An bɛɛ ka kan ka sugandili kɛ. An ka kan k’a sugandi ka baara kɛ Jehowa ye, walima ka baara kɛ Sitanɛ n’a ka jinɛw ye. An tɛ se k’o fila kɛ ɲɔgɔn fɛ. Ka baara kɛ Jehowa ye, o de ye hakilimaya ye!

I n’a fɔ an y’a ye cogo min na, a ka di jinɛw ye ka ko jugu kɛ mɔgɔw la, ani k’u nɛgɛn. Jehowa tɛ ten. A bɛ hadamadenw kanu i n’a fɔ denfa b’a denw kanu cogo min na. “Fɛn ɲuman minnu bɛ di an ma ani nilifɛn dafalenw bɛɛ,” ale de ye o dibaga ye. (Yakuba 1:17) A tɛ hadamadenw jɛ fɛn ɲuman si la, hali n’o ka gɛlɛn a ma kosɛbɛ.—Efɛsekaw 2:4-7.

Yesu, Ala Denkɛ, ye fɛn minnu kɛ dugukolo kan, i miiri olu la. A ye ­dagerenw lakuma, ka fiyentɔw ɲɛw yɛlɛ. A ye segelentɔw ni kunatɔw kɛnɛya. A ye jinɛw gɛn, ka bana suguw bɛɛ kɛnɛya. Ala ka sebagaya barika la, Yesu ye hali mɔgɔ salenw lakunun.—Matiyu 9:32-35; 15:30, 31; Luka 7:11-15.

Sanni k’an lafili ni nkalon kumaw ye, Ala bɛ tiɲɛ fɔ tuma bɛɛ. A tɛ mɔgɔ si nɛgɛn abada.—Nɔnburuw 23:19.

I n’a fɔ ntalenmana bɛ limɔgɔ minɛ cogo min na, mɔgɔ miliyɔn caman minɛnen bɛ dannako kunntan ni nkalon fɛ. U bɛ siran furew ɲɛ. U bɛ siran jinɛw ɲɛ. Dangaliw ni domaya taamasiyɛnw ni dabali juguw ni boliw b’u jɔrɔ. U bɛ jɔnya la dannakow ni laadaw bolo, o minnu bɛ tali kɛ Sitanɛ Sendonbaga ka nkalonw na. Nin fɛn ninnu dɔ la kelen si ma Ala ka baarakɛlaw minɛ jan na.

Jehowa ye setigi ye ka tɛmɛ Sitanɛ kan. N’i bɛ baara kɛ Jehowa ye, a na i tanga jinɛw ma. (Yakuba 4:7) Dabali jugu tɛna i sɔrɔ. Misali la, Nijeriya jamana la, domaba saba tun ye Jehowa Seere dɔ bon walasa k’a faga, bawo a y’i ban ka dugu bila. Tuma min na dabaliw dɛsɛr’a la, domaba ninnu dɔ la kelen siranna. A ye Seere sɛgɛrɛ ka yafa deli a fɛ.

Ni jinɛw b’i tɔɔrɔ, i bɛ se ka Jehowa wele a tɔgɔ la, a na i lakana. (Ntalenw 18:10) Nka, walasa i ka se ka lakana Ala fɛ, i ka kan k’i hɔrɔnya pewu jinɛweleli kow bɛɛ ma, ani ka fara jinɛw batoli la. Ala batobaga minnu tun bɛ Efɛse kɔrɔ dugu la, olu y’o de kɛ. U y’u ka jinɛmoriya kitabuw kɛ ɲɔgɔn kan k’u jeni. (Kɛwalew 19:19, 20) Bi bi in na, Ala ka baarakɛlaw ka kan k’o ɲɔgɔnna de kɛ. Dabaliw ni sɛbɛnw ni “yɛrɛ tanga” baganw ni boliw ni jinɛmoriya kitabuw ani fɛn o fɛn tugulen bɛ jinɛwelelikow la, i ka o bɛɛ bɔ i bolo.

N’i b’a fɛ k’i ko diya Ala ye, nkalon diinɛ bilali ani ko jugu dabilali tɛ bɔli kɛ. I ka kan ka bato saniyalen sirataama ni cɛsiri ye. Min wajibiyalen bɛ i ma, Bibulu b’o jira, ko:

Mɔgɔw bɛ Sitanɛ n’a ka jinɛw bolo dugukolo kan, mɔgɔ minnu bɛ ko juguw kɛ, ka tila ka tɔw kalan u la. Nka, baarakɛlaw bɛ Jehowa fana bolo. O ye Jehowa Seerew ye. (Esayi 43:10) Dugukolo mumɛ kan, u ka ca ni Seere miliyɔn wɔɔrɔ ye. U bɛɛ b’u magan ka ko ɲuman kɛ, ka mɔgɔw kalan tiɲɛ kuma la. Jamana caman na, i bɛ se k’u sɔrɔ u ka Masaya So kɔnɔ. U na i kunbɛn yen koɲuman.

U ka ci ye ka u mɔgɔɲɔgɔnw dɛmɛ u ka baara kɛ Ala ye. U na i kalan Bibulu la i bara, k’i dɛmɛ ka Jehowa batocogo ɲuman dege. I tɛna fɛn sara o la. Seerew nisɔndiyalen don ka tiɲɛ kalan kɛ mɔgɔw kun, katuguni u bɛ u mɔgɔɲɔgɔnw kanu; u bɛ Jehowa Ala fana kanu.