E amio fakasauā faeloa kae fakama‵taku foki a Satani mo te kau temoni. I aso mua ne tamate ne Satani a manu mo tavini a te tagata fakamaoni ko Iopu. Kae ne tamate foki ne ia a tama‵liki e toko 10 a Iopu me ne fai ne ia “se kautaufa” ke fakamaofa ei te fale ne ‵nofo latou i ei. Kae fakamuli ifo ne fakaoko atu ne Satani ki a Iopu se masaki “ke fonu tena foitino i mea pala.”—Iopu 1:7-19; 2:7.

I aso o Iesu, ne fai ne temoni a nisi tino ke gūgū kae ‵kivi foki. (Mataio 9:32, 33; 12:22) Ne fakalogo‵mae ne latou se tagata e tokotasi kae ne fai ne latou a ia ke selesele tena foitino ki fatu. (Maleko 5:5) Ne fai foki ne latou se tamaliki tagata ke pakalaga ki luga, ne fakasiga a ia ki lalo i te laukele, kae ne fai foki a ia “ke fakavalevale.”—Luka 9:42.

I aso nei, koi tumau eiloa a uiga tatino o Satani mo te kau temoni. A te tonuga loa, ko tai momea aka te uke o olotou amioga matagā talu mai te taimi ne ‵pei ifo ei latou mai i te lagi. A lipoti mai i kogā koga kese‵kese o te lalolagi e molimau mai e uiga ki olotou amioga  fakasauā. E fakaoko atu ne latou a masaki ki tino. E fakalavelave atu latou ki nisi tino i po, e fai latou ke se ‵moe io me e fai foki ke moe‵miti latou ki mea fakama‵taku. Kae e manea‵nea foki ne latou a nisi tino. Kae ko nisi tino e fai ne latou ke fakavale‵vale, ke ‵tatino, io me ke faka‵mate.

E fai mai a Linitina, telā e nofo i Suriname, me ne tamate ne se temoni, io me se agaga masei, a tino e toko 16 o tena kāiga kae ne fakalogo‵mae atu foki ki a ia i te feitu faka-te-foitino mo te feitu faka-te-mafaufau i tausaga e 18. Ona ko mea kolā ne ‵tupu ki a ia e fai mai a ia me i te kau temoni “e fia‵fia o fakasauā atu ki tino fakaa‵lofa kolā e se loto ma‵lie ki a latou ke oko eiloa ki te taimi ko ‵mate ei latou.”

Kae e mafai ne Ieova o puipui ne ia ana tavini mai i osomaiga a Satani.—Faataoto 18:10.