Saashin tü Wiwüliakat ‹eʼikeʼennüshii wayuu sainküin mmakat süpüshuaʼa nutuma Satanás› (Alateetkat Mapeena 12:9). Satanás otta na yolujaakana mojusü namüin wanoujuin sünain tü Wiwüliakat. Nanoujireein waya sünain suʼunuin naaʼin na ouktushiikana eemüin saaʼinpülee tü ouktusükalüirua. ¿Jamüsü sukuwaʼipa natuma?

Ouktapa wanee wayuu oʼunusü tü naaʼinkat eemüin saaʼinpülee tü ouktusükalüirua saashin tü iküleesia nnojotkat shiimain.

Akatsaʼa tia nnojotsü shiain tü shikirajakat anain tü Wiwüliakat. Müsü sünüiki tü Wiwüliakat nüchiki Adán: «Akumajünüshi Adán, chi palajachikai wayuu, sünain saapünüin kataa oʼu nümüin» (1 Corinto 15:45). Nnojotsü aapünüin nümüin Adán wanee kasa ojuʼitajatka nuulia ouktapa nia.

Ouktapa wanee wayuu nnojotsü ojuʼitüin tü naaʼinkat saashin tü Wiwüliakat, nnojoishi aainjüin kasa namüin na wayuukana. Müsü nünüiki Maleiwa:

 «Ojuʼitüsü tü sütchinkat naaʼin, mmashi nia nüchikuaʼa; soʼu kaʼikat tia nnojoluipa kasain jülüjüin naaʼin» (Salmo 146:4, NM).

«Na wayuu katüshiikana oʼu natüjaa aaʼu ouktuinjanain naya; akanasaʼa na ouktushiikana nnojotsü kasain natüjaain aaʼu, nnojotsü aapünüin namüin kasa saaʼu tü naainjakat süka motuin naya saaʼin tü wayuukalüirua. Süpüshuaʼa tü püinkakat paainjüin, piʼyataa maʼin sünain süka nnojoluin eein aʼyatawaa, kanain aaʼin tü aainjünajatkat, atüjawaa otta kekiiwaa maʼin suluʼu tü Seol puʼunuinjatkat aluʼumüin» (Eclesiastés 9:5, 10, NM).

Saashin tü Wiwüliakat ouktusü tü mürütkalüirua maʼaka ouktuin tü wayuukalüirua (Eclesiastés 3:19, 20). Eeka ouktuin nnojotsü kasain natüjaain aaʼu, makalaka nnojoluin kasain ayuʼlaain nanainjee na ouktushiikana.

Paashajeʼerüle süpüshuaʼa tü Wiwüliakat, süküjeerü pümüin nnojoluin katüin noʼu na ouktushiikana eere saaʼinpülee tü ouktusükalüirua. Alawaa tia saashin tü Wiwüliakat, nia Satanás otta na yolujaakana ekirajaka tia. Tü alawaa süküjakat tü iküleesia nnojotkat shiimain nnojotsü anain nümüin Je’waa (Proverbios 6:16-19; 1 Timoteo 4:1, 2).

Eʼikeʼennüshii na wayuukana nutuma Satanás naka na ooʼulaküliikana. Chi ooʼulaküikai nia wanee wayuu aashajaaka namaa na yolujaakana. Naashin na wayuukana otta na ooʼulaküliikana naapüin nanüiki na ouktushiikana. Nnojotsü shiimain tia saashin tü Wiwüliakat (Eclesiastés 9:5, 6, 10).

Tü pütchi naapakat na wayuukana, ¿jara kanüikika shia? ¡Nanüiki na yolujaakana! Na yolujaakana mapüleesalü namüin nashatüin nakuwaʼipa na ouktushiikana sükajee jülüjüin naaʼin na wayuukana kataiwaʼaya noʼu. Kanainsü naaʼin tü naashajaayakat, tü naainjapuʼukat otta tü natüjaapuʼukat aaʼu (1 Samuel 28:3-19).

Nükayaleʼerüin Satanás na wayuukana suulia tü shiimüin süküjakat tü Wiwüliakat sükajee tü alawaa nüküjakat nachiki na ouktushiikana (2 Timoteo 4:3, 4).

Eeshii wayuu eeka neʼrüin na ouktushiikana katüin noʼu nachikuaʼa suluʼu wanee mma naata. Tia joutsü maʼin chaaʼaya África. Müleka katüle noʼu wanee wayuu nüchikuaʼa, ‹¿anasü saaʼin pümüin nuʼunule wattamüin suulia nüpüshi otta naʼaleewainyuu?›.

¿Niataapa neʼrüin wanee wayuu müshi aka naaʼin chi ouktushikai? Müsü nukuwaʼipa wanee laülaa oushikaashi nachiirua piamashii wayuu aküjülii pütchi nüchiki Maleiwa, kanainshi naaʼin waneeshia süka niayaain naashin wanee nuwala kakaliaichi ouktuin. Tia nnojotsü shiimain, akaisaʼa chi laülaakai macheʼesai süchiirua tia. ¡Aashajaakajasaʼa maʼin nia süchiki tü niʼrakat namüin na naʼaleewainkana otta na kepiakana nüʼütpaʼa!

Eesü paapüirüle nachiki wayuu eeka naʼlapüjaain, shipeijaain wanee kasa napüla otta naapüin nanüiki na ouktushiikana natuma na yolujaakana. Mmotshii na wayuu alatakana amüin tia. Marein wanee wayuu kepiapuʼusü chaaʼaya África, ounejünapuʼusü saʼwai sutuma tü soushu ouktusükat, achijiraapuʼushii na süpüshikana sutuma shikiisa. Mapa, mamainnasü shia.

Müleka katüle noʼu na ouktushiikana, ¿anasü saaʼin pümüin neimmolojule na napüshikana? Nnojo. Na aashajaakana naya na yolujaakana.

Jama süküjünüle wamüin waʼlapüinruʼu wanee pütchi müin anakai saaʼin, ¿anasü tia? Eesü wanee wayuu ayuuisü chejeʼewalü Sierra Leona, Gbassay sünülia. Antüshi chi süshi ouktushikai süʼlapüinruʼu, nüjütaka shia sünain asaajaa nüpana wanee wunuʼu, süsirujuinjatü otta süsüinjatü. Nnojotsü aashajaainjatüin sümaa wayuu süpülapünaa saainjüin tia. Anaka shia sutuma saainjüin tü nümakat.

Eesü wanee wayuu antüshi sünainmüin chi suʼwayuuse ouktushikai. Saashin, anasü maʼin niyolojo otta nüsheʼin.

 Tia pütchi naapakat otta tü kasa neʼrakat na wayuukana müsü anakai saaʼin. ¿Nümaʼanajeejatche Maleiwa? Nnojo. Je’waa «matüjainsai nia aküjaa alawaa» (Hebreokana 6:18). Nnojoishii waya nimeejüin. Naya müleʼe na yolujaakana aainjaka tia.

¿Eeshii yolujaa eeka anamiain? Nnojo. Jaʼitaina kamaneeyaain, mojulaashii naya napüshuaʼa. Wanaa sümaa naashajaain chi Yolujaakai sümaa Eva kamaneeyaashi (Génesis 3:1). ¿Kasa alataka sümüin Eva süchikijee soonooin sümaa nünüiki? Ouktusü shia.

Nnojotsü ponuin paaʼin kamaneeyaale wanee wayuu mojulaashi shiiʼiree nimeejüin otta nüsütüin wanee kasa suulia wanee wayuu. Müsü wanee pütchi wayuunaikiruʼu «anayaasü nuʼuuta, yarüttapajee nüleʼeruʼu». Müsü tü Wiwüliakat: ‹Satanás nuuʼulaküin nakuwaʼipa na aapiee chejeʼewaliikana eejee Maleiwa› (2 Corinto 11:14).

Nnojoishi aashajaain Maleiwa wamaa süka pütchi eeka waapüin, kasa eeka shipeijaain otta lapü. Aashajaashi Maleiwa wamaa süka tü Wiwüliakat, tü ‹waaʼinrüinjatka atuma süpüshuaʼa tü kasa anasü talatakat atuma naaʼin› (2 Timoteo 3:17).

Naapirüin waya Je’waa suulia tü kasa mojusü naainjakat chi Yolujaakai süka alin waya nüpüla. Nütüjaa aaʼu mojulaain na yolujaakana.