Satana ni yiŵanda ndaŵi syosope yikusiyatendela ŵandu yindu yangasa soni yakogoya. Ndaŵi jine munyumamu Satana jwawuleje yilango soni ŵamasengo ŵa mundu jwakulupichika, Yobu. Kaneko Satana jwawuleje ŵanache 10 ŵa Yobu mwakutendekasya “mbungo jamachili” konanga nyumba jiŵatemi ŵanachewo. Pambesi pakwe, Satana ŵamlagasisye Yobu mwakumlwalikasya ni “yilonda yakogoya pa chilu chosope.”—Yobu 1:7-19; 2:7.

Mundaŵi ja Yesu yiŵanda yatendekasyaga ŵandu kuŵa ŵangaŵecheta soni ŵangalola. (Mateyu 9:32, 33; 12:22) Ndaŵi jine yiŵanda yamlwalikasisye mundu jwine mwamti jwatamaga m’matumbi ni kuliwulasyaga ni maganga. (Maliko 5:5) Ndaŵi jine yiŵanda yamtendekasisye mnyamata jwine kuti agumileje soni yamgwichisyaga pasi ni ‘kumgalagatisyaga mwamachili.’—Luka 9:42.

Lelojisoni, Satana soni yiŵanda yikuwulaga ŵandu ŵajinji kupunda kalakose. Yili myoyo ligongo lyakuti paŵayitopwele kwinani yatandite kutendekasya yakusawusya yejinji pachilambo chapasi. Ngani syakulekanganalekangana syatukusapikana pachilambopa sikusasimichisya kuti jemanjaji ali ŵangasa. Satana soni yiŵanda yikusiyatendekasya ŵandu ŵane kuti alwaleje. Yiŵanda yikusiyalagasya ŵandu ŵane chilo mwamti ŵanduwo akusasagamilaga yakogoya yayikusatendekasya kuti akapataga lugono. Ŵane yikusiyagonaga. Nambosoni yikusiyatendekasya ŵane kuti awutuche masoka, ŵawulejeje achimjawo kapena kuliwuga kwene.

Jwamkongwe jwine jwakusatama ku Suriname lina lyakwe Lintina, jwasasile kuti chiŵanda kapena kuti msimu wakusakala chawuleje ŵandu 16 ŵamwiŵasa mwakwe soni chaŵele mkulagasya mnope kwa yaka 18. Kutyochela pa yindu yayamtendecheleyi jwalakwe jwasasile kuti yiŵanda “yikusasangalala kwalagasya ŵandu kwa umi wawo wosope.”

Nambo Yehofa mpaka ŵachenjele ŵakutumichila ŵakwe kuti Satana akalagasyaga.—Misyungu 18:10.