Te Biblia ya yal te yak ta sloʼlayel swolol Balumilal te Satanase. (Apocalipsis 12:9). Te Satanás sok te pukujetik yuʼun, ma skʼanik te ya jchʼuuntik te bin ya yal te sKʼop Diose. Ya yakʼbeyik schʼuun te ants winiketik te kuxuliklaj te banti ay te espirituetik te machʼatik lajemikixe. Kiltik bin-utʼil ya spasik.

Bayal religionetik ya yakʼik ta nopel te spisil te ants winiketik aylaj bin kuxul ya xjil yuʼunik te kʼalal ya xlajike sok yalaj xbajt te banti ay te espirituetike. Ya yalik te ya xlaj stukel te bakʼetalile, pero aylaj bin kuxul ya xjil yuʼunik.

Kʼalal te Biblia ya yal chʼulelal, jaʼ ya skʼan ya yal te skuxlejal te ants winike o te bitʼil kuxul yuʼun ikʼ. Jaʼ yuʼun te jnopojel Santiago jich la yal: «Chamen [te] baqʼuet teme mayuc schʼuhlel» (Santiago 2:26). Jaʼ yuʼun te chʼulelal joʼotiknix, jaʼ te jkuxlejaltike.

Te Biblia maba ya yal te kʼalal ay machʼa ya xlaje ay bin kuxul ya xjil yuʼun sok te ya xbajt ta kuxinel ta yan lugar. Pero te bin ya yakʼ ta nopele jaʼ te ma xjuʼix bin ya spasik, maʼyukix bin ya snaʼik sok ma xjuʼ ya xkʼopojikix te machʼatik lajemikixe:

«Como te machʼatic cuxajtic ya snaʼic te ya me xchamic, pero te machʼatic chamenic mayuc bin ya snaʼic, soc mayuquix yan bin ya xʼaʼbotic; chʼaybiliquix ta oʼtanil. Spisil te bintic yac apas, pasa soc spisil awip, como ta stsobojibal machʼatic chamenic, te banti ya xbahat, mayuc aʼtel, mayuc bin ay ta chahpanel, mayuc bin ay ta naʼel soc mayuc pʼijil-oʼtanil tey a» (Eclesiastés 9:5, 10).

«Ma haʼuc te machʼatic chamenic te ya yalbeyic yutsil scʼoblal te Jehová, ma haʼuc te machʼatic ya xcohic bahel ta chʼabal qʼuinal» (Salmos 115:17).

Te nojptesel te bitʼil ay bin kuxul ya xjil kuʼuntik te kʼalal ya xlajotike maba lokʼem ta Biblia, jaʼ jun nojptesel yuʼun te Satanás sok te pukujetik yuʼun, te Jehová ya spʼaj te lotiletik te ya yakʼ ta nopel te religionetike (Proverbios 6:16-19; 1 Timoteo 4:1, 2).

Te Satanás jaʼnix jich ya sloʼlay te ants winiketik ta swenta te espiritismo. Jtul espiritista jaʼ jtul ants winik te ya xjuʼ ya xkʼopoj sok te pukujetik. Bayal ta jtul ants winiketik, jaʼnix jich te espiritistaetik, ya skuyik te jaʼ yakik ta kʼop sok te machʼatik lajemikixe. Pero jich bin-utʼil kilojtik ta Biblia, ma smeleliluk (Eclesiastés 9:5, 6, 10).

Jich yuʼun, ¿machʼatiknix-a te ya xkʼopojik soke? ¡Jaʼ sok te pukujetike! Te pukujetik ya xjuʼ ya yilik te kʼalal kuxulto-a te ants winike; te bin yaʼiyel ya xkʼopoj, te bin yilel stalel, sok te bin la spas sok te bin snaʼoj-ae. Jaʼ yuʼun ma wokol ya yaʼiyik skʼayinbeyel stalel te machʼatik lajemikixe (1 Samuel 28:3-19).

Te Satanás ya stuuntes te lotil aʼiyejetik ta swenta te machʼatik lajemikixe. Te lotiletik-ini ya schebajtesbey yoʼtan te ants winiketik ta swenta te smelelil kʼope (2 Timoteo 4:4).

Ta África ya yalbeyik skʼoplal te aylaj ants winiketik te kuxajtik la yichʼik ilel manchukme lajemikix-a. Te bin kʼayemik ta yilele jaʼ te ya yilik te ants winiketik ta yan lugar, ma jaʼuk te banti kuxinem-ae. Pero jojkʼoybey aba: «¿Teme ya xjuʼ ya xchaʼsujt tal te machʼa lajemixe bin yuʼun ma xbajt sok te sfamilia soknix te yamigotake?».

Jaʼnix jich, te ants winik te la yichʼ ilele ayniwan pajal sit yelaw sok te machʼa lajemixe. Jun ejemplo, ta jun buelta chaʼtul testigoetik yuʼun Jehová yakik ta scholel skʼop Dios ta jun lugar-a, la yilik te yakik ta tʼunel yuʼun jtul winik te ayix yaʼbilale. Kʼalal la sjojkʼoybeyik bin yuʼun te yakik ta tʼunele, te winik la yal te yak ta stʼunel te sbankil te ayix jaʼbil slajele. Manix jaʼuk-a te sbankile, pero te winik schʼuunoj yoʼtan te jaʼ sbankile. ¡Nopanax awaʼiy te bin la scholbey yaʼiy te yamigotak sok te spatxujke!

Te jaʼate ayniwan awaʼiyoj te ya yalik te ants winiketik ay bin chajpnax yilojik, yaʼiyojik o swayichinojik. Jteb ma spisiluk te ants winiketik te jich ya xkʼax ta stojolike ya xiwik yuʼun. Te Marein, te kuxinem ta África occidental, spisil-ora ya yaʼiybey skʼop ta ajkʼabal te schuchuʼ meʼel te lajemixe. Ta skaj-abi, te Marein tulan ya x-awun sok ya xwijkʼ sit yuʼun spisil te sfamiliae. Ta patil, sojk sjol.

Jaʼ yuʼun, teme yuʼun-nix kuxajtik-a te machʼatik lajemikixe, ¿yabal yakʼik ta ilel skʼuxul yoʼtanik teme ya xiwtes te sfamiliaike? Maʼuk. Jaʼ yuʼun te kʼopetik te ya xchiknaj ta aʼiyele jaʼ skʼop te pukujetike.

Pero ¿bin ya xjuʼ ya kaltik ta stojol te bin ya xchiknaj ta aʼiyel te jich yilel te ya yakʼik mukʼul oʼtanile? Jun ejemplo, te Gbassay, te ay ta Sierra Leona, ay ta chamel-a. Ta jun buelta chiknaj ta swayich te spapa te lajemixe. Albot ta swayich te akʼa bajtuk stulbey yabinal jpejt teʼ, akʼa skap ta jaʼ sok te akʼa yuchʼe. Sok albot te maʼyuk machʼa ya yalbey te bin ya spase. Jich la spas sok lekub yuʼun.

Jaʼnix jich jtul ants la yal te chiknajlaj ta jun ajkʼabal te smamalal te lajemixe. La yal te leknax ta ilel te smamalale sok te tʼujbilnax te skʼuʼ spakʼe.

Te kʼopetik-abi sok te bin ya staik ta ilele jich yilel te ya yakʼik mukʼul oʼtanile. ¿Talembal ta stojol te Diose? Maʼuk. Te Jehová spisil-ora jun yoʼtan ta jtojoltik (Salmo 31:5). Maʼyuk bin-ora ya sloʼlayotik. Jaʼnax jich ya spasik te pukujetike.

Pero ¿aybal lekil pukujetik? Maʼyuk. Manchukme jich yilel te ya skʼan ya xkoltaywanike, spisil chopolik. Kʼalal te pukuj kʼopoj sok te Eva, jich yilel te kʼan skoltaye (Génesis 3:1). Pero ¿bin lokʼ yuʼun-a te Eva te kʼalal la yaʼiybey skʼop te Satanás sok te la spas te bin albote? Laj yuʼun.

Kʼalal jtul ants winik chopol yoʼtan ya skʼan ya yutsʼin yan ants winik ya yakʼbey yil slekil yoʼtan yuʼun jich ya sloʼlay-a. Jaʼnix jich te sKʼop Dios ya yal: «Te Satanás ya spʼis sba ta chʼul aʼbat yuʼun sacal qʼuinal» (2 Corintios 11:14).

Te Dios maba ya skʼoponotikix ta swenta wayichiletik, najalsitiletik o te ay bin ya yakʼik ta aʼiyel te talem ta stojol te pukujetik. Te Dios ya stojobtes sok ya snojptes te ants winiketik ta swenta te Biblia, yuʼun jich «chapal ya xcʼoht yuʼun spasel spisil lequil aʼteliletic» (2 ­Timoteo 3:17).

Jaʼ yuʼun, kʼalal te Jehová ya yalbotik te ya skʼan ya jtsajtay jbatik ta stojol te Satanase jich ya yakʼ ta ilel te kʼuxotik ta yoʼtane. Snaʼoj ta lek te jaʼ mukʼul jkontrataktik te pukujetike.