Kaufel’a luna lu na ni ku eza keto. Ki haiba lu sebeleza Jehova kamba lu sebeleza Satani ni badimona ba hae. Ha lu koni ku eza bubeli bwa zona zeo ka nako ye swana. Ki ko ku butali hakalo ku sebeleza Jehova!

Sina ha se lu boni, badimona ba fumana munyaka mwa ku holofaza ni ku kwasheka batu. Jehova haki ya cwalo. U lata mufuta wa mutu sina ndate mwa latela bana ba hae. Ki Mufani wa “mpo ye nde kaufela, ni mpo ye petehile kaufela.” (Jakobo 1:17) H’a timi mufuta wa mutu nto ifi kamba ifi ye li ye nde, niha neikaba kuli seo ne si ka ba se si tula hahulu ku yena.—Maefese 2:4-7.

A mu hupule ka za lika ze ne li ezizwe ki Jesu, Mwan’a Mulimu fa lifasi-mubu. N’a tahisize kuli limumu ba kone ku bulela ni ku tahisa kuli libofu li bone. N’a folisize ba mbingwa ni batu ba ne ba li liyanga. N’a lelekile badimona ni ku folisa mifuta kaufela ya matuku. Jesu, ka m’ata a Mulimu, mane n’a kutiselize ba ba shwile kwa bupilo.—Mateu 9:32-35; 15:30, 31; Luka 7:11-15.

 Mwa sibaka sa ku bulela litaba za buhata ili ku lu yembulula, Mulimu kamita u bulela niti. Ni kamuta h’a pumi mutu ufi kamba ufi.—Numere 23:19.

Sina bwanda bwa liwii ha bu kona ku swasa nzi ka ku tiya, kacwalo batu ba ba fita ku bolule-lule ba swasizwe ka ku tiya ki tumelo ya za mioya ni lishano. Ba saba ba ba shwile. Ba saba badimona. Ba bilaezwa ki likuto, mitolo, mikangabishi, ni liunduma. Ba tamilwe ki litumelo ni lizo ze tomile fa litaba za buhata bwa Satani Diabulosi. Batanga ba Mulimu ha ba swasiwi ki nto ni ye kana ku zona zeo kaufela.

Jehova u m’ata hahulu ku fita Satani. Haiba mu sebeleza Jehova, u ka mi sileleza kwa badimona. (Jakobo 4:7) Liposo ha li na ku sebeza ku mina. Sina ka mutala, mwa Nigeria, baloi ba balalu ili ba ba m’ata ne ba likile ku posa liposo za ku bulaya Paki wa Jehova ya n’a hanile ku tunuka mwa muleneñi. Liposo ha se li palezwi, yo muñwi wa baloi bao a fita fa ku ba ni sabo, ni ku ya ku Paki y’o, ku yo kupa swalelo.

Haiba badimona ba mi lwanisa, mwa kona ku biza Jehova fa libizo mi u ka mi sileleza. (Liproverbia 18:10) Kono kuli Mulimu a mi sileleze, mu lukela ku zwa ka ku tala kwa nto kaufela ye swalisani ni tumelo ya balimu hamohocwalo ni ku lapela  badimona. Balapeli ba Mulimu mwa Efese wa kwaikale ne ba ezize cwalo. Ne ba kubukanyize libuka za bona kaufela ze ne li na ni litaba za mabibo ni ku li cisa. (Likezo 19:19, 20) Batanga ba Mulimu kacenu ba lukela ku eza nto ye swana. Mu zwise ku mina mikangabishi, miulu, mihala ya “silelezo,” liunduma, libuka za mabibo, ni nto ifi kamba  ifi ye swalisani ni likezo za tumelo ya balimu.

Haiba mu bata ku tabisa Mulimu, haki nto ye likani ku zwa fela kwa bulapeli bwa buhata ni ku tuhela ku eza lika ze maswe. Mu lukela ku zamaya luli ka bulapeli bo bu kenile. Bibele i bonisa se si tokwahala:

Satani ni badimona ba na ni batu fa lifasi-mubu ba ba luta ni ku eza lika ze maswe. Kono Jehova ni yena u na ni batu hape. Ki Lipaki za Jehova. (Isaya 43:10) Ku potoloha lifasi-mubu kamukana, ku na ni Lipaki ba ba fitelela bolule ba silezi. Kaufel’a bona ba lika ka tata ku eza lika ze nde ni ku luta batu niti. Mwa manaha a mañata, mwa kona ku ba fumana kwa Ndu ya Mubuso, k’o ba ka mi amuhela ka mufutumala.

Musebezi wa bona ki ku tusa ba bañwi ku sebeleza Mulimu. Ba ka ituta Bibele ni mina mwa ndu ya mina, ku mi tusa ku ituta ka mwa ku lapelela Jehova ka nzila ye lukile. Ha mu tokwi ku lifela seo. Lipaki ki ba ba tabile mwa ku luta niti kakuli ba lata batu mi ba lata ni Jehova Mulimu.