Isa qanyi së kö isa iën: maine troa nyi hlue i Iehova maine troa nyi hlue i Satana me itre dremoni angeic. Thatreine kö troa ce nyi hlue i nyidroti asë. Ngo, manathithi la atre nyi hlue i Iehova!

Tune lo hne së hna ce wang, hetre ajane la itre dremoni troa akötrëne me troa amenune la itre atr. Tha ceitune kö me Iehova. Nyidrëti a hnime la nöjei atr’asë tune la ihnimi ne la keme kowe la itre nekön. Qa thei Nyidrëti “la nöjei ahnahna ka loi asë, memine la itre hna hamëne gufane ka lolo asë.” (Iakobo 1:17) Pëkö ewekë ka loi hnei Nyidrëti hna hnöthe pe troa hamën, ngacama ewekë ka tru thupene koi Nyidrë.—Efeso 2:4-7.

Mekune ju së lo itre ewekë hna kuca e celë fene hnei Iesu, hupuna i Akötresie. Hnei Nyidrë hna fe la që ne la itre hum, me alameke ne la itre timek. Hnei Nyidrëti fe hna amelene la itre lepera memine la itre peje ca. Hnei Nyidrëti fe hna upe trije la itre dremoni, me amelene la nöjei pengöne meci ka nyimutre. Nge qa ngöne la trenge catre hnei Nyidrë hna kapa qa thei Akötresie, hnei Nyidrë fe hna amelene hmaca la itre ka meci hë.—Mataio 9:32-35; 15:30, 31; Luka 7:11-15.

Pëkö trengathoi thei Iehova, maine iamenu pena. Ohea, Nyidrëti palahi a qaja la nyipici. Tha hnei Nyidrëti kö hna amenune la ketre me ketre.—Numera 23:19.

Tune lo aqane xöleuthe nyimenyimëne la nenge hnene la iaeng, ketre tune fe hi lo aqane xöleuthe la itre atr ka alanyimu hnene la xoue haze me sili trengathoi; hna e la itre milio. Angatre fe a xouene la itre atr ka meci hë. Angatre fe a xouene la itre dremoni. Angatr’ a akötrehnine la itre nyine iangazo, itre ewekë ka nyihatr, itre nyine ihanyi, me itre nyine ithupë. Angatr’ a xötrethenge la itre hna majemine mekun, me itre aqane ujë hna nyi trepene hnene la itre trengathoi i Satana diabolo. Loi e tha tro kö a jötre la itre hlue i Iehova hnene la itre ewekë cili.

Catre kö Iehova hui Satana. Tro Iehova a thepe epuni qa thene la itre dremoni, e hnei epuni hna nyi hlue i Nyidrë (Iakobo 4:7). Pë jë kö troa hetre thangane la itre iangazo. Ngöne la ketre nöj, Nizeria la ëjen, ke, hnene la köni trene haze ka catr hna mekune troa angazone me humuthe la ketre hlue i Iehova hnei angatre hna helën, ngo xele kö ma tro qa ngöne lai nöj. Ngo pë ju kö thangane lo lai iangazo, celë hi matre hna xou atraqatre lai ketre ka kuci drösinö, nge angeic’a tro pi troa qeje menu kowe lo temoë.

Maine itre dremoni a kucahmë epun, ke, hë jë draië koi Iehova hnene la ëje i Nyidrë, nge tro hë Nyidrëti a xatua epuni me thupë epun (Ite Edomë 18:10). Ngo eje hi laka e epuni a ajane tro Akötresieti a thupë epuni me xatua epun, ke, loi e tro epuni a inue palua memine la nöjei ewekë, ka cememine la kuci haze me ka cememine la troa hni koi itre dremoni. Celë hi aqane ujëne la itretre nyi hlue i Akötresie ekö e Efeso. Hnei angatre hna icasinekeune asë la itre itusi angatr, itusi ne kuci haze, me dreuthe trij’asë itr’ej (Ite Huliwa 19:19, 20). Nyipi ewekë troa kuca tune lai hnene la itretre nyi hlue i Akötresie ngöne la hnedrai enehila. Trije pi epuni la itre drösinöe ne ihanyi, itre nyine isi, nöjei nyine “ithupë”, itre nyine iangazo, itre itusi ne iamamanyikeu, me itre xaa ewekë ju kö hna kuca nyine nyi haze.

Maine epuni a ajane troa amadrinë Akötresie, ke, tha hape kö tro hi a nue trije la hmi ka tria, me hmaca troa kuca la itre ewekë ka ngazo. Nyipi ewekë fe tro epuni a catre trongëne me kuca la nyipi hmi. Tusi Hmitrötre a amamane la nyine troa kuca:

Hetre itre hlue i Satana me itre dremoni e celë fen, angatr’a inine me kuca la nöjei ewekë ka ngazo. Ngo hetre itre hlue i Iehova fe. Angatre lo itretre anyipici Iehova (Isaia 43:10). Hna e la sikis milio lao angetre anyipicine ngöne la fene hnengödrai asë. Angatr’ asë a tupathe troa catre kuca la loi, me inine la nyipici kowe la itre atr. Ngöne la nöjei götran, ijije tro epuni a iöhnyi me angatre ngöne la itre uma ne Baselaia, celë hi göhnë ne tro angatr’a kapa madri epun!

Hnëqa i angatre la troa xatuane la itre xane troa nyi hlue i Akötresie. Celë hi matre angatr’a ini tusi e cili kö hnalapa i epun, me xatua epuni troa öhne me atre la aqane troa hmi koi Iehova ngöne la gojenyi ka meköt. Tha hna nyithupene kö. Atraqatre pe la madrine ne la itretre anyipicine troa inin, me qaja la nyipici, pine laka tru la ihnimi angatre kowe la itre atr nge ketre, nyipi atraqatre fe la ihnimi angatre koi Iehova Akötresie.