Swensi kwene cila-muntu tulinzile ukusoololapo icintu conga: Ukuombela Yeova, nanti ukuombela Satana ni viwa vyakwe. Tutanga tuombele Leza na Satana apa nsita ili yonga kwene. Mwaya sana mano umu kuombela Yeova!

Itusambilila ukuti iviwa vyatemwa sana ukucuzya nu kusomba antu. Yeova wene asi vino waya. Watemwa antunze wakwe vino isi watemwa ana yakwe. Aali kapeela wa “wila usuma onsi ni cakupelwa cifumaluke consi.” (Yakobo 1:17) Pataya nanti cimwi icisuma cino asipeela antunze, ni vintu ivitale ukucita wene akatucitila.—Efeso 2:4-7.

Elenganyini pa vintu vino Yesu, Mwana Leza wacisile lino wali pano nsi. Wapozizye ya ciulu ni impafu. Wapozizye yakwe tembwe na alemale. Wafumyanga iviwa nu kupozya malwala amisango yonsi. Yesu waomvyanga na maka yakwe Leza ukututulula antu afwe.—Mateo 9:32-35; 15:30, 31; Luka 7:11-15.

Leza asituneena ivya ufi kuti atuponzye, lyonsi kwene akaalanda ivya cumi. Asisomba umuntu nanti wenga.—Impendwa 23:19.

Antu aingi wakwe cimwi yaalemya uku vizumilo vyaufi wakwe vino ulusazi lukalemya kuli tandaulwe. Yakatiina afwe. Yakatiina iviwa. Yakasakamikwa sana ukuti umwi angayatiipa, nanti ukuti yangatoola umupamba, kupya yakatiina ukuvinwa. Yateekwa uzya uku vizumilo ni ntambi izyayako pa mulandu nu ufi wakwe Satana Ciwa. Aomvi yakwe Leza yene yasitiina nanti cimwi pa vintu kwene vii.

Yeova wakwatisya amaka ukuluta Satana. Ndi mukuombela Yeova, alaamucingilila uku viwa. (Yakobo 4:7) Nandi umwi wezya ukumuvina, uwanga wakwe utalaomba. Cii cacitikile Nte umwi uku Nigeria, ya sing’anga yatatu amaka sana yamutevile uwanga ukuti yamukome pano wakaanyile ukufuma umu muzi. Lino uwanga wafizilwe ukuomba, sing’anga wenga pali yaya yatatu uvwile intete nu kuya kuli Nte ku kuleenga uwelelo.

Ndi viwa vya mucuzya, mungama Yeova ukuomvya izina lyakwe, nawe alamucingilila. (Amapinda 18:10) Nomba pakuti Yeova amucingilila, mufwile ukusenka kuli vyonsi ivikauvwana ni mipasi ipe nu kupepa iviwa. Yakapepa yakwe Leza aaliko mpiti umu Efeso avino yacisile. Yakonganike impapulo zyonsi izya malele nu kuzyoca. (Milimo 19:19, 20) Avino na aomvi yakwe Yeova yafwile ukucita ndakai. Mufwile ukusumba vyonsi ivya wanga, incilizi, impinga zya “kuicingilila,” iviziimba, amabuku  ya malele, na vyonsi ivikauvwana ni mipasi ipe.

Ndi mukulonda ukuzanzya Leza, mutaapelela sile apa kusenka uku mipepele yaufi nu kuta ukucita ivipe. Mulinzile ukucita ivintu ivikalanga ukuti mukapepa Leza umu cumi. Baibolo ikatuneena ivikalondekwa:

Satana ni viwa yakwata antu pano nsi aakasambilizya nu kucita ivintu ivipe. Nomba, Yeova nawe wakwata antu. Antu yayo a ya Nte Yakwe Yeova. (Ezaya 43:10) Umu nsi yonsi, mwaya ya Nte Yakwe Yeova ukucila pali 7 milyoni. Yonsi kwene yakaezya na maka ukucita ivintu ivisuma nu kusambilizya antu icumi. Umu mpanga izingi, mungayazana apa Ng’anda ya Wene, ali pano yalamupokelela ningo sana.

Umulimo uno yakaomba u wa kwavwa antu ukuombela Leza. Yalamwazwa ukusambilila Baibolo apamwinu, pakuti muce mumanye ukupepa Yeova umu nzila ya mpomvu. Yasilipilisya. Ya Nte yatemwa ukusambilizya antu icumi pano yatemwa antu nupya yatemwa Yeova Leza.