Atweba bonse tuji na luusa lwa kwifuukwilapo bintu byo tukeba kuba. Twakonsha kufuukulapo kwingijila Yehoba nangwa kwingijila Satana ne bandemona banji. Kechi twakonsha kwingijila Lesa ne bandemona pa kimye kimo ne. Kintu kyawama kyo twafwainwa kufuukulapo ke kwingijila Yehoba.

Byonkatu byo twafunda kala, bandemona bomvwa bingi bulongo kumanyika bantu ne kwibajimbaika. Yehoba aye kechi uba bino ne. Watemwa bingi bantu byonkatu nsemi wamulume byo atemwa baana banji. Baibolo waamba’mba: “Bya bupe byonse byawama ne byalumbuluka bifuma” kwi aye. (Yakoba 1:17) Upa bantu bintu byawama nangwa kya kuba kimye kimo kechi kyapeela kuba bino ne.—Efisesa 2:4-7.

Akilangulukai pa bintu byaubile Yesu, Mwana Lesa byo ajinga pano pa ntanda. Wabukile bakamaama ne bampofu, ba mbumba ne balemana. Wapangile bandemona ne kubuka bajinga na bikola. Kabiji Yesu wasangwile ne bantu bafwa mambo Lesa wamupeele bulume. —Mateo 9:32-35; 15:30, 31; Luka 7:11-15.

 Lesa kechi witubuula bya bubela ne, witubuula bya kine. Kechi ujimbaika bantu ne.—Kubala 23:19.

Byonkatu tulongolo byo tufwa mu tangatanga, ne bantu bavula byo byo batendeka kupopwela mipashi ne kulondela bya bubela byo bebabuula. Bachiina bantu bafwa ne bandemona. Bachiina bingi bantu bafinga bakwabo, baji na bilola ne michi ya kwishiika. Balondela mafunjisho ne bisho bya bubela byafuma kwi Satana Diabola. Bakalume ba Lesa bachinuzhuka kuba bino bintu.

Yehoba uji bingi na bulume kukila Satana. Inge mwafuukulapo kwingijila Yehoba, ukemuzhikijla ku bandemona. (Yakoba 4:7) Kuketekela mu mipashi kechi kukemukwasha ne. Mu kyalo kya Nigeria, balozhi basatu bakebelenga kwipaya Kamonyi wa kwa Yehoba wakaine kufuma mu kimasamasa mo bekala. Byo bakankelwe kumwipaya, mulozhi umo waumvwine bingi moyo kabiji wayile ku uno Kamonyi ne kulomba’mba amulekeleko mambo.

Inge bandemona bemulukuka, lombai kwi Yehoba kwingijisha jizhina janji kabiji ukemuzhikijila. (Byambo bya Maana 18:10) Bino pa kuba’mba Lesa emuzhikijile, mwafwainwa kutaya byonse byavwangwamo kupopwela mipashi ne bandemona. Bakalume ba Lesa bajinga mu Efisesa byo byo baubile. Bakonkenye  pamo mabuku abo a buñanga ne kwiasoka. (Byubilo 19:19, 20) Bakalume ba Lesa nabo byo byo bafwainwa kuba lelo jino. Tayai michi ya kwishiika, bilola, mabuku a bya bulozhi ne bintu byonse bitundaika mipashi.

Inge mukeba kutokesha Lesa pa muchima, kechi mwafwainwa kufumatu mu bupopweshi bwa bubela ne kuleka kuba bintu byatama ne. Mwafwainwa  ne kutundaikanga bupopweshi bwa kine. Baibolo waamba byo mwafwainwa kuba bino.

Satana ne bandemona baji na bantu pano pa ntanda bafunjisha bya bubela ne kuba byatama. Yehoba naye uji na bantu. Bano bantu ke Bakamonyi ba kwa Yehoba. (Isaya 43:10) Kuji Bakamonyi ba kwa Yehoba kukila pa 8 milyonyi mwaya ntanda yonse. Bano bantu bebikako kuba bintu byawama ne kufunjisha bantu bukine. Mu byalo byavula, mwakonsha kwibataana pa Mazubo a Bufumu kabiji bakemutambwila bingi na lusekelo.

Mwingilo ye bengila ke wa kukwasha bantu kwingijila Lesa. Bakatemwa kwiyanga na kwimufunjisha Baibolo pa nzubo penu, kabiji bakemukwasha kuyuka byo mwafwainwa kupopwela Yehoba bulongo. Kechi mukapananga mali pa kwimufunjisha ne. Bakamonyi bomvwa bingi bulongo kufunjisha bantu bukine mambo batemwa Yehoba Lesa ne bantu.