Kwambira kale, Satana na viŵanda vyake ŵaŵa ŵakari na ŵankaza. Mu nyengo yakale, Satana wakakoma viŵeto na ŵateŵeti ŵa Yobu, muntu wakugomezgeka. Satana wakakomaso ŵana khumi ŵa Yobu apo wakacitiska “mpepo yikuru” kubwangandura nyumba iyo mukaŵa ŵana. Pamanyuma pakuti wacita ici, Satana wakamupa Yobu “mapumba ghakuŵinya kwamba ku marundi kusi kuzakafika na pa mutu pacanya.”—Yobu 1:7-19; 2:7.

Mu nyengo ya Yesu, viŵanda vikacitiska ŵantu ŵanyake kukhala ŵambuwu na ŵaciburumutira. (Mateyu 9:32, 33; 12:22) Viŵanda vikatombozga muntu munyake na kumupangiska kuti wajitimbe na malibwe. (Marko 5:5) Vikacitiskaso msepuka munyake kupoma vyongo, ndipo vikamuwiskira pasi na “kumuziririska comene.”—Luka 9:42.

 Lero, Satana na viŵanda vyake ŵahaŵa comene nkanira kuruska kale. Comene-comene milimo yawo yahenipirathu kwambira apo ŵakapondomoskeka kucanya. Vyakucitika pacaru cose capasi vikurongora uheni wa milimo yawo. Iwo ŵakurwariska ŵantu. Ŵakusuzgaso ŵantu usiku, kuŵatondeska kugona panji kuŵaloteska maloto ghakofya. Ŵakunyengaso ŵantu kucita uzaghali. Ŵakucitiskaso ŵantu ŵanyake kufunta, kukoma ŵanyawo, na kujikoma ŵekha.

Lintina, uyo wakukhala ku Suriname, wakayowoya kuti viŵanda, panji mizimu yiheni, vili kukoma ŵabali ŵake 16 ŵa pa mbumba yake ndipo vikamutombozga kwa vyaka 18. Kuyana na umo wakawonera, iye wakati viŵanda “vikukondwa para vikusuzga na kukoma ŵantu awo ŵakuvitinka.”

Nanga viŵe ntena, kweni Yehova wakuthaska ŵateŵeti ŵake para Satana waŵawukira.—Zintharika 18:10.