Bibliapin nishan: “Satanasmi jallp’a pacha runakunata pantachiqqa”, nispa (Apocalipsis 12:9). Satanasqa supayninkunapiwanmi mana munankuchu Bibliapi nisqanta creenanchista. Aswanpas runakunatan creechinku wañupuqkunaqa espiritukunaq kasqanmanmi ripun nispanku. Chaymanta yachasun.

Pantasqa religionkunan yachachinku “wañupuqkunaq almanqa espiritukunaq kasqanmanmi ripunku” nispa. Nillankutaqmi: “Cuerpoqa wañunmi alman ichaqa mana wañunchu”, nispa.

Biblian ichaqa yachachin noqanchis alma kasqanchista. Adanmantan Bibliapi willashan: “Jinan Jehová Diosqa ñut’u jallp’amanta runata ruwarqan, jinaspataq kausachiq samayta senqanman phukuykurqan jinan runaqa kausaq alma kapurqan”, nispa (Génesis 2:7 willakuy). Chhaynaqa Diosqa manan Adanmanqa almatachu qorqan aswanpas Adanmi almaqa karqan.

Animalkunapas kausaq almakunan kanku (Génesis 1:20, 21, 24, 30 willakuy).

 Bibliapi “almamanta” rimaspaqa runaq kausayninmantan rimashan. Chaymi mana admirakunapaqchu almaq wañusqanqa. Qhawasunchis Bibliapi textokunata.

• “Juchallikuq almaqa wañunqan” (Ezequiel 18:4, willakuy).

• “Wañuy patapiña kashaspapas manan “almanku” chinkachiytapas paykunaqa manchakurqankuchu” (Apocalipsis 12:11, willakuy).

• “¿Ima ruwaymi allin kanman samana p’unchaypi? ¿Allin kaqta ruwaychu, icha mana allin kaqta ruwaychu? ¿Almata salvaychu, icha wañuchiychu?” (Marcos 3:4, willakuy).

Wakin textokunapipas willanmi alma wañusqanta (Ezequiel 18:20, willakuy), samayninta tapapuqtinku wañusqanta (Job 7:15), unu millp’uykuqtin wañusqanta (Jonás 2:5). Chhaynaqa almaqa wañunmi.

Bibliapiqa manan tarinkichu mana wañuq almamanta yachachikuytaqa. Almaqa manan wañuqpa espiritunchu. Aswanpas “mana wañuq almamanta” yachachikuyqa pantasqa yachachikuymi,  chay yachachikuyqa Satanasmanta supayninkunamantawanmi paqarimun. Jehová Diosqa chay yachachikuytaqa cheqnikunmi (Proverbios 6:16-19; 1 Timoteo 4:1, 2).

Satanasqa layqakuywanmi runakunata engañashan. Wakin runakunapas layqakunapas piensankun mana allin espiritukunaqa wañupuqkunaq espiritunkuna kananpaq. Bibliapin ichaqa willawanchis wañupuqkunaqa manaña imatapas ruway atisqankuta (Eclesiastés 9:5, 6, 10).

Chhaynaqa, ¿pikunawantaq layqakunari rimanku? Supaykunawanmi. Supaykunaqa allintan runakunata reqsinku, yachankun imayna rimasqankuta, imaynachus sayayninku kasqanta, imakunachus ruwasqankutapas. Chaymi wañupuqtinkuqa supaykunaqa kaqllata ruwanku (1 Samuel 28:3-19).

Satanasqa wañupuqkunamanta yanqa willakuykunatan runakunaman creechin. Chaytaq runakunata Diosmanta karunchan (2 Timoteo 4:4).

 África nacionpiqa cuentokunaqa askhan uyarikun wañupuq runata rikusqankumanta. Chay wañupuq runaqa wasinmantas karupi kashan. Ichaqa sichus chay runa kausashanmanraq chayqa, ¿manachu karupi kashananmantaqa familianman, amigonkunaman ima kutipunman?

Chaymantapas, ¿manachu rikusqanku runaqa rijch’akullanman wañupuq runaman? Ejemplopaq, juj llaqtachapis Jehová Diospa iskay testigonkuna Diosmanta willashasqaku, jinas paykunaq qhepanta juj machu runa risqa. Chaymantataq chay runaqa jujkaq testigota nisqa: “Wañupuq wayqeymi kanki”, nispa. Manaña chhaynachu karqan chaypas, chay runaqa qanpunin wayqeyqa kanki nishallarqansi. Chaytaqa chay runaqa llapa reqsisqanmanchá willarqan.

Qanpas yaqapaschá uyarirqanki wañuqtan rikuruni, kunkantan uyariruni otaq mosqorukunin niqta. Chay runakunataqa chaykunaqa astawanraqmi manchachin. África  ladomanta Mareinpas uyariqsi wañusqa abuelitanpaq kunkanta tutapi wajamushaqta. Chaysi payqa manchakuymanta qaparispa llapan familianta rijch’arachiq. Tiempowanqa manan yuyayninpichu kapurqan.

Sichus wañusqakuna kausashankumanraq chayqa, ¿manchachinkumanchu munakusqanku familianta? Manan riki. Aswanpas supaykunan runakunata chhaynata manchachinku.

Ichaqa, ¿imanisunmanmi wañusqakunawan mosqokuy allinninchispaq jina kaqtin? Yachanapaq, Sierra Leona nacionmanta Gbassay sutiyoq warmin onqosqa kasqa. Payqa mosqoypis wañuq taytanta rikusqa. Taytansi nisqa juj sach’aq raphinta unupi tupachispa ujananpaq. Chaytaqa manas pimanpas willananchu kasqa. Payqa chayta kasukuspas qhaliyapusqa.

Juj señoran willakullantaq wañuq qosanta tutapi rikusqanta. Qosanqa allin rijch’ayniyoq, munay p’achasqa imas kashasqa.

Chay willakusqankuqa allinpas kanman jinan. ¿Diosmantachu kanman? Manan. Jehová Diosqa “cheqaq rimaq Diosmi”  (Salmos 31:5). Payqa manan engañawasunmanchu. Supaykunallan chaytaqa ruwanku.

¿Kanmanchu allin supaykuna? Manan. Mayninpiqa allinpaqpaschá qhawarichikunkuman, ichaqa llapankun millay kanku. Evawan rimaspapas allin amigo jinan karqan (Génesis 3:1). Ichaqa, ¿iman Evawan pasarqan Satanasta kasukusqan qhepaman? Wañupurqanmi.

Yachasqanchis jina millay runakunaqa allin runaman tukuspan pitapas q’otunku. África nacionpin chhayna runakunata ninku: “Yuraq kiruyoq yana sonqo”, nispa. Bibliapipas nishanmi: “Satanaspas pasachikullanmi allin angelmantaqa”, nispa (2 Corintios 11:14).

Diosqa manan mosqoynintañachu, juj rijuriypi rikuchispañachu, nitaq angelkunawanpasñachu pimanpas imatapas willachin. Aswanpas Bibliapin kashan imatachus niyta munawasqanchisqa. Chhaynapi runaqa “allin preparasqa kananpaq” (2 Timoteo 3:17).

Jehová Diosqa munakuwasqanchisraykun willawanchis Satanaspas supaykunapas enemigonchiskuna kasqankuta, chhaynapi cuidakunanchispaq.