Эрлик болгаш ооң аза-буктары кезээде каржы болгаш айыылдыг чораан. Бурунгу үеде Эрлик Иов дээр шынчы кижиниң мал-маганын болгаш чалчаларын узуткап каапкан. Оон Иовтуң ажы-төлүнүң чыглып алгаш турган бажыңы буступ каар кылдыр, коргунчуг шуурган чоргузупкан. Ооң хайындан Иовтуң он ажы-төлү өлүп калган. Ооң соонда Эрлик Иовка «таваңгайындан эгелээш, тейинге чедир коргунчуг оюлганнар чыпшырып каан» (Иов 1:7—19; 2:7).

Иисустуң үезинде буктар кижилерни согурартып, үн чок кылып турган (Матфей 9:32, 33; 12:22). Олар бир эр кижини боду бодун даштар-биле согар кылдыр албадап, аажок хинчектеп турган (Марк 5:5). А бир элээди оолду алгыртып, «черже ойтур октааш, курулдуруп» турган (Лука 9:42).

Амгы үеде Эрлик болгаш ооң аза-буктары каржы хевээр. Дээрден дүжүр октатканындан бээр оларның каржы херектери улам көвүдээн. Бүгү делегейден медээлер оларның кайы хире кээргел чогун көргүзүп турар. Чамдык улусту аартып, өскелерни дүнелерде коргудуп азы удутпайн турар. А өске улусту эр-кыс харылзаа кылырынче хайныктырып турар. Олар улустуң угаанын сээдеңнедип, өлүрүүшкүнче азы амы-тынынга четтинеринче ыдалап турар.

Суринамда чурттап чоруур Линтинаның чугаазындан алырга, каржы бук ооң өг-бүлезинде 16 кижини өлүрген, а ооң мага-бодун база угаан-сагыжын 18 чыл ишти хинчектеп келген. Кара күштер «камгалал чок улусту өлүрүнге чедир хинчектээш, амырап турар» деп, Линтина боду шынзыккан.

Ынчалза-даа Иегова бараалгакчыларын Эрликтиң халдаашкыннарындан камгалаар күштүг (Чугаалар 18:11).