Seexaanaynne daydanttati ubbato meqetti baynnageetanne daafaa ehiyaageeta gididi deˈ-idosona. Beni wode Seexaanay, ammanettiyaa Iyyooba mehiyaanne ashkkarata woriis. Kaallidi “wolqqaama gotiyaa” denttidi tammu Iyyooba naati deˈiyo keettay kunddanaadan oottidi eta woriis. Hegaappe simmidi Seexaanay Iyyooba “tohuwaappe huuphiyaa gakkanaassi iita masunttai a bolli kiyanaadan oottiis.”—Iyyooba 1:7-19; 2:7.

Yesuusi saˈan deˈiyo wodekka, daydanttati issi issi asaa duudenne qooqe gidanaadan oottidosona. (Maatiyoosa 9:32, 33; 12:22) Eti issi bitaniyaa ba bolla shuchchan gaarana mala oottidi barchchiyaa bessidosona. (Marqqoosa 5:5) Eti issi naˈakka boroodanaadan, saˈan kunddanaadaninne “kokkoranaadan” oottidosona.—Luqaasa 9:42.

Nu wodiyan, Seexaanaynne daydanttati ay wodeppekka aattidi shemppo woriyaageeta. Saluwaappe olettoosappe haa simmin, eta iita oosoy dari dari biidoogee beettiyaaba. Alamiyaa yuushshuwan hanettiidi deˈiyaaba beˈiyoogeenne siyiyoogee eta iitatetta qonccissees. Issi issi asaa harggiyan keehi qohoosona. Haraata qassi qamman xiskkuwa xayanaadan woy yashshiya aymuwaa aymottanaadan oottiyoogan unˈˈettoosona. Haraatu bolli mattuma qohuwaa gattoosona. Haraata qassi gooyanaadan, banttana banttarkka woy hara asa woranaadan oottoosona.

Surinaame giyo biittan deˈiya Linttina, daydanttati woykko tuna ayyaanati i soo asaappe 16ta woridoogaanne 18 layttaayyo i bollaaninne guuggiyaan wolqqaama barchchiyaa gattoogaa yootausu. Banan gakkidabaappe, daydanttati “banttayyo eeno geenna asaa hayqqana gakkanaashin barchchiyaa bessiyoogan ufaytoosona” yaagausu.

SHin Yihooway ba aylleta Seexaanaa qohuwaappe naagana danddayees.—Leemiso 18:10