Sathane ni madhemoni va na ni litsoro nigu khandri vadi. Sathane songide sifuyo ni sithumi sa Joba muthu nyo tumbege. Khu gu landreya a di songa likhumi sanana sa Joba khu “phuvbo nya yikhongolo” eyi yi nga tshungunula nyumba si nga ba si romo umo. Khu hwane nya isoso Sathane a di tshanisa Joba khu “madwali nya sithunya nya guvbise, gu khugela mawundruni kala hungoni.” — Joba 1:7-19; 2:7.

Matshiguni ya Jesu, madhemoni ma khadziside sidudu ni sikhumu vathu nyo khaguri. (Matewu 9:32, 33; 12:22) Matshaniside mwama moyo ma bwe ma gira gu mwama yoyo a dzi bayiseya abune khu siwindri. (Marko 5:5) Ma giride gambe gu gikhwathana gimwegyo gi wombeteya dzihuwa, ma gi puluwundriseya ma bwe ma gi “dzudza khu tshivba ni tshivba ma gi thesa vbavbatshi.” — Luka 9:42.

 Matshigwanaya, Sathane ni madhemoni sighevenga guvbindra gale. Mithumo yawe nya guvivbe ya guya yi engedzeya gukhugeya tepo va nga tutumiswa ndzadzini. Mibiko ya mafuni gwatshavbo ya gu yeyedza litsoro li gu na ni madhemoni. Ayo ma gu saseya vambe vathu khu madwali. Vambe va gu tshaniswa khayo wutshigu, ma va hamugisa ligovbe mwendro gu va loriseya silo nya gu thise. Vambe ma gu va tshanisa khu gu hengeya nawo malawu. Vambe va gu handrugiswa khayo, ma va khadzisa sighevenga ambari gu va gira va tshwedza.

Lintina, a khalago Suriname, a di tshamuseya gu khuye lidhemoni nyo khaguri, mwendro liphuvbo nya gu guvivbe, li songide 16 valongo vaye li bwe li mu tshanisa givilini ni mapimoni khu gipimo nya 18 myaga. A si wonide khu abune gu khuye madhemoni “mo tsakiswa khu gu tshanisa vathu, kala vafa.”

Ganiolu Jehovha a ngu kodza gu vhikeya sithumi saye avba nya dzitshanisa dza Sathane. — Mavingu 18:10.