Anmar na sogoedid doaga anmar arbaoe, Jehovagardibe, niamargardibe. Auggi gege sogbodi ibmar imagleged, Jehovaga arbanaba, niamarga arbanaba. Degsoggu, Jehovaga arbaedi bur igar nuedid.

Bad anmar durdasad niamala yeer iddodamarye dulemar wiodidiidba, geb dulemar yardagdimarbalidba. Jehovadi dule degi daedsulid. Igi babgan na mimmigan sabe, Jehovadi deyobi dulemar sabgumamogad. “Bela ibmar nuegan, degi, ibmar inniggimalad, Bab Dummad” anmarga ugmaid (Santiago 1:17). Bab Dummad bela ibmar nuegan dulemarga ugmaid, anba bela beladse gwage nunmagged abarginele ugsadaed (Efesios 2:4-7).

Be iddogena, igi Bab Dummad massi, Jesús, nabbaneggi gudi gusgu ibmar imagdii gusa. Mudomar nudasad, ibyasurmalad nudasbalid. Dulemar ugga yaabiid nudasbalid, mali muya muyamalad nudasbalid. Dulemargi niamar onosbalid, bela galagwensuli bonigan niggad nudagdii nanasad. Bab Dummad e ganguedba, Jesus, burgwarmaladse baggar odulosad (Mateo 9:32-35; 15:30, 31; Lucas 7:11-15).

Bab Dummaddi anmarga gaggansaosulid anmar yardaggega, edi ibmar inniggigwadbi sogmaid.  Bibbisaar dulemar yardagmasulid (Números 23:19).

Igi guggur, bibaugi galesar bibbirmagnai gusdae, deyobi buggidar dulemar isedba bibbirmas gudidimarmogad, bar ibmar nuegan imagdidisurmalad. Aagala burgwismalad dobdamalad, niamar dobdamarbalid. Uggabsaleged dobdamarbalid, ibmar soggwen daglesadba neg dargwen guoye soglealir dobdamarbalid. Ina isgana egi mileged dobdamarbalid. Dulemar, ibmar wegimalad imaggedbali Nia gaggansadiidba bibbirmas gudimarsunnad, geb dadgan ibmar sogedba bibbirmas gudimarbarsunnad. Dulemar, Bab Dummadga arbamaladdina bibbisaar we ibmarba bibbirmaggosurmalad.

Jehova, Satanasba bur yeer gangued. Be, Jehovaga arbaele, Jehova, be bendaggoed mer niamar aggar be imaggega (Santiago 4:7). Dule begi ina isgana imagnaile be aggar guosulid. Nigeriagi deyob ibmar gusad. Dule, Jehovaga arbadiid budar neggweburgi noe guargua, ebaa mergu ina durgan bulegana we dule oburgwega egi ina isgana mismalad. Ina gussurgua, ina duled wargwen dobgualid, degsoggu Jehovaga arbaedse naded, ese wilenaded, ega sogega, melle aggar an imaggoye.

Niamar begi nai nai guarmalale, be nabir Jehovase e nugbali goled. Jehova, be bendaggoed (Proverbios 18:10). Jehova nabir be bendaggegala burbar neg dagmalad ibmar be niggale, bergwable be mier gebed, geb bela niamar ibmar be indagbalir gebed. Ebbenne  Efesogi dulemar Babga arbasmaladi deyob imasmalad. Ina isgana gardamar nigmalanadi bela wesmalad, belagwable ogummagsamalad (Gusmalad 19:19). Emi ibagi Bab Dummadga arbamaladi deyob imagged abelemarmogad. Begi naggulegega be ibmar unaaled nigdibe, unaarsuliddibe, we ibmar mio; be, boni soggwen abinsaega dub edindaele, mer bar imaggo; be, ina igar gardagi narmaggar sediile, we ibmar mio, geb ibu ibmar bamalad burbar neg damaladgad be nigbarsundibe, bela obelogo.

Be abegele Bab Dummad nued be dagmai gued, unnila noar Bab igar odurdagdimaladgi banguedbii unnisulid, geb ibmar isgana indaggedbi unnisurbalid. Bab igar sunsoged maidba be igar imagdii gubalir gebed. Bibliagi soglenaid ibu ibmar imagged abelege:

Niamar, nabneggi na sordagan niggad e igar odurdagmalaga, geb ibmar isgana imagmarbaliga. Jehova, nabneggi na sordagan nigmogad. Wemala Jehovagi sunmagmaladid (Isaías 43:10). Bela neg dirbimaggar 8 millones gwena mergu Jehovagi sunmagmalad buggwad. Ibmar nuegan imaggedgi arbadidiid, geb Bab igar sunsogedgi dulemar odurdagmarbalid. Neggwebur irbali na Igar Iddoged Neg nigmalad, aagine ubononidamalad, be aase nadmogale nuedgine be abin dagmaloed.

Jehovagi sunmagmalad arbananaid dulemar bamalad nabir Jehovaga arbamarmogaga. Wemala be neggi nabir Biblia igargi be odurdagmalad; be odurdagmaloed igi Jehovaga nueggwa ibmar imaglege. Be odurdaggega begi mani gaosurmalad. Jehovagi sunmagmaladi yeer iddodamalad Bab igar sunsogedgi dulemar odurdagmalar, ar dulemar sabmalad, Jehova sabmarbalid.