Ose natuvenye kwa kara nehoroworo. Ose kuruganena Jehova ndi Satana. Ose kapi tatu vhuru kuruganena navenye. Eh nondunge musinke nsene o ruganena Jehova!

Ngamoomu tuna mono, vademone kuyihafera yokuruganena vantu maudona nokuvapempura. Jehova age kapisi ngoso. Age kwa hara vantu navenye ngamoomu ga hara guhya vana vendi. Age Mugavi gwa “nkenye uhwi wouwa nosigava esi sa sikilira mo.” (Jakopo 1:17) Age kwato sininke sosiwa esi a silike vantu navenye, nampili yi mu retere mwene udona.—Vaefeso 2:4-7.

Gazara koyininke eyi ga rugene Jesus, MunwaKarunga kontunda zevhu. Age nga ninki yipuru-puru yi uyunge ano ga ninkire vatwiku va mone hena. Age ga verwire vanayingondwe noyirema. Age ga tjidire vademone movantu nokuverura mauvera gokulisiga-siga. Kupitira mononkondo daKarunga, Jesus ga pindwire novafe vaava.—Mateusa 9:32-35; 15:30, 31; Rukasa 17:11-15.

Mevango lyokusimwitira yimpempa atu pukise, Karunga narunye kusimwitira usili. Age narumwe si a pempura vantu.—Numeri 23:19.

Moomu tupu ali kwata embo lyakauvi ndi, yimo ngoso gakwata mapuro goyimpempa noyimpempa mamiliyona govantu. Awo kutjira vafe. Awo kutjira vademone. Awo kulipakera sinka komafingo, yiyowo noyirogesa. Awo kwa va kwata mapuro nonompo edi da korera poyimpempa yaSatana Mudiyaboli. Vapika vaKarunga kapi asi va kwata nampili simwe soyininke eyi.

Jehova nonkondo unene kupitakana Satana. Nsene to ruganene Jehova, age ngano nga ku gamena kovademone. (Jakopo 4:7) Kapi ngava vhura kukutjilisa nounganga. Pasihonena, moNigeria nonganga ntatu dononkondo kwa hetekerere ko kudipaga nounganga Mbangi zaJehova ezi za nyokere kutunda modoropa. Eruganeso unganga apa lya rumbwangerere, gumwe gononganga ta kara nowoma, ta zi koMbangi nokukamulikwambera egusiropo.

Nsene vademone tava kusipangeda, kuvhura o kuge edina lyaJehova ano age nga ku gamena. (Yisewe 18:10) Nye nsene ono hara kuhafera egameno lyaKarunga, wa hepa ntani kukakutukilira kwankenye sininke esi sa kara melikwatakano noumpure nekandererovademone. Vakandereli vaKarunga moEfeso zomuhowo va yi rugene. Awo kwa pongayikire nobuke dawo nadinye dokuhamena koumpure makura tava di hwike. (Yirugana 19:19, 20) Vapika vaKarunga vanaina va hepa kurugana yokulifana. Kakutuka kotuninke twerago, yilivatereso kepumuno, tungodi “twegameno” komukagu, yininke younganga, nobuke dokuhamena kounganga nokwankenye sininke sapeke esi sa kara melikwatakano nondunganeso zopaumpure.

Nsene ono hara kuhafesa Karunga, kapi yina gwanene nsene o siga tupu ekanderero lyoyimpempa nokuhageka kurugana yirugana yoyidona. Wa hepa kuliyomberesa ekanderero lyosili nawa-nawa noyirugana. Bibeli kuna kulikida eyi vana kuhundira:

Satana novademone kwa kara novantu kontunda zevhu ava ava rongo nokuliyomberesa yininke yepuko. Nye Jehova nage kwa kara hena nomuhoko. Awo yiwo Nombangi daJehova. (Jesaya 43:10, NW) Kouzuni naunye kuna kara ko Nombangi dokupitakana nomiliyona ne. Awo navenye kukambadara kurugana yininke yoyiwa nokuronga vantu usili. Moyirongo yoyinzi kuvhura o gwanekere nawo koSinyanga soUhompa, oku ngava ku tambura nomutjima nagunye.

Yirugana yawo kwa kara yokukwafa vapeke mokuruganena Karunga. Awo ngava konakona Bibeli kumwe noge monzugo zoge nokukukwafa o lironge asi ngapi omu no kanderera Jehova ponkedi zouhunga. Kapi no hepa kufuta kweyi. KoNombangi eyi kuna kara ruhafo yokuronga vapeke usili morwa awo kwa hara vantu nokuhara hena Jehova Karunga.