Kõj aolep ewõr ad jokãlõt. Jemaroñ kããlõt ñan karejar ñan Jeova, ñe ab karejar ñan Setan im enjel̦ ro an renana. Kããlõt eo ejim̦we ej bwe jen karejar ñan Jeova!

Ãinwõt ad kar etale, enjel̦ ro renana relukkuun kõn̦aan ko̦kkure im m̦on̦e armej ro. Bõtab, Jeova ejjab ãindein. Jeova ej ãinwõt jemãd im el̦ap an yokwe kõj. E eo ear letok ‘menin letok ko rem̦m̦an im reweeppãn otemjej.’ (Jemes 1:17) Bareinwõt, ejjab dãpiji ak n̦ooji men ko rem̦m̦an jãn armej ro. Joñan an yokwe kõj ear jilkintok Nejin ñan lal̦ in bwe en mej kõn kõj.​—Epesõs 2:4-7.

L̦õmn̦ak m̦õk kõn men ko Jijej ear kõm̦m̦ani ke ear pãd ioon lal̦ in. Ear kõm̦m̦an bwe ro rejaje kõnnaan ren jel̦ã kõnnaan im bwe ro repilo ren lol̦o̦kjen̦. Ear kõmour armej ro me rar lõba im kõm̦m̦an bwe ro rejaje etetal ren maroñ etetal. Ear kajutakl̦o̦k jetõb ettoon ko jãn armej ro im kõmour er jãn nañinmej ko aer. Bareinwõt, ikijjeen kajoor eo jãn Anij, Jijej ear kejerkak armej ro jãn mej.​—Matu 9:32-35; 15:30, 31; Luk 7:11-15.

Aolep iien Anij ej kwal̦o̦k m̦ool ñan kõj im ejamin riabe kõj. Ejjañin kar m̦on̦e jabdewõt  armej, im ejamin kõm̦m̦ane men in.​—Bõnbõn 23:19.

Elõñ milien armej ro rej po ilo aujiid ko an Setan ikijjeen m̦antin anijnij im kajjetõbtõb ko. Rej ãinwõt l̦o̦ñ ko me rej ko̦jek im po ilo toon ko̦ul̦al̦o ko. El̦ap an armej ro mijak ro remej. El̦ap aer mijak jetõb ettoon ko ak enjel̦ ro renana. Remijak ñe armej ro jet renaaj kõpãle ak ko̦kkure er. Eñin unin rej ekkõn̦ak m̦arm̦ar ak kein kõjparok ko im rej illik kein karwaan ilo m̦oko im̦weer. Rej ãinwõt ri kam̦akoko ro ñan m̦anit im imminene kein me rej jebar im wal̦o̦ktok jãn katak im mel̦el̦e ko reriab an Setan Tepil̦ eo. Ri karejar ro an Anij rej kõjparok er bwe ren jab po ak l̦orak ilo jabdewõt iaan m̦anit kein.

Jeova elukkuun kajoorl̦o̦k jãn Setan. El̦aññe kwõj karejar ñan Jeova, enaaj kõjparok eok jãn enjel̦ ro renana. (Jemes 4:7) Ñe ro jet renaaj kõpãl eok, reban lo tõprak. Ñan waanjoñak, ilo juon jikin ilo Africa, jilu ri ekkõpãl rar l̦õmn̦ak in m̦an juon iaan Ri Kõnnaan ro an Jeova kõnke ear jab etal jãn bukwõn eo rar pãd ie. Rar kõpãle im m̦õk ak rar jab lo tõprak. Juon iaan ri ekkõpãl rein ear lukkuun mijak im ear jibadekl̦o̦k em̦m̦aan eo im akwel̦ap bwe en jol̦o̦k an bõd.

El̦aññe jetõb ettoon ko ak enjel̦ ro renana rej kabn̦õn̦õik eok, kwõmaroñ jar ñan Jeova im ba etan ilo am̦ jar. Jeova enaaj kõjparok eok. (Jabõn Kõnnaan 18:10) Bõtab, bwe Anij en maroñ kõjparok eok, kwõj aikuj jol̦o̦k jabdewõt men ko me ewõr jabdewõt m̦antin anijnij, kajjetõbtõb, bubu, ekkõpãl, jal̦jal̦, kaulibobo, im men ko ãierl̦o̦kwõt ie. Ri karejar ro an Anij ilo iien ko etto ilo Epesõs rar kõm̦m̦ane men in. Rar aini aolep bok in anijnij ko aer im tili. (Jerbal 19:19, 20) Ri karejar ro an Anij rainin rej aikuj bar kõm̦m̦ane men in. Kwõj aikuj jol̦o̦k jabdewõt m̦arm̦ar im pããñkõl̦ in karwaan ko. Kwõj aikuj bareinwõt jol̦o̦k jabdewõt bok ko, pija ko, uno ko, ak jabdewõt  men ko me rej ekkejell̦o̦k ñan m̦antin anijnij im kajjetõbtõb ko.

El̦aññe kokõn̦aan kabuñbũruon Anij, ejabwe ñan am̦ baj ilo̦k jãn kabuñ ko reriab im bõjrak jãn am̦ kõm̦m̦ani men ko renana. Kwõj aikuj bõk kun̦aam ilo kabuñ eo em̦ool. Baibõl̦ eo ej kwal̦o̦k ta ko kwõj aikuj kõm̦m̦ani:

Ewõr ro doon Setan im enjel̦ ro renana ilo lal̦ in. Armej rein rej kõm̦m̦ani m̦anit ko renana im rej bar katakin ro jet kaki. Ak ebar wõr armej ro doon Anij. Armej rein rej Ri Kõnnaan ro an Jeova. (Aiseia 43:10) Elõñl̦o̦k jãn 7 milien Ri Kõnnaan ro an Jeova ipel̦aakin lal̦ in. Rej aolep kate er ñan kõm̦m̦ani men ko rem̦m̦an im katakin armej ro kõn katak ko rem̦ool. Ilo elõñ aelõñ ko, kwõmaroñ kobal̦o̦k ippãer ilo Im̦õn Kweilo̦k ko aer. Renaaj lukkuun m̦õn̦õn̦õ in karwaineneik eok.

Jerbal eo aer ej ñan jipañ ro jet bwe ren karejar ñan Anij. Remaroñ katak ippam̦ ilo m̦weo im̦õm̦ im jipañ eok ñan jel̦ã ta ko kwõmaroñ kõm̦m̦ani ñan kabuñ ñan Jeova ilo wãween eo ejim̦we im ekkar. Enaaj ejjel̦o̦k on̦ean aer katak ippam̦. Ri Kõnnaan ro an Jeova relukkuun m̦õn̦õn̦õ in katakin armej ro kõn katak ko rem̦ool kõnke rej yokwe armej ro im rej yokwe Jeova Anij.