Eṱe atuhe tu na ouyara. Owokukarera Jehova poo okukarera Satana nozondemone ze. Eṱe kamaape ya atu tjiti aviyevari pamwe. Okokuwa pu pe ṱa pi okukarera Jehova!

Otja eṱe tji twa munu, ozondemone ze tjaterwa okuhihamisa nokutikura ovandu. Jehova ka sanene ngo kako. Eye wa suvera ovandu otja ihe rive tja suvera ovanatje ve. Eye ongu ri Omuyandje ‘wotjiyandjewa atjihe otjiwa, notjipewa atjihe otjipwe.’ (Jakobus 1:17) Eye ke notjiṋa kangamwa otjiwa tje rurupara kovandu, nandarire kutja ouzeu ounene ku ye omuini.—Ovaefese 2:4-7.

Ripura ohunga noviṋa mbya tjitwa i Jesus kombanda yehi, Omuzandu waMukuru. Eye wa seturura ovikume omaraka na yandja omeho kovapoṱu. Eye wa verura ovanamutjise wongana novaremane. Eye wa pitisa ozondemone na verukisa omitjise kangamwa avihe. Jesus, nombatero yomasa waMukuru, wa pendura nandarire ovaṱi komuinyo.—Mateus 9:32-35; 15:30, 31; Lukas 7:11-15.

Moruveze rwokutukorera ovizeze okutupúkisa, Mukuru aruhe u hungira ouatjiri. Eye ke na pe rora okutikura kangamwa auhe.—Numeri 23:19.

Otja tjimuna orungovi rwotjitjauvi tji ru ṱiza onḓe, omangete wovandu ve ṱiziwa i ovizerika nouhauatjiri. Owo ve tira ovaṱi. Owo ve tira ozondemone. Owo ve rikenda ohunga nomasengiro, omaukiro woviraisiro (omens), omiti vyourozi, noviṋa vyovizerika mbi nomasa womiti vyourozi (fetishes). Owo va pandekwa i ozongamburiro nozombazu nḓa zikamisiwa movizeze vyaSatana Omudiaboli. Ovakarere vaMukuru kave kamburwa mongwehe yoviṋa kangamwa vyaimbi.

Jehova u nomasa tjinene kombanda yaSatana. Ove tji nga mo karere Jehova, eye me ku yama kozondemone. (Jakobus 4:7) Omarovero kamaa ye ungura move. Otjotjihorera, moNigeria, ozombetere ndatu ozonamasa za rova Omuhongonone waJehova ngwa panḓa okupita motjihuro. Omarovero mokuhinokuungura, umwe wa inḓa ozombetere wa mumapara, a i kOmuhongonone, ne keriheka otjari.

Ozondemone indu tji maze ku kavire, ove mape ya o isana Jehova kena neye me ku yama. (Omiano 18:10) Nungwari ove mokuyenena okukara nomaundiro waMukuru, ove wa sokupoka nokuhinapemwe ku kangamwa otjiṋa atjihe tji tji norupa momaungurisiro wourozi nomerikotameno kozondemone. Overikotamene vaMukuru mu Efesus tjanare otji va tjita. Owo va woronganisa omambo wawo aehe nga ri notjiṋa ohunga nounganga nave ye nyosa. (Oviungura 19:19, 20) Ovakarere vaMukuru ndino va sokutjita tjingetjo. Nambirahi omiti vyourozi, ovitjuma vyopomaoko, oungoze “ounandjeverero,” oviṋa vyovizerika mbi nomasa womiti vyourozi, omambo nge notjiṋa ohunga nounganga, na kangamwa atjihe tji tji nomawanekero novitjitwa vyomaungurisiro wourozi.

Ove indu tji mo vanga okupwa ku Mukuru, otjo kapuwo okuesa omerikotameno omahauatjiri nokuhauhara amo tjiti oviṋa ovivi uriri. Ove wa sere okupanḓipara okuungurisa omerikotameno ouatjiri. Ombeibela mai raisa imbi ovihepwa:

Satana nozondemone ve na ovandu kombanda yehi mbe honga nokuungura oviṋa ovihasemba. Nungwari Jehova wina u na otjiwaṋa. Otjo Ovahongonone vaJehova. (Jesaja 43:10, NW) Mouparanga wehi, ku na Ovahongonone okukapita omangete yane. Avehe vawo ve kondja tjinene okutjita oviṋa ovisemba nu ve honga ovandu ouatjiri. Momahi omengi wawo, ove mo yenene okuhakaena nawo pEtuwo rOuhona, imba owo pu mave ku yakura nomasa aehe.

Otjiungura tjawo otjokuvatera varwe okukarera Mukuru. Owo mave konḓonona Ombeibela puna ove mondjuwo yoye, amave ku vatere okurihonga kutja u sokurikotamena vi ku Jehova momuano omusemba. Ove kahepero okusuta ihi. Ovahongonone ve na enyando okuhonga ouatjiri orondu owo va suvera ovandu nu va suvera Jehova Mukuru.