Baibolo waamba’mba Satana “ubena kujimbaika bantu ba pano pa ntanda.” (Lumwekesho 12:9) Satana ne bandemona banji kechi bakeba bantu kwitabila Mambo a Lesa ne. Bandemona balengela bantu kuswa kuba’mba bantu bafwa kuji mpunzha ko baya. Twayai tumone byo boba bino.

Bupopweshi bwavula bufunjisha’mba muntu inge wafwa, mweo wanji uya ku mpunzha ya mipashi. Bamba kuba’mba mubiji ufwa, bino mweo kechi ufwa ne.

Bino Baibolo kechi byo byo afunjisha ne. Baibolo wamba’mba mweo ke muntu, kechi kintu kiji mukachi ka muntu ne. Baibolo waamba pa kimye kyo balengelenga Adama amba: “Kabiji Yehoba Lesa walengele muntu na lukungu lwa panshi ne kupuyamo muya wa bumi mu myona yanji, ne muntu waikele ke muntu mumi.” (Ntendekelo 2:7) Onkao mambo, Adama kechi bamupele mweo ne, aye ye wajinga mweo.

Banyama nabo bebatela’mba myeo.—Ntendekelo 1:20, 21, 24, 30.

Mu Baibolo, kyambo kya “mweo” kilumbulula muntu.  Onkao mambo, kechi twakonsha kukumya inge twaumvwa’mba mweo ufwa ne, mambo Binembelo byaamba’mba:

• “Mweo ulenga mambo ye ukafwa.”—Ezikyo 18:4.

• “Samisonyi wabijikile’mba: ‘Mweo wami afwile pamo na bena Filishitiya.’”—Mitonyi 16:30.

• “Nanchi kijitu bulongo kuba kyawama pa juba ja Sabado nyi, inyi kuba kyatama; kupulusha mweo nangwa kwipayañana?”—Mako 3:4.

Binembelo bikwabo bimwesha kuba’mba mweo bakonsha kumwipaya (Ntendekelo 17:14), bakonsha kumonauna na mpoko (Yoshua 10:37), wakonsha kufwa na mambo a kubula mwela (Yoba 7:15) kabiji wakonsha kufwa inge watomena (Yona 2:5). Onkao mambo, mweo ufwa.

Inge mwatanga Baibolo yense, kechi mukatanapo byambo bya kuba’mba “mweo ubula kufwa” ne. Mweo kechi mupashi ne. Lufunjisho lwa kuba’mba mweo kechi ufwa ne kechi lwafuma mu Baibolo ne. Batundaika luno lufunjisho ke Satana ne bandemona banji. Yehoba washikwa mafunjisho  a bubela onse aji mu bupopweshi.—Byambo bya Maana 6:16-19; 1 Timoti 4:1, 2.

Jishinda jikwabo Satana jo ajimbaikilamo bantu ke kwingijisha bañanga. Ñanga ke muntu utambwila byambo kufuma ku mipashi. Bantu bonse besamba na mipashi baketekela kuba’mba bino byambo bifuma ku mipashi ya bantu bafwa. Bino kwesakana na byaamba Baibolo, kino kechi kyakonsheka ne.—Musapwishi 9:5, 6, 10.

Nanchi abino byambo bifuma kwepi? Bifuma ku bandemona. Bandemona bamona byuba muntu saka akyangye kufwa, bayuka byaambanga muntu, byo amwekanga, byo aubanga ne bintu byo ayukile. Onkao mambo, kechi kibakatazha kufwanyikizha muntu wafwa ne.—1 Samwela 28:3-19.

Jishinda jikwabo Satana jo engijisha ke mashimikila a bubela aamba pa bantu bafwa. Ano mashimikila alengela bantu kubula kuyuka bukine bwa mu Baibolo.—2 Timoti 4:4.

Mu Africa, bantu javula bamba mashimikila a kuba’mba bakimonapo kala muntu wasanguka.  Ano mashimikila amwesha kuba’mba bantu bamwekela ku mpunzha ko babulanga kwikala. Pano ishikishai’mba: ‘Inge kya kine bano bantu basanguka, mambo ka o babujila kuya na kwikala na kisemi kyabo jikwabo?’

Onkao mambo, twakonsha kwamba’mba bano bantu bo bamba’mba basanguka kechi bekala bantu bakine ne, ke ba kufwanyikizhatu. Juba jimo bena Kilishitu byo basapwijilenga, bamwene mwanamulume mukote waishilenga kunyuma. Byo bamushikishe uno mukote ene mambo o ebalondejilenga, waambile’mba wamwene nobe umo pa bano bena Kilishitu wajinga mulongo wanji wafwile kala. Abino byo alangulukile kechi byajinga bya kine ne, nangwa kya kuba walangulukilenga’mba bya kine. Uno mwanamulume mukote wabuujileko balunda nanji byo amwene.

Kampe ne anweba bakimubuulapo kala pa bintu byamwene bantu, kumvwa nangwa kulota. Mashimikila a uno mutundu alengela bantu bebimona kuchiina. Marein wikala ku muzhika wa Africa, javula waumvwanga jiwi ja bankambo  yanji babakazhi bafwile na kumwita bufuku. Marein waumvwanga bingi moyo kabiji watamanga miteto ne kubuusha bonse mu nzubo. Ko kyayilenga wakonyenye.

Pano inge bantu bafwa batwajijila kwikala na bumi, nanchi kyayilamo kuba’mba bafwainwa kutendeka kuchinyisha balunda nabo nyi? Ine. Bino byambo byo bomvwa bifuma ku bandemona.

Pano kikala byepi ku bantu bamba’mba bebabuujile byambo bibakwashishe ne kwibatekenesha? Ba Gbassay bekala mu kyalo kya Sierra Leone bakolelwe bingi. Juba jimo balotele ne kumona bashabo bafwile kala. Bano bashabo bebabuujile’mba baye na kwapa mabuula ku kichi kyo bebabuujile ne kwiasanchika mu mema ne kutoma. Kechi bafwainwe kubuulako muntu saka bakyangye kuba bino ne. Baubile byo bebabuujile ne kukosa bakosele.

Mwanamukazhi mukwabo waambile’mba, juba jimo bufuku wamwene bamwatawanji bafwile. Waambile’mba bamwekelenga bingi bulongo kabiji bavwajile bivwalo byawama bingi.

Byambo bya uno mutundu ne bimwesho bimweka nobe byawama kabiji nobe bikwashañana. Nanchi bifuma kwi Lesa nyi? Ine, kechi bifuma kwi Lesa ne.  Mambo Yehoba ke “Lesa wa bukine.” (Salamo 31:5) Lesa kechi wakonsha kwitujimbaika ne. Bandemona bo bonkatu boba bino.

Nanchi kujipo bandemona bawama nyi? Ine. Nangwa kya kuba bimye bimo bamweka nobe bakonsha kwitukwasha, bino bandemona bonse batama. Diabola byo aambilenga ne Evwa, wamwekelenga nobe wajinga mulunda nanji wa kine. (Ntendekelo 3:1) Ki ka kyamumwekejile byo aumvwijile ne kuba byo bamubuujile? Wafwile.

Javula muntu watama inge ubena kukeba kujimbaika bantu umweka nobe mulunda. Kuji kishimpi kimo kya kuba’mba, “Meno bikupa.” Kabiji Mambo a Lesa aamba’mba: “Satana watwajijila na kwialula kwikala nobe malaika wa kyeya.”—2 Kolinda 11:14.

Lelo jino, Lesa kechi wisamba na bantu pano pa ntanda kupichila mu biloto, bimwesho nangwa kwingijisha mawi afuma ku bilengwa bya mupashi ne. Wingijisha Baibolo pa kwibatangijila ne kwibafunjisha. Kuba bino kwibalengela ‘kwinengezha bulongo kwingila mingilo yonse yawama.’—2 Timoti 3:17.

Onkao mambo, Yehoba witujimunako pa kuba’mba Diabola abule kwitujimbaika. Uba bino mambo witutemwa. Kabiji wayuka kuba’mba bandemona ke balwanyi bashinta bingi.