Ombeibela mai tja Satana u “pukisa ouye auhe.” (Omavandururiro 12:9) Satana nozondemone ze kave vanga kutja eṱe tu kambure mEmbo raMukuru, Ombeibela. Ozo ze kondja okukamburisa ovandu kutja ovaṱi ve nomuinyo korive momaturiro wozombepo. Ngatu tare kutja owo iho ve tji tjita vi.

Ozongamburiro ozengi ze honga kutja omundu kangamwa auhe u nomuinyo (mOtjiingirisa, soul) mbu tapakaṋa komaturiro wozombepo kombunda yonḓiro yorutu rworuuma. Ozo ze tja orutu ru ṱa nungwari omuinyo (soul) kau ṱu. Komeho wanao, ozo ze tataimba kutja omuinyo (soul) kau koka, kutja owo omuhakoka.

Nungwari Embo raMukuru kari hongo nao. Ombeibela mai raisa kutja omuinyo (soul) ombu ri omundu, katjiṋa rive moukoto womundu. Otjotjihorera, mokuhandjuṋuna omamemeno waAdam, Ombeibela mai tja: “Nu Jehova Mukuru wa kaenda okuzezenga omundu okuza poruuma okuza mehi nokusuvira momauru we ombepo yomuinyo, nu ingwi omundu otja ri ra omuinyo [soul] mbu na omuinyo [life].” (Genesis 2:7, NW) Okutja Adam ke na pa pewa omuinyo (soul); eye wa ri omuinyo (soul).

 Ovipuka wina vi isanewa ominyo (souls).—Genesis 1:20, 21, 24, 30.

Tjinga embo rOmbeibela “omuinyo” (soul) amari hee omundu omuini, otjo katji sere okututemisa okurihonga kutja ominyo (souls) mape ya avi, nu vi koka. Omatjangwa mae tja:

• “Omuinyo [soul] mbu mau tjiti ourunde—owo ouni mau ṱu.”—Esekiel 18:4, NW.

• “Nu Simson arire tja tja: ‘Omuinyo [soul] wandje ngau ṱe puna Ovafilisti.’”—Ovapangure 16:30, NW.

• “Tji tja s’okutjitua momasabata, otjikuatjike, okuungura oviungura oviua, poo, ovivi? Okujama omuinjo [soul] poo, okuzepa?”—Markus 3:4, EEP.

Omatjangwa warwe maye raisa kutja ominyo (souls) mape ya avi nyonwa (Mateus 10:28), avi zepewa i engaruvyo (Epsalme 22:21, EEP), avi siniwa (Job 7:15, NW), navi ṋiṋiwa i omeva (Jona 2:5, NW). Okutja, omuinyo (soul) u koka.

Tji nga awa lese Ombeibela okuza komunda nga komunda, ove kamoo roro okumuna orumbembera rwomuhewo “omuinyo [soul] omuhakoka.” Omuinyo (soul) womundu kambepo. Omahongero womuinyo (soul) omuhakoka kamahongero wOmbeibela. Owo omahongero waSatana  nozondemone ze. Jehova u tonda ovizeze vyongamburiro avihe.—Omiano 6:16-19; 1 Timoteus 4:1, 2.

Omuano warwe Satana me pukisa ovandu omokutuurungira mozondjai. Ondjai omundu ngu yenena okuyakura ozombuze oukahu okuza komaturiro wozombepo. Otjivaro otjingi tjovandu, na inḓa ozondjai ozeni, ve kambura kutja ozombuze nḓa ze za kozombepo zovaṱi. Nungwari otja tji twa zu nokumuna okuza mOmbeibela, ihi kamaape ya.—Omuzuvarise 9:5, 6, 10.

Ozombuze nḓa, okutja, ze za ku uṋe? Ozondemone ozeni! Ozondemone ze yenena okutarera omundu ngunda e nomuinyo; ozo ze tjiwa kutja omundu ngo aa hungire vi, kutja ombunikiro ye ya ri iṋe, mbyaa tjiti, na imbi mbyaa tjiwa. Okutja oupupu kuzo okuhorera ovandu mba ṱa.—1 Samuel 28:3-19.

Omuano warwe Satana me ryamisa ovizeze ohunga novaṱi omokutuurungira momahungi woposyo. Omahungi ohamukwao na ingo potuingi ye humburura ovandu okuza ko kouatjiri wOmbeibela.—2 Timoteus 4:4.

MoAfrika pe na ovimbaharere ovingi ohunga novandu mba munika nomuinyo kombunda yonḓiro. Otja tji pe tjiukwa, omamunikiro ohamukwao na ingo ye munika hembandina kokure okuza imba omundu ngwi paa kara. Nungwari ripura omuini: ‘Mape munika osemba kutja indu omundu tja ri nomasa okukotoka okuza kovaṱi, eye atja kotoka koruveze ndu ri hembandina kokure neṱunḓu re nomapanga?’

Wina, kape na ku ya kutja omundu ngwa munika wa sanene uriri komundu ngwi ngwa ṱa? Otjotjihorera, ovaungure vevari Ovakriste mba ri amave zuvarisa mondendera youye woharive va kengeza omurumendu omukururume ngwe ve kongorera ozoiri katjondumba. Indu owo tji ve mu pura, owo ve ya kondjiviro yokutja omurumendu ee ripura kutja umwe wovaungure mba wa ri erumbi re nda ṱa ozombura katjondumba rukuru. Otjinga pe ri, eye wa ri posyo, nungwari wa panḓa okuitavera kutja wa ri posyo. Ripura ohunga nehungi omurumendu omukururume kombunda nda ka serekarera komapanga we novararanganda!

Kape nomaivaiviro ove kutja mo tjiwa ohunga noviṋa ovikumise ovandu mbi va muna, zuva, poo mbi va rota. Ozondjiririra zomomaturiro wombepo ohamukwao na inḓo potuingi ze tirisa imba mbe na zo. Marein, ngwa turire moAfrika kOngurova, aruhe aa zuu eraka ratjikurukaze we omuyaruke ame mu isana mouṱuku. Nomburuma, Marein aa urakana, ama pendura onganda ye aihe. Momakaondjero woruveze, eye wa tanauka ouruvi.

Nambano, andakuzu ovaṱi tjiri ve nomuinyo, pe ri osemba kutja owo atja ve tirisa ovasuverwa vawo? Otjinga pe ri, katja ve tjita. Omburo yozombuze ozohihamise ohamukwao na inḓo ozondemone.

Nungwari pe ri vi ohunga nozombuze nḓe munika ayoo ze nombatero nozohuhumise? Otjotjihorera, Gbassay, waSierra Leone, wa verere. Eye wa ri noruroto imwi ihe omuyaruke me rimunikisa kuye. Eye we mu rakiza okuyenda komuti katjondumba, a toore eso, e ri runge nomeva, nokuyenwa. Eye ka sere okuhungira ku na kangamwa auhe ngunda e hi ya tjita nao. Eye we tji tjita nu wa veruka.

Omukazendu warwe wa tja omurumendu we we rimunikisa ku ye ouṱuku umwe kombunda tja za nokuṱa. Eye wa tja aa munika pokainya nu wa hwikikire ozombanda ozombwa.

 Ozombuze novirimunikise ohamukwao na imbyo vi munika ayoo oviwa novinambatero. Ovyo vi za ku Mukuru? Kako, ovyo ka vi zu. Jehova ‘oMukuru wouatjiri.’ (Epsalme 31:6, EEP Correct in EEP) Eye kamaa roro okuitavera kutja e tu tikure poo kutja e tu pukise. Ozondemone porwao onḓe tjita nao.

Nungwari pe na ozondemone ozombwa? Kako. Nandarire kutja ozo mape ya aze munika ayoo ozonambatero potuveze, azehe zawo ozombi. Omudiaboli indu tja hungira na Eva, eye aa munika otjepanga. (Genesis 3:1) Nungwari ovikongorere kuye vya ri viṋe indu eye tja za nokupuratena ku ye na tjiti imbi eye mbya he ya? Eye wa ṱa.

Ove mo tjiwa kutja katjikumise komundu omuvi okumunika otjepanga ku imba mbu ma vanga okutikura nokunyoka. “Mayo mavapa, mutima muzorondu,” omuano wohungiriro waAfrika otji u ha. NEmbo raMukuru mari tja: “Satan omuini u ritjitukisa . . . [momuengeli] wondjerera.”—2 Ovakorinte 11:14.

Mukuru ka hakaene novandu rukwao kombanda yehi mokutuurungira moturoto, ovirimunikise, poo omaraka okuza komaturiro wozombepo. Eye u ve ṱika nokuvehonga momatuurungiro wOmbeibela, ndji mape ya ai tjiti omundu “e rirongerere okuungura otjiungura ngamwa atjihe otjiwa.”—2 Timoteus 3:17.

Okutja, indu Jehova tji me tu rakiza ohunga novineya vyOmudiaboli, eye u tjita nao mena rokutja we tu suvera. Eye ma tjiwa kutja ozondemone ovanavita ovanaumba.