So Satanás qataq na demoniopi yiloxoicpi qataq chaqaic na mayepi. Coʼolloxochiye so Satanás ỹalauat so lalopi so soxoraic Job qataq som l-latacpi so maye. Qataq so maye ỹahuoʼo ra “anac so lʼat” ltaraic ra nlaxajñe so noỹiic nache ỹalauat so diez llalacpi so Job. Nache taqaʼen so Satanás namaxañe ra ỹoʼot ra qaica ca ʼenaʼam so lalolaxa so Job, nache ỹataqta imattalec na ʼenauac na lʼoc taqaʼen iviralo na “lchil qataq na lqaic” (Job 1:7-19; 2:7).

Coʼolloxochiye so Jesús netaña ana aʼlhua, huoʼo so demoniopi saỹashenem ra qaica caua lʼaqtaqa qataq sanauaañe naqaʼen ỹauotaʼa na shiỹaxauapi (Mateo 9:32, 33; 12:22). Huoʼo so shiỹaxaua taqaʼen ỹaguec saqaỹalemaxat nache so maye ipelectaq na lʼoc ỹauotaʼa so comaʼ (Marcos 5:5). Taqaʼen huoʼo som nsoqolec ra huoʼo so lʼec leguemaxaic qaỹauotaʼac ra nalaqtapiguiñe, nache nqocatapiguiñe qataq recopchetaq (Lucas 9:42).

So Satanás qataq na demoniopi nache ʼeetai ra laataxanaxaicpi, chigoqtaʼa coʼollaxa qaỹolrauec ye piguem, nagui ỹataqta inquiguec ra layeloxo. Qalota na shiỹaxauapi iaʼaxatac ra ỹataqta yiloxoic  na demoniopi. Nlaxalec naqaʼen na nquejnaxac na shiỹaxauapi qataq huoʼo ra saỹochaqchet ra pe qataq ỹoʼot ra qauem na lchoxonaxac. Qataq ỹiʼenai huotaique ra hueguet ñi shiỹaxaua. Taq huotaique ra iloʼoquen, taq ra raʼalataxan qoʼ nalajlat.

Huoʼo ye aʼlhua lʼenaxat Surinam, lmaʼ coʼollaxa aso ʼalo lʼenaxat Lintina, aso maye iaʼaxat na demoniopi ỹalauat so 16 so lauoʼlʼecpi so maye qataq saqaỹalemaxat qataq qaỹauotaʼa qauem ra lcueinnataxac taq huoʼo ra qaiuaxan. Nache so viʼi 18 saqaỹalemaxat aso maye. Nache aso iaʼaxatac so lcueinnataxac so maye ʼenapec ra lʼaqtac: “Na demoniopi lauela ra saỹasagueren ñi shiỹaxaua qataq ra ỹiʼenac nache huotaique ra ỹalauat”.

Qalaxaye Ñi Jehová ishet ra qomiʼ mʼpaxaleguete ra, so Satanás huotaique ra huoʼo ca ʼeeteque qomiʼ (Salmo 91:14, 15).