu Satanás ho ninia anju aat sira kontinua oho ema. Liuliu sira-nia hahalok sai aat liután bainhira sira soe tun tiha ba rai. Tuir relatóriu iha mundu tomak hatudu katak sira aat duni, porezemplu, fó-malisan ba ema balu hodi halo sira kona moras, halo ema la bele toba iha kalan hodi haterus sira ka fó mehi aat. Anju aat seluk tan mós abuza ema iha dalan seksuál, halo ema sai bulak, ohodór no book ema atu oho an.
Anju aat sira ohin loron mós book ema balu atu halo violénsia makaʼas. Sira mós haterus ema iha kalan no fó mehi aat
Feto ida iha rai-Suriname iha Amérika Súl, naran Lintina, haktuir katak anju aat ida oho ninia família naʼin-16 no fó-terus ba ninia isin no neon durante tinan 18 nia laran. Husi esperiénsia neʼebé nia rasik hasoru, nia hatete katak anju aat sira “gosta tebes atu fó-terus ba sira-nia vítima toʼo mate”.
Maibé, Maromak Jeová iha forsa boot liu atubele proteje ninia atan husi Satanás ho ninia anju aat sira.—Provérbios (Amsal) 18:10.
