Biblia káʼa̱nña xa̱ʼa̱ ta̱ Ndi̱va̱ʼa ña̱ sándaʼvira “ndiʼi na̱ yiví” (Apocalipsis 12:9). Ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra va̱ása kúni̱na ña̱ kandíxayó ña̱ káʼa̱n tu̱ʼun Ndióxi̱. Na̱yóʼo kúni̱na ña̱ ná ndakanixi̱níyó ña̱ kíndo̱ova níma̱ na̱ yiví tá xíʼi̱na ta ku̱a̱ʼa̱nña ñuu xi̱ʼí. Ná kotoyó ndáa ki̱ʼva kéʼé na̱ ta̱chí ndi̱va̱ʼa ña̱ sándaʼvina na̱ yiví.

Na̱ veʼe-ñu̱ʼu vatá sánáʼa̱na tá xíʼi̱yó kíndo̱ova níma̱yó ta ndákiʼinña ku̱a̱ʼa̱nña ñuu xi̱ʼí. Na̱yóʼo káʼa̱nna ña̱ ndíʼi-xa̱ʼa̱va ku̱ñuyó soo kíndo̱ova níma̱yó ta ña̱yóʼo va̱ása ndíʼi-xa̱ʼa̱ña ta ni va̱ása xíʼi̱ña.

Soo su̱ví ña̱yóʼo kúú ña̱ sánáʼa̱ tu̱ʼun Ndióxi̱. Tá kúú, tá káʼa̱nña xa̱ʼa̱ ña̱ i̱xava̱ʼa Ndióxi̱ ta̱ Adán, Biblia káchiña: “Jehová i̱xava̱ʼara ta̱a xíʼin ñuʼú ta ti̱vira si̱ti̱nra, tasaá ta̱ ta̱a yóʼo ki̱xáʼa tákura” (Génesis 2:7). Ña̱kán tá i̱xava̱ʼa Ndióxi̱ ta̱ Adán kǒo nda̱a̱ ni iin ña̱ʼa níchika̱a̱ra inira ña̱ va̱ʼa kitaña tá ná kuvira.

Ni tí kití va̱ása kíndo̱o níma̱rí tá xíʼi̱rí, saáchi tá ke̱ʼé Ndióxi̱ tíyóʼo, ta̱xi kuitíra ña̱ kutakurí (Génesis 1:20, 21, 24, 30).

Biblia káchiña tá xíʼi̱ iin na̱ yiví va̱ása kíndo̱oví níma̱na, xa̱ʼa̱ ña̱yóʼo kǒo ni iin ña̱ʼa kivi keʼéna xíʼin na̱ táku. Ná kotoyó ndáaña káʼa̱nka Biblia.

• “Na̱ kíʼvi ku̱a̱chi, na̱kán kúú na̱ kuvi” (Ezequiel 18:4).

• “Tá xíʼi̱ na̱ yiví ndúu tukuna ñuʼú, tasaá kǒoka ña̱ ndákanixi̱nína” (Salmo 146:4).

Íyotu sava texto ña̱ káʼa̱n xa̱ʼa̱ na̱ yiví ña̱ xíʼi̱na nda̱a̱ táki̱ʼva xíʼi̱ kití (Eclesiastés 3:19, 20). Na̱ ni̱xi̱ʼi̱ kǒoka nda̱a̱ ni iin ña̱ʼa kúnda̱a̱-inina (Eclesiastés 9:5, 10). Ña̱kán, tá xíʼi̱ iin na̱ yiví va̱ása kíndo̱o níma̱na.

Tá ná kaʼviún iníísaá Biblia va̱ása ndani̱ʼún nda̱a̱ ni iin táʼví nu̱ú káʼa̱nña tá xíʼi̱na kíta níma̱na ta ku̱a̱ʼa̱nña ñuu xi̱ʼí, chi su̱ví ña̱yóʼo kúú ña̱ sánáʼa̱ Biblia. Ta̱ Ndi̱va̱ʼa xíʼin na̱ ta̱chí ndi̱va̱ʼa kúú na̱ sánáʼa̱ ña̱yóʼo, soo Jehová kúndasíra xínira ndiʼi ña̱ vatá ña̱ sánáʼa̱ na̱ veʼe-ñu̱ʼu (Proverbios 6:16-19; 1 Timoteo 4:1, 2).

Inka na̱ xíniñúʼu ta̱ Ndi̱va̱ʼa ña̱ va̱ʼa sandáʼvira na̱ yiví kúú na̱ ndákuati á na̱ tási, chi na̱yóʼo ndákuatina nu̱ú níma̱ na̱ xa̱a̱ ni̱xi̱ʼi̱. Ta sava na̱ kéʼé ña̱yóʼo ndákanixi̱nína ña̱ ndixa káʼa̱nva mií na̱ yiví na̱ ni̱xi̱ʼi̱ xíʼinna. Soo su̱ví ña̱ ndixaví kúú ña̱yóʼo káchi Biblia (Eclesiastés 9:5, 6, 10).

Tá saá, ¿ndáana kúú na̱ káʼa̱nna xíʼin? Xíʼin na̱ ta̱chí ndi̱va̱ʼava kúú ña̱ káʼa̱nna. Na̱ ta̱chí ndi̱va̱ʼa xítona miíyó na̱ táku. Ña̱kán tá xíʼi̱ iin na̱ yiví kúnda̱a̱-inina ndáa ki̱ʼva xi̱ka̱ʼa̱nna, ndáa ki̱ʼva xi̱na̱ʼa̱na, ndáaña xi̱keʼéna ta saátu ndáaña xi̱kunda̱a̱-inina xa̱ʼa̱. Ña̱kán va̱ʼaní ndákiʼinna nu̱ú na̱ yiví na̱ ni̱xi̱ʼi̱ (1 Samuel 28:3-19).

Ta̱ Ndi̱va̱ʼa xíniñúʼutura cuento vatá ña̱ va̱ʼa ndakundeéra sánáʼa̱ra ña̱ vatá xa̱ʼa̱ na̱ ni̱xi̱ʼi̱. Ta ndiʼi ña̱yóʼo va̱ása chíndeétáʼanña xíʼin na̱ yiví ña̱ xa̱a̱na kunda̱a̱-inina xa̱ʼa̱ ña̱ nda̱a̱ ña̱ sánáʼa̱ Biblia (2 Timoteo 4:4).

Chí África nátúʼunna ku̱a̱ʼání cuento ña̱ xínina ña̱ tákuva na̱ yiví na̱ xa̱a̱ ni̱xi̱ʼi̱. Soo su̱ví chí nu̱ú xi̱ndoona xíninana, chi inka lugar ña̱ xíkáníva xínina na̱yóʼo. Ña̱kán ndakanixi̱ní xa̱ʼa̱ ña̱yóʼo: “Tá ndixa tákuka na̱ yiví na̱ xa̱a̱ ni̱xi̱ʼi̱ yóʼo, ¿nda̱chun va̱ása ndíkókana koona xíʼin na̱ migona á na̱ veʼena ta xíkání ku̱a̱ʼa̱nna? Ta saátu, ¿á su̱ví inka na̱ yivíva kúú na̱ xi̱nina soo níʼinína nu̱ú na̱ yiví kán?”.

Ta saátu, ¿á su̱ví inka na̱ yivíva kúú na̱ xi̱nina soo níʼinína nu̱ú na̱ yiví kán? Tá kúú, ná ka̱ʼa̱nyó xa̱ʼa̱ ña̱ ndo̱ʼo u̱vi̱ na̱ hermano na̱ xíka nátúʼun xa̱ʼa̱ Ndióxi̱ iin ñuu loʼo. Na̱yóʼo ki̱ʼinna kuenta ña̱ xa̱a̱ ku̱a̱ʼání hora ndíku̱n iin ta̱a ta̱ xa̱a̱ chée sa̱tána. Tá ni̱nda̱ka̱tu̱ʼunnara nda̱chun ndíku̱nra sa̱tána, saá ku̱nda̱a̱-inina ña̱ xi̱ndakanixi̱níra ña̱ iin ta̱ hermano kán kúúra ñanira ta̱ xa̱a̱ ku̱a̱ʼání ku̱i̱ya̱ ni̱xi̱ʼi̱. Ni xi̱ndakanixi̱níra ña̱ ñanira kúú ta̱ hermano yóʼo, soo su̱ví ña̱ ndixaví kúúña. Ndakanixi̱níndó ndáaña na̱túʼun ta̱ táta yóʼo xíʼin na̱ migora ta saátu xíʼin na̱ veʼera tándi̱ʼi.

Miíún sana xa̱a̱ xíniso̱ʼovaún ña̱ káʼa̱n na̱ yiví ña̱ xi̱nina na̱ ni̱xi̱ʼi̱ á ni̱xa̱nína xíʼinna á xi̱niso̱ʼona ta̱chína, ta na̱ ndóʼo ña̱yóʼo yíʼvinína. Ñá Marein, ña̱ ni̱xi̱yo chí África, xi̱xiniso̱ʼoñá ta̱chí xi̱tánñá ña̱ xi̱kanañáñá ñuú. Xa̱ʼa̱ ña̱ xi̱yiʼvíní ñá Marein xi̱kana kóʼóñá ta xi̱ndako̱o ndiʼi na̱ veʼeñá. Tá ni̱ya̱ʼa tiempo sa̱navañá.

Tá ndixa tákuka na̱ xa̱a̱ ni̱xi̱ʼi̱, ¿nda̱chun kúú ña̱ sayíʼvinína na̱ táʼanna na̱ kúni̱nína xínina? Xíʼin ña̱yóʼo kúnda̱a̱-iniyó ña̱ su̱ví na̱ ni̱xi̱ʼi̱ví kúú na̱ káʼa̱n, chi na̱ ta̱chí ndi̱va̱ʼava kúú na̱ kéʼé ña̱yóʼo.

Soo ¿tá ña̱ va̱ʼatu kúú ña̱ káʼa̱n na̱yóʼo ta nda̱a̱ chíndeétáʼanña xíʼin inkana? Tá kúú ñá Gbassay, ñá ñuu Sierra Leona, xi̱kuumiíñá iin kue̱ʼe̱ ña̱ ndeéní. Ñáyóʼo ni̱xa̱níñá ña̱ xi̱niñá yiváñá ta̱ xa̱a̱ ni̱xi̱ʼi̱ ta ni̱ka̱ʼa̱nra xíʼinñá ña̱ ná ku̱ʼu̱nñá kaʼndañá yuku̱ ndaʼa̱ iin yitu̱n, ná ndasakáñáña xíʼin ti̱kui̱í ta ná koʼoñá táyóʼo. Soo va̱ása xíniñúʼu ka̱ʼa̱nñá xíʼin nda̱a̱ ni iinna xa̱ʼa̱ ña̱ keʼéñá. Ñáyóʼo ke̱ʼéñá ndiʼi ña̱ ni̱ka̱ʼa̱nra xíʼinñá ta nda̱ʼavañá.

Inkatu nána ni̱ka̱ʼa̱nñá ña̱ ki̱ta yiíñá ta̱ xa̱a̱ ni̱xi̱ʼi̱ nu̱úñá iin ñuú. Ta va̱ʼakaví náʼa̱ra ta livikaví ti̱ko̱to̱ ndíxira.

Savana, tá xánina á tá xíniso̱ʼona ta̱chí na̱ táʼanna na̱ xa̱a̱ ni̱xi̱ʼi̱, ña̱ va̱ʼava kúú ña̱yóʼo nu̱úna. Soo, ¿á mií Ndióxi̱ kúú ta̱ sáxa̱nína á táxira ña̱ kuniso̱ʼona ta̱chí na̱ táʼanna? Va̱ása, saáchi Jehová kúúra Ndióxi̱ ta̱ nda̱a̱ (Salmo 31:5). Ta̱yóʼo va̱ása sandáʼvivíra miíyó. Na̱ ta̱chí ndi̱va̱ʼa kúú na̱ kéʼé ña̱yóʼo.

Soo, ¿á íyo na̱ ta̱chí ndi̱va̱ʼa na̱ va̱ʼa-ini? Va̱ása. Ni sava yichi̱ náʼa̱na ña̱ va̱ʼa-inina ta kúni̱na chindeétáʼanna xíʼin inkana, nda̱a̱ ni iinna va̱ása kúúna na̱ va̱ʼa. Ta̱ Ndi̱va̱ʼa livikaví ni̱ka̱ʼa̱nra xíʼin ñá Eva (Génesis 3:1). Soo ¿ndáaña ndo̱ʼoñá xa̱ʼa̱ ña̱ xi̱niso̱ʼoñá ta ke̱ʼéñá ña̱ ni̱ka̱ʼa̱nra xíʼinñá? Ni̱xi̱ʼi̱vañá.

Miíún xa̱a̱ kúnda̱a̱va-iniún ña̱ saá kúú ña̱ kéʼé na̱ yiví tá kúni̱na kindaana iin ña̱ʼa ndaʼa̱ inkana á kúni̱na sandáʼvinana, livikaví káʼa̱nna xíʼinna. Tu̱ʼun Ndióxi̱ káchiña: “Ta̱ Ndi̱va̱ʼa ndásara miíra nda̱a̱ táki̱ʼva íyo iin ángel ta̱ va̱ʼa” (2 Corintios 11:14).

Ndióxi̱ va̱ása káʼa̱nkara xíʼin na̱ yiví na̱ ndóo nu̱ú ñuʼú yóʼo. Ña̱kán va̱ása xíniñúʼukara xa̱ni, ni va̱ása sátu̱vira nu̱úna ta ni va̱ása xíniñúʼura na̱ ángel ña̱ ka̱ʼa̱nra xíʼinna. Chi ña̱ Biblia kúú ña̱ xíniñúʼura ña̱ va̱ʼa sanáʼa̱ra na̱ yiví ña̱ “kuxini̱ va̱ʼana keʼéna nda̱a̱ ndáaka chiñu ña̱ va̱ʼa” (2 Timoteo 3:17).

Ña̱kán, xa̱ʼa̱ ña̱ kúʼvi̱-ini Jehová xínira miíyó káʼa̱nra xíʼinyó ndáa ña̱ʼa kúú ña̱ xíniñúʼu ta̱ Ndi̱va̱ʼa ña̱ sandáʼvira miíyó. Ta kúnda̱a̱-inira ña̱ su̱ví na̱ va̱ʼa kúú na̱ ta̱chí ndi̱va̱ʼa chi kúni̱na keʼéna ña̱ va̱ása va̱ʼa xíʼinyó.