Ithyonthe twĩ na ũnyuvi. Ũndũ ũmwe nĩ kũthũkũma Yeova kana kũthũkũma Satani na ndaimoni syake. Tũitonya kwĩka maũndũ asu melĩ. Nĩ ũndũ wa ũĩ kũmũthũkũma Yeova!

Tondũ twoona, ndaimoni itanĩaa kwĩka andũ naĩ na kũmakenga. Yeova ndailyĩ ũu. We nĩwendete mũvaĩ-wa-andũ tondũ ĩthe-wa-syana wendete syana syake. We nĩwe Mũnengani wa “kĩla kũnengwa kũseo na kĩla kũnengwa kwĩthĩanu.” (Yakovo 1:17) We ndavataa mũvaĩ-wa-andũ ũseo o na wĩva, o na ethĩwa we mwene nũkũkwata wasyo mũnene.—Aeveso 2:4-7.

Ĩsilye ĩũlũ wa maũndũ ala meekiwe ĩũlũ wa nthĩ nĩ Yesũ, Mwana wa Ngai. Atumie andũ mataneenaa maneena na atuma ililinda syona. Nĩwavoisye awau-ma-mangũ na au-ma-mamutha. Nĩwaumisye ndaimoni na avosya mowau ma mĩthemba yonthe. Kwa vinya wa Ngai, Yesũ o na nĩwookĩlilye akw’ũ meethwa na thayũ.—Mathayo 9:32-35; 15:30, 31; Luka 7:11-15.

Vandũ va kũneena movũngũ nĩ kenda atwasye, ĩvinda yonthe Ngai aneenaa w’o. Ndakengaa mũndũ o na wĩva.—Motalo 23:19.

O tondũ ũlũalũĩ ũlũmasya ngi ĩkalũma ng’a, now’o mamilioni ma andũ malũmĩtw’e nĩ w’ĩa ũkonetye mĩĩkĩĩo ya mavuso mathũku na ũvũngũ. Nĩmakĩaa akw’ũ. Nĩmakĩaa ndaimoni. Nĩmakwatawa nĩ kĩmako kwoondũ wa iumo, nyũnyi, ithitũ na mĩio ya mowe. Methĩawa makwetwe nĩ mĩĩkĩĩo na syĩthĩo syĩ na mũsingi wa movũngũ ma Satani Ndevili. Athũkũmi ma Ngai mayĩthĩawa makwetwe nĩ kĩtei o na kĩva kya maũndũ asu.

Yeova e vinya mũno kwĩ Satani. Wamũthũkũma Yeova, akakũsũvĩa na ndaimoni. (Yakovo 4:7) Kũingĩwa ithitũ kũikakwĩka naĩ. Kwa ngelekany’o, nthĩ ya Naingyelia, andũ awe atatũ me vinya nĩmaingie ithitũ moae Ngũsĩ ya Yeova ĩmwe ĩla yaleile kuma mũsyĩ wa kũu. Yĩla ithitũ isu syaemiwe nĩ kũmwĩka naĩ, ũmwe wa andũ awe asu nĩwakwatiwe nĩ w’ĩa, aendea Ngũsĩ ĩsu, na eetya kwĩw’ĩwa tei.

Ndaimoni syakũnyamasya, nũtonya kwĩkaĩla Yeova kwa syĩtwa yake nake akakũsũvĩa. (Nthimo 18:10) Ĩndĩ nĩ kenda wĩthĩwe na ũsũvĩo wa Ngai, no nginya wĩthasye vyũ kumana na kĩla ũndũ ũkonetye kũneenany’a na maveva na ũthaithi wa ndaimoni. Athaithi ma Ngai nthĩnĩ wa Eveso wa tene meekie ũu. Moombanisye mavuku moo monthe ma wĩki wa syama na mamavĩvya. (Meko 19:19, 20) Athũkũmi ma Ngai ũmũnthĩ no nginya meke oou. Ananga mĩiito yaku, mĩtĩ ya ũoi, mĩkanda ya “ũsũvĩo,” mĩio ya mowe, mavuku ma syama, na kĩndũ kyonthe kĩkonanĩtye na imanyĩo sya kũneenany’a na maveva.

Ethĩwa nũkwenda kwendeesya Ngai, kũekana na ũthaithi wa ũvũngũ na kũekana na maũndũ mathũku kwĩ kw’oka kũitoetye. No nginya ũmanyĩe kũatĩĩa ũthaithi mũtheu. Mbivilia nĩyonanasya kĩla kĩkwendeka:

Satani na ndaimoni syĩ andũ ĩũlũ wa nthĩ ala mamanyĩasya na kũmanyĩa mothũku. Ĩndĩ Yeova o nake e nguthu ya andũ. Asu nĩ Ngũsĩ sya Yeova. (Isaia 43:10) Ilungunĩ syonthe sya nthĩ, kwĩ Ngũsĩ mbee wa milioni thanthatũ. Onthe matataa na vinya kwĩka moseo na kũmanyĩsya andũ ũw’o. Nthĩ mbingĩ, nũtonya kũkomana nao nthĩnĩ wa Nyũmba ya Ũsumbĩ, vala mekũthokya kwa ũsanzamũku.

Wĩa woo nĩ kũtetheesya aangĩ mathũkũme Ngai. Makeemanyĩsya Mbivilia naku nthĩnĩ wa mũsyĩ waku, makũtetheesye ũmanye nzĩa ya kũthaitha Yeova kwa waĩlu. Ndũkaĩva ndĩvi kwoondũ wa ũu. Ngũsĩ syĩthĩawa na ũtanu kũmanyĩsya w’o nũndũ nĩsyendete andũ na nĩsyendete Yeova Ngai.