Ithwe bosi thutholere eriyisombolera. Thukendi kolera Yehova kutse Sitani n’esyombinga siwe. Si thwangakolera abosi. Ka nikya bwenge erikolera Yehova!

Ngokwa thwabirilhangira, esyombinga sikatsema sikahuthalya n’eritheba abandu. Yehova syali athya. Anzire abandu ng’omubuthi kw’akanza abana biwe. Y’omughabi ‘wabuli lhusunzo lhubuya kandi n’olhusunzo olhuhikene.’ (Yakobo 1:17) Syali sunzira abandu banabi, n’omwa kyangabya kya bughuli bunene okw’iyo.​—Abanya Efeso 2:4-7.

Thalengekania okwa bindu ebya kolhawa okwa kihugho na Yesu, Mughalha wa Nyamuhanga. Mwalhamya ebikiru byathoka eribugha n’esyandimethime sya lhangira. Mwalhamya abahagha n’ebirema. Mwahighitha esyombinga n’erilhamya obuli mulingo w’amalhwere. Busana n’akaghalha ka Nyamuhanga, Yesu mwalhubukya abaholi okwa ngebe.​—Matayo 9:32-35; 15:30, 31; Luka 7:11-15.

Omw’omwanya w’erithubwira amabehi erithuthalya, Nyamuhanga akathubwira ekwenene omughulhu wosi. Syali athatheba mundu n’omughuma.​—Emiganzo 23:19.

Ngoko obukanga obw’ekithathangulha bukahamba lhuba eyisuki, obukekulhu n’obukekulhu obw’abandu bukahambawa lhuba omwa amabehi n’emirwa eyikaletha obuba. Bakubaha abaholi. Bakubaha esyombinga. Ibathithimana ahabwa ebitsumi, erilhaghulha, ebisambu, n’amarogho. Babohirwe n’esya ngangirirya n’emirwa eyimanire okwa mabehi a Sitani Diabolo. Abaghombe ba Nyamuhanga si baliwa omwa kithegho eky’ebindu ebi.

Yehova ni w’akaghalha akalengethukire kwilhaba Sitani. Wamakolera Yehova, inyakendi kutheya okwa syombinga. (Yakobo 4:7) Erikughusa kwa marogho syanga kukolha kwa kindu. Ng’eky’erireberyako, e Nigeria, abakumu basathu abakalhakalire mubathuma amarogho eriyitha Omwema wa Yehova oyuwaghana erilhwa omwa muyi. Amarogho abere alemwa, omughuma w’okw’abakumu mwakwa obuba, mwaghenda eyiri Omwema, n’erisaba athi amughanyire.

Esyombinga syamakulyambya, wangana birikira okwa lina lya Yehova neryo inyakendi kutheya. (Emisyo 18:10) Aliriryo eribana obutheya bwa Nyamuhanga, wutholere iwayihighulha ndeke okw’obuli kindu kyosi ekihambangene n’abalimu n’eriramya ery’esyombinga. Abaramya ba Nyamuhanga abe Efeso abakera mubakolha bathya. Mubaletha ebitabu byabu ebyosi eby’obukumu n’erihisyabyo. (Emibiiri 19:19, 20) Abaghombe ba Nyamuhanga munabwire batholere ibakolha bathya. Yilhusaye kw’ebisambu, emiseghe  kutse obubbangili, amarogho, ebitabu by’obukumu, n’obuli kindu kyosi-kyosi ekihambangene n’abalimu.

Wamanza eritsemesya Nyamuhanga, si ry’erikwama kya yihighulha okwa miramirye  ey’amabehi n’erileka erikolha ebibi. Wutholere iwa kwama-kwamania eriramya ery’ekwenene. E Biblia yikakanganaya ekikayithayisibawa:

Sitani n’esyombinga bawithe abandu okwa kihugho abakakangiriraya n’erikolha ebindu bibi. Aliriryo na Yehova nayo anawithe abandu. Ba Bema ba Yehova. (Isaya 43:10) Omwa kihugho kyosi, muli Abema abalhabire obukekulhu mukagha. Abosi bakalengesaya n’akaghalha erikolha ebibuya n’erikangirirya abandu b’ekwenene. Omwa bihugho bingi, wangana basanga okwa Kisenge ky’Obwami, aho bakendi kwangirira ndeke.

Omubiiri wabu ly’eriwathikya abandi erikolera Nyamuhanga. Bakend’igha nawu e Biblia eka ewawu, erikuwathikya wuminye ngokwa wanga ramya Yehova omwa nzira eyuwene. Si wutholere eriliha mbulho busana n’erigha eri. Abema bali n’obutseme erikangirirya ekwenene kusangwa banzire abandu kandi banzire Yehova Nyamuhanga.