Iswi tose ti na ku shalula. Ti nga shingila Jehova kene ti nga shingila Satani ne madimona awe. A ti nga ku yete kose. Butjenjedu seni ku shingila Jehova!

Se ta bona, madimona a no zipigwa nge gwadzisa bathu ne ku ba tjebela. Jehova ha a zo jalo. U no da ludzi gwe nthu sa tate be da bana ba bo. Ndiye Mpi we “tjipo tjim̄we ne tjim̄we tja ka lulama ne tjipo tjim̄we ne tjim̄we tja ka lizanila.” (Jakube 1:17) A kuna tjim̄we tja ka lulama tja a no nyima ludzi gwe nthu, kuto be e lashikigwa ku kulu.—Baefiso 2:4-7.

Kumbula nge kwe zwithu zwa ka ikhwa mu shango ndi Jesu, Nkololo we Ndzimu. Wa ka thama mbebebe ku ti dzi lebeleke ne ku pa mapofu ku bona. Wa ka podza ba na mapele ne bathu be zwilema. Wa ka tata madimona ka podza magwele ose a ka ita tjini. Nge masimba e Ndzimu, Jesu, wa ka tongo musa bafi mu lufu.—Matu 9:32-35; 15:30, 31; Luke 7:11-15.

Mu bumo gwe ku ti dzimidza nge ku leba manyekhwa, Ndzimu u no leba lebeswa lubaka gose. Ha a to so tjebela m̄we.—Palo 23:19.

Koga se lidandi gwe tjibubi gu bata thuzi, dzimilioni dze bathu dza ka bakhwa nge bushudzi ne manyepkhwa. Ba no tja bafi. Ba no tja madimona. Ba no khatazeka nge kwe ku pungugwa, shuligwa, zwipheku, ne midzin̄wana. Ba ka sungwa nge dzidumilo ne mipanga ya ka zwi sendeka mu manyepkhwa a Satani Diabulo. Bashingili be Ndzimu ha ba zo batshigwa nge tjim̄we tje zwithu i zwezwi.

Jehova u na masimba ku pinda Satani kule. Ha u shingila Jehova, u nowu ku vikilila mu madimona. (Jakube 4:7) Miti ye buloyi ha i nga shinge mu ku li. Nge ifaniso, mu Nigeria, n̄anga dze hakata dza ka sima dzi li thatu dza ka be dzi shaka bulaya nge buloyi Nfakazi wa Jehova wa ka be e lambila mu toropo. Ha buloyi gu kon̄wa, m̄we we n̄anga dze hakata ka gin̄wa nge lutjo, ka yenda ku Nfakazi, ka nkumbila mahwigo ngoni.

Ha madimona e ku dziyidza, u nga dana zina la Jehova ngono u nowu ku vikilila. (Zwiani 18:10) Ngono ku ti u wane mbakililo ye Ndzimu, wa ka fanila thubukana tjoselele ne zwithu zose zwi no yendidzana ne shingisa badzimu ne namato ye madimona. Banamati be Ndzimu mu Efiso wa ntolo ba ka thama sa i koku. Ba ka kubunganya dzibuka dzose dza bo dze masalamusi ba ka dzi pisa. (Mishingo 19:19, 20) Bashingili be Ndzimu na nasi ba ka fanila thama tja ka fanana. Dusa mu kuli zwipheku, zwi no tata badi, ntambo dzi no “bakilila,” midzin̄wana, dzibuka dze masalamusi, ne tjim̄we ne tjim̄we tji no  shanganila ne mishingo ye shingisa badzimu.

Ha u shaka ku shathisa Ndzimu, a ku zo lizana ku ti koga u siye namato ye manyepkhwa ne ku misa zwithu zwa ka bipa. Wa ka fanila shingisa namato ya ka engemala wa ka simisa. Baibili i no lakidza tji no shakika:

Satani ne madimona ba na bathu mu shango ba no diya ne ku thama zwithu zwa ka bipa. Ngono Jehova u na bathu bo. ‘Ndibo Bafakazi ba Jehova. (Isaya 43:10) Ku palama shango, ku na Bafakazi ba no pinda dzimilioni dzi li nna. Bose ba no gwisa kwazo ku thama zwithu zwa ka lulama ne ku diya bathu malebeswa. Mu bunji gwe shango, u nga shangana na bo ku Dziholo dze Bushe, kwa ba nowo ku amutjila nge mabili.

Nshingo wa bo wu batsha bam̄we ku shingila Ndzimu. Ba nowo zwi diya Baibili na we mu nzi u wo, be ku batsha ku zwi diya ku namata Jehova nge zila ya ka fanila. Ha u to sheta ku lipila i koku. Bafakazi ba no shathila ku diya malebeswa ngobe be da bathu ne ku da Jehova Ndzimu.