Buonso buetu, tudi ne bua kusungula. Tudi tusadila Yehowa anyi tudi tusadila Satana ne bademon bende. Katuena mua kuenza bintu ebi bibidi to. Mbia meji menemene bua kusadila Yehowa!

Anu bu mutukadi babimone, bademon badi ne disanka dia kukengesha bantu ne kubashima. Yehowa kena nanku to. Mmunange bukua-bantu bu mudi tatu munange bana bende. Udi mufidi wa “dipa dilenga dionso ne wa tshintu tshimpe tshionso.” (Yakobo 1:17) Kena upanga kupesha bukua-bantu tshintu tshimpe tshionso, nansha tshiotshi tshikengela bua kufutaye mushinga mukole.​—Efeso 2:4-7.

Anji kuela meji ku bintu bivua Yezu muenze pa buloba, yeye Muana wa Nzambi. Wakapetesha tumama muakulu ne lumono kudi bafofo. Wakuondopa bena nsudi ne bibombo. Wakipata bademon ne kuondopa masama a mishindu yonso. Yezu, ku bukole bua Nzambi, wakajula ne bafue ku lufu.​—Matayi 9:32-35; 15:30, 31; Luka 7:11-15.

Pamutu pa kuamba malu a dishimi adi mua kutupambula, Nzambi utu anu wamba bulelela. Katu ushima muntu.​—Nomba 23:19.

Anu mudi buntande bukuata lujiji, miliyo ya bantu mbakuatshibue kudi bitabataba ne mashimi. Badi batshina bakishi. Badi batshina bademon. Badi batshina milawu, manga, ne bijimba. Mbapika ba mitabuja ne mashimi a Satana Diabolo. Basadidi ba Nzambi kabena ku bupika bua bintu ebi nansha.

Yehowa udi ne bukole kupita bua Satana kule. Biwikala ukuatshila Yehowa mudimu, neakukube ku bademon. (Yakobo 4:7) Nansha muntu yeye mukuele buanga, kabiena bikuenza bualu. Tshilejilu, ku ditunga dia Nigéria, bena manga basatu bakasua kushipa Ntemu wa Yehowa kampanda pa kumuela buanga bualu wakabenga kumbuka mu tshimenga tshiabo. Pakapangila buanga buabo, umue wa ku bena manga aba wakatuadija kutshina, wakaya kudi Ntemu e kulomba luse.

Pikala bademon bakukengesha, udi mua kubikila dîna dia Yehowa ne yeye neakukube. (Nsumuinu 18:10) Kadi, bua wewe kupeta bukubi bua Nzambi, udi ne bua kuepuka tshintu tshionso tshidi mu diumvuangana ne baspiritu anyi tshia ditendelela bademon. Batendeledi ba Nzambi ba ku Efeso wa kale bakenza nanku. Bakasangisha mikanda yabo yonso ya majimbu ne bakayosha. (Bienzedi 19:19, 20) Basadidi ba Nzambi lelu’eu badi ne bua kuenza bia muomumue. Epuka manga, bijimba, mionji ya mu tshimono, ya mu nshingu ne ya ku maboko ya “kudikuba” nayi, mikanda ya majimbu, ne tshintu tshikuabo tshionso tshidi mu diumvuangana ne bilele bia bupaki bua manga.

Biwikala musue kusankisha Nzambi, kabiena bikengela anu kulekela ntendelelu wa dishima ne kulekela malu mabi. Udi ne bua kuenza midimu ya ntendelelu mukezuke. Bible udi uleja tshidi tshikengedibua:

Satana ne bademon badi ne bantu pa buloba badi balongesha ne benza malu mabi. Kadi, Yehowa udi pende ne tshisamba tshiende. Mbatemu ba Yehowa. (Yeshayi 43:10) Pa buloba bujima, kudi Bantemu bapite pa miliyo inayi. Buonso buabo, badi baditatshisha bua kuenza malu mimpe ne kulongesha bulelela. Mu matunga mavule, udi mua kumonangana nabo ku Nzubu wabo wa Bukalenge kudibo mua kukuakidila ne musangelu.

Mudimu wabo ng’wa kuambuluisha bantu bua kutendelela Nzambi. Nebalonge nebe Bible ku nzubu kuebe, bua kukuambuluisha bua kulonga mua kutendelela Yehowa mu mushindu muakane. Kuena ne bua kufuta kantu bua bualu ebu to. Bantemu badi ne disanka dia kulongesha bulelela bualu mbanange bantu ne mbanange Yehowa Nzambi.