Biibilimi allassimavoq Satan ‘inuit najugaanni nunalinnik tamanik tammartitsiniartoq’. (sarĸúmersitat 12:9) Satanip inngilipiluisalu kissaatiginngilaat Guutip oqaasia, Biibili, upperissagipput. Inuit uppertinniarpaat toqusimasut anersaat silarsuaanni sumiugaluarnersoq inuusut. Qanoq ilillutik taamaaliornerat missisoriartigu.

Upperisarsiornerit amerlasuut ajoqersuutigaat inuit tamarmik timip toqunerata kingorna anersaat silarsuaannut ingerlaqqittussaasumik tarneqartut. Oqartarput timi toqusartoq tarnerli toqusanngitsoq. Aamma oqartarput tarneq toqusinnaanani toqujuitsuusoq.

Guutilli oqaasiani tamanna ajoqersuutigineqanngilaq. Biibilip takutippaa tarneq tassaasoq inuk, tassaananilu suna inuup iluaniittoq. Assersuutigalugu, Adamip pinngortinneqarnera pillugu ima allassimasoqarpoq: „Taava Guuti [Jehova] inuliorpoq issumit, sorluisigullu anersaarnermik uumassutaasumik sulluarlugu. Taamaalilluni inuk tarninngorpoq uumassuseqartoq. “ (1 Moses 2:7, NV) Adam tarnermik tunineqarsimanngilaq, tarniullunili.

 Uumasuttaaq tarnernik taaneqartarput. — 1 Moses 1:20, 21, 24, 30, NV.

Biibilimi oqaaseq ‘tarneq’ isumaqarmat inuk, ilaannikkullu uumasoq, tupigusuutigissanngilarput paasigutsigu tarnit toqusinnaasut toqusartullu. Allakkani ima allassimasoqarpoq:

• „Tarneq ajortuliortoq — taanna toqussaaq.“ — Hesekiel 18:4, NV.

• „Samsonilu nangilluni ima oqarpoq: ‘Tarnima filisterit toqoqatigiinnarligit.’“ — Eqqartuussisut 16:30, NV.

• „Suna iluarpa, sabbatimi ajunngitsuliorluniluunniit ajortuliorluniluunniit, tarnermik inuutitsilluniluunniit toqutsilluniluunniit?“ — Mákorse 3:4, NV.

Allassimaffiit allat takutippaat tarnit ‘piiagaasinnaasut’ (1 Moses 17:14, NV), ‘toqorarneqarsinnaasut’ (Josva 10:37, NV), ‘qiminneqarsinnaallutik’ (Job 7:15, NV) ‘ipisinnaallutillu’ (Jona 2:5, NV). Aap, tarneq toqusarpoq.

Biibili naallugu atuaraluarukku oqaaseq ‘tarneq toqusuitsoq’ nassaarinavianngilat. Inuk tarniusoq anersaajunngilaq. Tarnermik toqusuitsumik ajoqersuut Biibilip ajoqersuutiginngilaa. Tassaallunili Satanip inngilipiluisalu ajoqersuutigisaat.  Jehovap upperisarsiornikkut salluliuutit tamaasa uumigai. — Ussatit 6:16-19; 1 Timûtiuse 4:1, 2.

Satanip aamma anersaarsiortut aqqutigalugit inuit tammartittarpai. Anersaarsiortoq tassaavoq inuk anersaat attaveqarfigalugu nalunaarfigisinnaasaat. Inuppassuit, aamma anersaarsiortut, upperaat tusarliussat tamakku toqusimasut anersaavinit pisut. Soorluli Biibilimi takusimagipput tamanna ajornarluinnarpoq. — Nalunaajaasup oqaasii 9:5, 6, 10.

Tusarliussat tamakku taava kikkunninngaaneerpat? Inngilipilunnit! Inngilipiluit inuk inuutillugu isiginnaarsinnaasarpaat; nalunngilaat qanoq oqaluttarsimasoq, qanoq isikkoqarsimasoq sunillu ilisimasaqarsimasoq. Taamaattumik inunnik toqusimasunik issuaalluarsinnaapput. — 1 Samuel 28:3-19.

Satanip aamma oqaluttuat ilumuunngitsut atorlugit toqusimasut pillugit sallu siuarsartarpaa. Oqaluttuat taamaattut inuit sallusuissummit Biibilimeersumit allamut saatsittarpaat. — 2 Timûtiuse 4:4.

Afrikami oqaluttuarineqarajuttarpoq inuit toqusimasut toqunermik kingorna inuusut takuneqarsimasut. Amerlanertigut najugarisimasaminnit ungaseqisumi takusorineqartarput. Imminulli apereriarit: ‘Silatusaarnerua upperissallugu inuk toqusimasoq inuunermut utersinnaanissaminut piginnaassuseqaraluaruni ilaquttaminit ikinngutiminillu ungasissumut uterumassasoq?’

Aammalu inuk takuneqarsimasoq tassaasinnaannginnerpa inummut toqusimasumut assingusoq? Assersuutigalugu, oqaluussisartut kristumiut marluk nunaannarmi oqaluussitillutik malugaat angutip utoqqaap nalunaaquttap-akunnerini arlalinni malikkaatik. Aperigamikku paasivaat angut isumaqartoq angutip aappaa tassaasoq qatanngutigigaluani ukiualuit tamatuma siorna toqusoq. Soorunami kukkuvoq, kukkuninili uppererusunngivillugu. Takorlooriaruk angutip taassuma ikinngutini eqqaamiunilu qanoq oqaluttuussimassagai!

Inuit takusimasaat, tusarsimasaat sinnattugaallu eqqumiitsut qularnanngitsumik tusaamavatit. Misigisimasat taamaattut pinngortitat pissusissaannut naapertuutinngitsut amerlanertigut inuit ersissutigisarpaat. Mareinip, Afrikap kitaani najugaqarsimasup, unnuakkut aanagigaluami nipaa qaaqqusisoq tusaasarsimavaa. Erseqaluni nilliallunilu Marein itertarpoq inoqutinilu tamaasa itertillugit. Naggataatigut silanngajaalerpoq.

Toqusimasut ilumut uumagunik asasaminnik ersiortitsinissaat upperissallugu silatusaarnerua? Soorunami naamik. Tusaasat ajoqusiisinnaasut tamakku inngilipilunneerput.

Tusaasammi ajunngippaluttut tuppallernarpaluttullu? Assersuutigalugu, Gbassay Sierra Leonemeersoq napparsimalersimavoq. Sinnattumini ataatagigaluani takuaa. Taassuma peqquaa orpik aalajangersimasoq orneqqullugu, pilutaasalu ilaat imermut akuleruteriarlugit imeqqullugu. Taamaaliortinnagu kimulluunniit oqaqqunngilaa. Taamatorpiaq iliorpoq ajorunnaarlunilu.

Arnaq alla oqaluttuarpoq uini toqoreersimasoq unnuit ilaanni takkussimasoq. Isikkoreqalunilugooq atisarissaaqaaq.

 Tusarliussat takusallu tamakku iluaqutaarpasissinnaapput. Guutimeersuuppat? Naamik. Jehova tassaavoq ‘Guuti unneqqarissoq’. (Tussiaat 31:6) Nakutinngisaannarlutalu salloqittanngisaannarpaatigut. Inngilipiluit kisimik taamaaliortarput.

Tamakkuali ilaannik ajunngitsoqarpa? Naamik. Naak ilaatigut ikiuiumatorpasissinnaagaluarlutik tamarmik ajortuupput. Diaavulu Evamut oqalukkami inussiarnerpalussimavoq. (1 Moses 3:1) Evalli tusarnaareerlugu naalakkamiuk sumik kinguneqarpa? Eva toquvoq.

Nalunngilat inupiluup salloqittagassani inussiarnerfigisarai. Afrikamiut ima ussateqarput: „Kigutit qaqortut, uummat qernertoq.“ Guutillu oqaasiani ima allassimasoqarpoq: ‘Satan nammineq qaamasup inngiliatut pissuseqartuusaartarpoq.’ — 2 Korintumiut 11:14.

Sinnattukkat, takorruuinerit nipillu anersaat silarsuaanneersut atorlugit Guutip nunarsuarmi inuit attaveqarfigisarunnaarsimavai. Biibili, ‘ajunngitsuliornernut tamanut piginnaanngortitsisartoq’, aqqutigalugu inuit siulersorlugillu unnersuuttarpai. — 2 Timûtiuse 3:17.

Taamaattumik Jehovap asagamisigut Diaavulup salloqittaasarneranut mianersoqqusarpaatigut. Nalunngilaa inngilipiluit tassaasut akeqqat navianartorujussuit.